އޭއެފްސީ ޗެލެންޖް ކަޕް ގްރޫޕް ބީގެ މެޗްތައް ކުޅުމަށް "އައްޑޫ ފުޓްބޯޅަ ސްޓޭޑިއަމް" ގައި ޖެހި ލައިޓް ނެގުމުގެ މަސައްކަތް ފަށައިފި އެވެ.
މުބާރާތުގެ ގްރޫޕް ބީގެ ފަހު މެޗް އިއްޔެ ހަވީރު ނިމުމާއި އެކު ހެން ލައިޓް ނެގުމުގެ މަސައްކަތް ވަނީ ފަށާފައެވެ.
އިތުބާރު ހުރި ގޮތަކަށް "އައްޑޫ ލައިވް" އަށް އެގިފައިވާ ގޮތުގައި ލަންކާ އިން ލައިޓް ކުއްޔަށް ގެނެސްފައި ވަނީ 320،000 ޑޮލަރަށެވެ.
ޗެލެންޖް ކަޕް ފެށެން ކުޑަ ދުވަސްކޮޅަކަށް ވުމުން ޔޫތު މިނިސްޓްރީން ދަނޑުގައި ލައިޓް ޖެހުމަށް އިއްލާން ކުރުމުން އެކަމަށް ޝައުގުވެރިވާނެ ބަޔަކު ނުވި ކަމަށް ބުނެ ޔޫތު މިނިސްޓްރީން ވަނީ ލަންކާ ސަރުކާރުގައި އެދިފަ އެވެ.
ޔޫތު މިނިސްޓަރ މުހައްމަދު މަލީހް ޖަމާލް ވިދާޅުވީ މިއަހަރު ފަހުކޮޅު ރާޖަ ޕަކްސަ އިންޓަނޭޝަނަލް ކަޕް އައްޑޫގައި ބާއްވަން ހަމަޖެހިފައިވާ ކަމަށެވެ. އަދި އެމުބާރާތަށް އައްޑޫ ސްޓޭޑިއަމްގައި ލައިޓް ޖަހާނެކަމަށެވެ.
މައުލޫމާތު ލިބިފައިވާ ގޮތުގައި ދާއިމީ ލައިޓިން ސިސްޓަމެއް ގާއިމް ކުރުމަށް ހަރަދުވާނީ ގާތްގަޑަކަށް 350،000 ޑޮލަރެވެ.