މާދަމާ ހުވާ ކުރަން ހަމަޖެހިވާ އިންޑިއާގެ އާ ބޮޑުވަޒީރު ނަރެންދުރަ މޯޑީގެ ހުވާ ކުރުމުގެ ރަސްމިއްޔާތަށް ސާކް ހައުމުތަކުގެ އެންމެ އިސްވެރިންނަށް ދައުވަތު ދީފައި ވަނިކޮށް، އިންޑިއާގެ ނުފޫޒަ ގަފަ ފިލްމީ ތަރިންތަކަކަށް ވެސް އެ ހަފުލާ އަށް ދައުވަތު ދީފި އެވެ.
މީޑިއާ ރިޕޯޓްތައް ބުނާ ގޮތުން އިންޑިއާގެ ރައީސް ޕްރަނާބް މުކަރުޖީ، މޮޑީ އަށް ހުވާލައިދޭ ރަސްމިއްޔާތަށް ދައުވަތު ދީފައިވާ މަޝްހޫރު ތަރިންގެ ތެރޭގައި އަމީތާބް ބައްޗަން އާއި ސަލްމާން ހާނާއި ވިވެކް އޮބެރޯއީގެ އިތުރުން ސައުތު ފިލްމް އިންޑަސްޓްރީގެ ސްޕަސްޓާ ރަޖްނީ ކާންތު ވެސް ހިމެނެ އެވެ.
އެހެންވެ މި ތަރިން ހުވާ ކުރުމުގެ ރަސްމިއްޔާތުގައި ބައިވެރިވާނެކަން ކަށަވަރުވެފައިވާ ކަމަށް ވެސް ބައެއް މީޑިއޯ ރިޕޯޓްތައް ބުނެ އެވެ.
ސަލްމާނަކީ އިންތިހާބުގެ ކެމްޕޭން ތެރޭގައި ވެސް މޮޑީ އާ އެކު، އާންމު ބައެއް ރެލީތަކުގައި ބައިވެރިވެ. މޮޑީ އަށް ވަރަށް ބޮޑަށް ސަޕޯޓް ކުރާ ތަރިއެއްކަން ފާހަގަކޮށްލެވެ އެވެ. ސަލްމާނެކޭ އެއްގޮތަށް ބޮލީވުޑްގެ ވަރަށް ގިނަ ތަރިންނަކީ މޯޑީގެ ސަޕޯޓަރުންނެވެ.
ބޮޑު ވަޒީރުގެ މަގާމު އޭނާ ކާމިޔާބު ކުރިކަން ކަށަވަރުވުމާ އެކު، ގިނަ ފަންނާނުން ޓްވިޓާ މެދުވެރިކޮށް މޯޑީ އަށް މަރުހަބާ ވެސް ކިޔާފައިވެ އެވެ.
ކޮންގްރެސްގެ ޒަމާންވީ ވެރިކަން ނިމުމަކަށް އަައިސް، ބީޖޭޕީ ވެރިކަމާ ހަވާލުވާ އިރު، އެ ޕާޓީގެ ކެންޑިޑޭޓް އަދި އިންތިހާބު ކާމިޔާބު ކުރި މޯޑީގެ ހުވާ ކުރުމުގެ ރަސްމިއްޔާތުގައި ރާއްޖޭގެ ރައީސް އަބްދުﷲ ޔާމީން ވެސް ބައިވެެރިވެވަޑައިގަންނަވާ ގޮތަށް ވަނީ ހަމަޖެހިފަ އެވެ.