ސައިކޮލޮޖީގޮތުން ފްރަސްޓްރޭޝަނޭ ކިޔަނީ އިދިކޮޅު ޖަޒުބާތުގެ ސިފައަށެވެ.
ފްރަސްޓްރޭޝަން ހާމަވެ ފާޅުވަނީ އެ މީހަކު ބޭނުންވާ ކަންތައްތަކާއި އަމިއްލަ އެދުންތައް، ހިތް އެދޭ ގޮތަށް ޙާާސިލު ނުވުމުން ކުރެވޭ އިހުސާސްތަކާ އެކު އަންނަ ރުޅި އާއި ވާ ދެރައިގެ ނަތީޖާއެއްގެ ގޮތުގައެވެ. އެމީހަކަށް ބޮޑުވާ ކަންތައްތައް ނުވަތަ އެ މީހަކު ޙާސިލު ކުރަން ބޭނުންވާ ކަންތައްތައް ޙާސިލުކުރަން ހިތްއެދޭ މިންވަރު ބޮޑުވި ވަރަކަށް އެފަދަ މީހުންގެ ފްރަސްޓްރޭޝަން މަތިވެ އެވެ.
ފްރަސްޓްރޭޝަންގެ ދެ ވައްތަރެއް ހުރެ އެވެ. އެއީ އެތެރޭގެ ޕްރަސްޓްރޭޝަން އާއި ބޭރުގެ ފްރަސްޓްރޭޝަނެވެ.
އެތެރޭގެ ފްރަސްޓްރޭޝަނަކީ އެ މީހެއްގެ އަމިއްލަ މަޤްޞަދުތައް ޙާސިލުވުމަށް ކުރިމަތިވާ ހުރަސްތަކާއި ގޮންޖެހުންތާއި އެކަމެއް ބޭނުންވާ މިންވަރާ ގުޅިފައި ހުންނަ ކަންތައްތަކެވެ.
މިފަދަ ފްރަސްޓްރޭޝަންތައް މައްޗަށް ދިއުމުން އެ މީހަކު މަގުން ކައްސާލުން ވަރަށް ކައިރި އެވެ. އަދި މިފަދަ ހާލަތުގައި އެ މީހުންނަށް މަގު އޮޅުވާލަން އެހެން މީހުންނަށް ވަރަށް ފަސޭހަ އެވެ. މި ހާލަތަށް ދިއުމުން އަމިއްލަ ނަފްސަށް އިތުބާރު ކުޑަވުމާއި ބިރުގަތުން އާންމުވެ އެވެ.
ބޭރުގެ ފްރަސްޓްރޭޝަނަކީ އެ މީހަކާ ގުޅުން ހުރި ކަންތައްތަކުގެ ސަބަބުންވާ ފްރަސްޓްރޭޝަންތަކެވެ. މިއީ ބޮޑެތި އަދި އުނދަގޫ މަސައްކަތްތަކާއި ޓާސްކްތައް ކުރިމަތިވީމާ ނުވަތަ ހީނުކުރާ ގޮތްގޮތް މެދުވެރިވީމާ ކުރިމަތިވާ އުނދަގޫތަކެވެ.
ދުނިޔޭގައި ބޮޑެތި ކުށްތައް ރާވާ ހިންގާ ގޭންގުތަކުން އެކިއެކި ކަންކަމާ ގުޅިގެން ޕްރަސްޓްރޭޓް ވެފައިވާ މީހުން ހޯދައި އެމީހުންނަށް އެމީހުންގެ މަޤްޞަދު ހާސިލު ކުރެވިދާނެ ކަމަށް ބުނެ ހީލަތްތެރި މަގެއް ދައްކައި، އެ މީހުން ލައްވާ ކުށް ކުރުވަ އެވެ.
ބޮޑެތި ކުށްތައް ހިންގާ ގިނަ މީހުންނަކީ މިފަދަ ކެހިވެރިންގެ ދަލުގައި ޖެހެވޭ މީހުންނެވެ. އެމީހެއްގެ އަމިއްލަ އެދުމުގެ ކުރިމަތީގައި ކެތްތެރިކަން އިސްކޮށް، ނަފްސު ކޮންޓްރޯލްކޮށް، ޖަޒުބާތުތައް ހިފަހައްޓާ ނުލެވޭ މީހުންނެވެ.
ދުނިޔެއަކީ އިމްތިޙާނު ތަކުން ފުރިފައިވާ ތަނެކެވެ. މިއީ ހުރިހާ އެންމެންނަށް ކާމިޔާބު ލިބޭ މައިދާނެއް ނޫނެވެ. އިންދާ ހުރިހާ ގަހެއް ރޯވުމެއް ނެތެވެ. އުފެދޭ ކޮންމެ ދަރިފަންޏެއް ދަރިމައެއް ނުވެ އެވެ. އުފަންވާ ކޮންމެ ކުއްޖަކީ ޒުވާންކަމުގެ ޙަޔާތާއި މުސްކުޅިކަމުގެ ހަޔާތް ދެކޭ ކުއްޖެއް ނޫނެވެ. މިއީ އިލާހީ ޤާނޫނެވެ.
ދުނިޔެވީ ހަމަތައް ވެސް މިފަދަ އެވެ. އެއްވެސް މުބާރާތެއްގައި ބައިވެރިވާ އެންމެންނަކަށް ޗެމްޕިއަން ކަމެއް ނުލިބެ އެވެ. ތަށި އުފުލާލުމުގެ ނަސީބެއް ނުލިބެ އެވެ. ލީޑަޝިޕް ހުންނަ ކޮންމެ މީހަކަށް ވެރިޔަކަށް ނުވެވެ އެވެ. ކޮންމެ ވިޔަފާރިވެރިއަކަށް މަހުޖަނަކަށް ނުވެ އެވެ.
އޮގަނައިޒޭޝަނެއްގައި ވެސް އެންމެން ތިބެނީ އެއް ހަމައެއްގައި އެއް ދަރަޖައެއްގައެއް ނޫނެވެ. ކޮންމެ ނިޢުމަތަކީ ވެސް މާތްﷲ ސުބުޙާނަހޫ ވަތަޢާލާ ދެއްވާ އެއްޗެއްކަން ހަނދުމަ ކުރާ މީހާ އެ ނިޢުމަތެއް ނުލިބިގެން ކަންބޮޑުވެ، ހާސްވެ، އެކަމެއް ލަސްވެގެން އަމިއްލަ އަތުން ފައިން ގޯހެއް ނުހަދާނެ އެވެ.
އޭނާ އަށް ޙަޤީޤީ ބާރުވެރި ފަރާތް ވިސްނޭނެއެވެ. އޭނާ، ސަބަބުގައި ހިފައިގެންހުރެ ދަންނަވާނީ އެފަރާތުގައެވެ. ވާގި ހޯދާނީ އެފަރާތުންނެވެ.
އޭނާ ޖަޒުބާތުތައް މައްޗަށް ބާރު ފޯރުވާ ނަފްސު ކޮންޓްރޯލް ކުރާނެ އެވެ. އެއް ދޮރު ބަންދުވާ އިރު އެހެން އެތައް ދޮރެއް ހުޅުވޭތަން ފެންނާނީ އެފަދަ މީހުންނަށެވެ. މި ދުނިޔޭގައި ބަދުނަސީބެކޭ ހީވާ އެތައް ކަމެއް އެއީ ތިމާގެ ނަސީބުކަން އެފަދަ މީހުންނަށް ތަޖުރިބާ ކުރެވޭނެ އެވެ.