އައްޑޫ ގެސްޓް ހައުސް ވެންޗާ އާ ގުޅޭ ގޮތުން މައުލޫމާތު ދިނުމަށް އައްޑޫ ސިޓީގައި މާދަމާ ބައްދަލުވުމެއް ބާއްވާ ގޮތަށް ހަމަޖައްސައިފި އެވެ.
ބައްދަލުވުން އޮންނާނީ ކައުންސިލް އިދާރާގެ ހޯލްގަ އެވެ. ބައްދަލުވުން ފަށާނީ މެންދުރު ފަހު 2:00 ގަ އެވެ.
އައްޑޫގެ ރަށްވެހިކަމާއި ގުޅުވައި، ގެސްޓް ހައުސްގެ ފަތުރުވެރިކަމުގެ ވިޔަފާރިއާއި، އަދި އެވިޔަފާރިއާ ގުޅޭ އެންމެހާ ޚިދުމަތްތަކާއި ވަޞީލަތްތައް ތަރައްޤީކުރުމަށް ކުރިއަށް ގެންދާ އައްޑޫ ގެސްޓް ހައުސް ވެންޗަގެ ވިޔަފާރިތަކުގައި ބައިވުމަށް އެދޭ ފަރާތްތަކުން ޝައުގުވެރިކަން ހާމަކުރުމުގެ ފުރުސަތު ހުޅުވާލާފައި ވަނީ މި މަހުގެ 12 ދުވަހު އެވެ.
އަދި އަންނަ ޖޫން މަހުގެ 30 ނިޔަލަށް ހުޅުވާލި އެ ފުރުސަތުގައި ޖުމުލަ ނުވަ ދާއިރާއަކުން ވަނީ ހުޅުވާލާފަ އެވެ.
އޭގެ ތެރޭގައި ހިމެނެނީ ގެސްޓް ހައުސް ވިޔަފާރި އާއި، ޑައިވިން ސެންޓަރާއި، މޫދު ކުޅިވަރާއި، ރެސްޓޯރެންޓާއި ކޭޓަރިންގެ ޚިދުމަތުގެ އިތުރުން ސެއިލިން އާއި ޗާޓަރު ފްލައިޓް އޮޕަރޭޓް ކުރުމާއި، ކޮންވެންޝަން ޓުއަރިޒަމް އަދި އައްޑޫ ގެސްޓް ހައުސް ވެންޗާގައި ހިމެނޭ އެންމެހާ އުމްރާނީ މަސައްކަތް ހިންގުމުގެ ދާއިރާ އެވެ.