އިލެކްޝަންސް ކޮމިޝަން (އީސީ) ކޮންޓްރެކްޓަށް ނެގި އިދާރީ މުވައްޒަފެއްގެ ކޮންޓްރެކްޓް އާ ނުކޮށް ދިން މައްސަލައެއްގައި އެ ކޮމިޝަންގެ ހިއުމަން ރިސޯސް ޑިޕާޓްމަންޓްގެ ޑިރެކްޓަރަކު ވަޒީފާ އިން ވަކިކޮށްފި އެވެ.
އީސީގެ އެޗްއާރު ޑިޕާޓްމަންޓްގެ ހެޑްގެ ގޮތުގައި ހުންނެވި ހިތަދޫ އަހުމަދު އަލީ ވަޒީފާ އިން ވަކި ކުރިކަން "އައްޑޫ ލައިވް" އަށް ވެސް ވަނީ ކަށަވަރުވެފަ އެވެ.
އަހުމަދު ވިދާޅުވީ އޭނާ ވަޒީފާ އިން ވަކިކުރީ ވަގުތީ ކޮންޓްރެކްޓް ވަޒީފާއެއް ދީފައި ހުރި މުވައްޒަފެއްގެ ކޮންޓްރެކްޓް އާ ނުކޮށްދިން މައްސަލައަކާ ގުޅިގެން ކަމަށެވެ. އަދި އިއްުޔެ ބޭއްވި އީސީގެ ތިން މެންބަރުންގެ ބައްދަލުވުމެއްގައި އޭނާ ވަޒީފާ އިން ވަކިކޮށްފައިވާ ކަން އެނގިފައިވާ ކަމަށް ވިދާޅުވި އެވެ.
އެހެން ނަމަވެސް އެކަން ރަސްމީކޮށް އަންގާފައި ނުވާ ކަމަށް ކުރިން ފޭދޫ ސްކޫލާއި ހިތަދޫ ސްކޫލާއި އައްޑޫ ހައި ސްކޫލް ގެ އިސް މަގާމުތަކެެއް ވެސް އަދާ ކުރެއްވި އަހުމަދު ވިދާޅުވި އެވެ.
އޭނާ ވަޒީފާ އިން ވަކި ކުރި މައްސަލާގައި އީސީގެ މެމްބަރު މުހައްމަދު ފާރޫގު ވިދާޅުވީ އަހުމަދު ވަޒީފާ އިން ވަކި ކުރީ ކޮމިޝަނުގެ ނިންމުމެއް ތަންފީޒު ކުރުމަށް އޭނާ އެއްބާރުުން ނުދީގެން ކަމަށެވެ.
އަހުމަދު ވަޒީފާ އިން ވަކިކުރި އިރު އީސީގައި ކޮންޓްރެކްޓް އުސޫލުން ވަޒީފާ ދީފައިވާ އަހުމަދު ނިޒާލު ނަޒީރުގެ ކޮންޓްރެކްޓް ގަވާއިދާ ހިލާފަށް އާ ކުރަމުން ގެންދިޔަ މައްސަލައެއް އަހުމަދު ވަނީ އެންޓި ކޮރަޕްޝަންސް ކޮމިޝަން (އޭސީސީ) އަށް މިދިޔަ މަހު ހުށަހަޅައިފަ އެވެ. އަދި އެ މައްސަލަ އެ ކޮމިޝަނުން ބަލަމުން ގެންދާކަން އެނގިފައިވެ އެވެ.