ހެނދުނު ތެދުވަޑައިގެން ކަންކަމުގައި ރިއެކްޓް ކުރެއްވުމަށް ކުރީގެ ރައީސް/އެމްޑީޕީގެ ރައީސް މުހައްމަދު ނަޝީދު ބަހުގެ ހަމަލާއެއް ރައީސް އިބްރާހިމް މުހައްމަދު ސޯލިހަށް ގޮވާލައްވައިފި އެވެ.
ރިޔާސީ ޕްރައިމަރީގެ ކެމްޕެއިންގައި މިއަދު ފުވައްމުލަކަށް ވަޑައިގެން ބޭއްވި އިވެންޓެއްގައި ވާހަކަފުޅުދައްކަވަމުން ނަޝީދު ވިދާޅުވީ ފިނިހަކަ ދުވެލީގައި ކަންކަން ކުރުމަކީ އެމްޑީޕީ ދަންނަ ކަމެއް ނޫން ކަމަށާއި ސަރުކާރުން ކަންކަން ކުރިއަށްގެންދާ ގޮތް ލަސްކަމަށް ބުނަން ޖެހެނީ ވެސް ކެތްމަދުވާތީ ކަމަށެވެ.
އެންމެންގެ ވެސް ޒުވާނުން އުމުރު ނިމި އާ ޖީލެއް ޒުވާން ކަމާއެކީގައި އަންނައިރު، އާ ޖީލަށް ގޮތްތައް އަވަހަށް ދައްކައިދޭން ބޭނުންވާ ކަމަށް ނަޝީދު ވިދާޅުވި އެވެ. އެގޮތުން ދަރިން ވަންނާނެ ތަން އަވަހަށް ހޯދައިދޭން ބޭނުންވާ ކަމަށާއި އެމީހުން އަދާކުރާނެ ވަޒީފާތަކާއި، އެމީހުންގެ ދުނިޔެ ހެޔޮކޮށްދިނުމަށް އެންމެން ވެސް އެދޭ ކަމަށް ނަޝީދު ވިދާޅުވި އެވެ.
"އެހެންވީމަ އަޅުގަނޑުމެންނަށް ވަގުތު މަދީ، އެހެންވީމަ މި ދެންނެވީ ރައީސް އަރިހުގައި ރިއެކްޓް ނުކޮށް ނޯންނަވާށޭ. ހެނދުނާ ތެދުވަންނަވާށޭ. މިކަމަށް ވިސްނަވާށޭ. އަވަހާރަފުޅުލައްޕަވަމުން ވެސް ކޮންމެ ރަށެއްގެ މަގު ޗާޓު، ކޮންމެ ރަށެއްގެ ލޭންޑް ޔޫސް ޕްލޭން ހިތަށް ގެންނަވާށޭ." ނަޝީދު ވިދާޅުވި އެވެ.
ނަޝީދު ވިދާޅުވީ ރައީސުލްޖުމްހޫރިއްޔާ އަކީ ސަރުދާރެއް ކަމަށާއި އެއީ ރަދުންނެއް ނޫން ކަމަށެވެ. އަދި ރަދުންގެ ގޮތުގައި ރައީސުލްޖުމްހޫރިއްޔާ ސިފަކުރާނަމަ އެއީ ތަރައްގީ އަށް އިންތިހާ އަށް އެޅޭ ހުރަހެއް ކަމަށްވެސް ނަޝީދު ވިދާޅުވި އެވެ.
އެމްޑީޕީގެ ރިޔާސީ ޕްރައިމަރީގައި ނަޝީދު ވާދަކުރައްވާނީ ރައީސް ސޯލިހާ އެވެ. ރިޔާސީ ޕްރައިމަރީ އޮންނާނީ މި މަހުގެ 28 ގަ އެވެ.