އޭއެފްސީ ޗެލެންޖް ކަޕަށް ތަރައްޤީ ކުރުމަށް ފަހު ރީބްރޭންޑް ކުރި "އައްޑޫ ސްޓޭޑިއަމް"ގައި ދާއިމީ ލައިޓިން ޖެހުމަށް ވަރަށް އަވަހަށް ބިޑަށް ހުޅުވާލާނެ ކަމަށް ކުޅިވަރާއި ބެހޭ ވަޒީރު މުހައްމަދު މަލީހް ޖަމާލް ވިދާޅުވެއްޖެ އެވެ.
މަލީހް މިރޭ ކުރެއްވި ޓްވީޓެއްގައި ވިދާޅުވެފައި ވަނީ ލަސްތަކެއް ނުވެ އައްޑޫ ސްޓޭޑިއަމްގައި ދާއިމީ ލައިޓިން ޖެހުމަށް ބިޑަށް ހުޅުވާލާނެކަމަށެވެ. އަދި މިހާރު ހުރި ވަގުތީ ލައިޓް ނަގަމުންދާ ކަމަށެވެ.
ޗެލެންޖް ކަޕް ފެށެން ކުޑަތަން ވެފައި ވަނިކޮށް އައްޑޫ ސްޓޭޑިއަމްގައި ލައިޓިން ޖެހުމަށް ޔޫތު މިނިސްޓްރީން ހުޅުވާލިއެވެ. ނަމަވެސް އެއްވެސް ފަރާތަކުން ކުރިމަތި ލައިފައެއް ނުވެ އެވެ.
ޗެލެންޖް ކަޕަށް ހިތަދޫ ސްޓޭޑިއަމް ތަރައްޤީކޮށްފައިވާ އިރު ސިޑި ބަރީގެ ދެފަރާތަށް އިތުރުކުރި ބައި ވަނީ ހިޔާ ނުކޮށް ދޫކޮށްލާފައެވެ. އަދި ހިޔާކޮށްފައިވަނީ ހަމައެކަނި ވީއައިޕީން ތިބޭ ސަރަހައްދު އެކަނިއެވެ.
މުބާރާތުގެ މެޗްތައް ކުޅެމުން ދިޔައިރު ވާރޭވެހި ބައެއް ކުޅިބެލުންތެރިން ވަނީ ހިޔާވުމަށް މިޑީއާ ތިބުމަށް ހަދާފައިވާ ސަރަހައްދަށް ވަދެފައެވެ. އަދި ބައެއް މީހުން ވީއައިޕީން ތިބޭ ސަރަހައްދަށް ވަންނަން ވަނީ މަސައްކަތްކޮށްފައެވެ.
ދަނޑުގައި ދާއިމީ ލައިޓިން އަށް އިއްލާން ކުރާ އިރު ސްޓޭޑިއަމް އަދި މުޅިން ނުނިމޭ ކަން ފާހަނގަ ކުރެވެއެވެ.