ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު ހަސަން އާދިލާ ބެހޭ ގޮތުން މިއަދު ވަރަށް ޝައުގުވެރިކުރުވަނިވި ލިޔުމެއް އައްޑޫލައިވުން ފެނިއްޖެއެވެ. ހިތަށް އެރިއެވެ.
އޭގައި ފާހަގަކޮށްފައިވާ ބައެއް ނުގުތާތަކަށް އިތުރު އައްޔެއް އަޅުވައިލުން ކީއްހެއްޔެވެ. ހަމަޔަގީނުންވެސް އަޅުގަނޑަށްވުރެ ގާތުން އޭގެތެރެއިން ބައެއް ކަންތައް ފެނުނު އެހެން މީހަކު ހުރުމަކީ ވަރަށް ނާދިރު ކަމެކެވެ. އެހެންވީމާ އެކަންތަކާ ބެހޭ ގޮތުން ދެތިން އެއްޗެއް ދަންނަވާލަން ކަމަށެވެ. އިޒުނަ ދެއްވުން އެދެމެވެ.
އާދިލަކީ އަޅުގަނޑުގެ ވަރަށް ގާތް އެކުވެރިއެކެވެ. ސިޔާސީ ކަންތައްތަކާއި އެނޫންވެސް ބައެއް ކަންތައްތަކާއި ގުޅޭގޮތުން ބައެއްފަހަރު އަޅުގަނޑުމެން މަޝްވަރާވެސް ކުރަމެވެ. މިދެންނެވުނު އެކުވެރިކަމުގެ ސަބަބުން މަރަދޫ ދާއިރާގެ ގޮނޑިއަށް އާދިލު ހޮވުމުގައި އަޅުގަނޑަށް ވެވުނުވަރަކުން މަސައްކަތްތަކެއްވެސް ކޮށްދީފައިވާނެއެވެ. އަޅުގަނޑުގެ އެހީތެރިކަން އާދިލު ބޭނުންކުރައްވާފައިވަނީ މީޑިއާއާ ގުޅޭ ކަންތައްތަކުގައެވެ.
ދާއިރާގެ ބަހުސްގައި އާދިލު ޓީވީ ސްޓޫޑިއޯގެ ތެރެއަށް ވެއްޓުނު ވާހަކަ ނުވަތަ އަރިއަޅާލި ވާހަކައަކީ ވަރަށް މަޝްހޫރު ވާހަކައެކެވެ. އެއީ ނުހިނގާކަމަކޭ އަޅުގަނޑު ނުދަންނަވާނަމެވެ. އެންމެނަށްވެސް އެމަންޒަރު ފެނުނެވެ. އޭގެ ސަބަބު އާދިލާއި އޭނާގެ ޑޮކްޓަރު ވަނީ އެހެން ޓީވީއަކަށް އަރާވަޑައިގެން ވިދާޅުވެ ދެއްވައިފައެވެ. ޓީވީ ސްޓޫޑިއޯގެ ތެރެއަށް އާދިލު އަރިއަޅާލި ވަގުތުން ފެށިގެން އޭނާއާ އެންމެ ގާތުގައި ހުރީ އަޅުގަނޑެވެ. ބަހުސްގައި އިތުރަށް ބައިވެރިނުވުމަށް އާދިލަށް މަޝްވަރާ ދިނީ އަޅުގަނޑެވެ. އާދިލު ގޮވައިގެން ޓީވީން ނުކުތީ އަޅުގަނޑެވެ. ޑޮކްޓަރު ގެނައީވެސް އަޅުގަނޑެވެ. އާދިލުގެ ފްލެޓަށް އޭނާ ގެންގޮސްދިނީވެސް އަޅުގަނޑެވެ. އާދިލު ނިދުމާ ހަމައަށް ދުރުގައި ތިބި މީހުންނާ މުއާމަލާތު ކުރީ އަޅުގަނޑުގެ ފޯނުންނެވެ.
ޑޮކްޓަރު ބެއްލެވުމަށް ފަހު ދެއްވި މަޝްވަރާގެ މަތިން އާދިލް ބޭނުންވީ އަލުން ޓީވީ ޕްރޮގްރާމެއްގައި ބައިވެރިވެ އޭނާގެ ސިއްހީ ހާލަތާއިމެދު ވާހަކަ ދެއްކުމަށެވެ. އަދި މަރަދޫ ދާއިރާގެ ސިޔާސީ، އިޖުތިމާއީ އަދި އެނޫންވެސް ކަންތައްތަކާ މެދު ވާހަކަ ދެއްކުމަށެވެ. އެހެންވެ އަޅުގަނޑުމެން ދެމީހުން ސައްލާކޮށްފައި އާދިލަށް ޓީވީއަކުން ފުރުސަތުދީ އަދި އެޕްރޮގްރާމް ހުށައަޅައިދިނީވެސް އަޅުގަނޑެވެ. އެޕްރޮގްރާމުގައި އާދިލުގެ ޑޮކްޓަރުވެސް ބައިވެރިކުރީމެވެ. އެޕްރޮގްރާމުގައި އާދިލާއި އަޅުގަނޑާއި ޑޮކްޓަރު ބަރާބަރު އެއްގަޑިއިރަށް ވާހަކަ ދެއްކީމެވެ. އެއީ ލައިވް ޕްރޮގްރާމެކެވެ. ރެކޯޑިންއެއް ނޫނެވެ. އޭގައި ވަރަށް ތަފްސީލުކޮށް އާދިލަށް ޓީވީއެމްގެ ސްޓޫޑިއޯގައި އެދިމާވި ކަންތައް ކިޔައިދެވުނެވެ. އެއީ ވާހަކަ ދައްކަން ޖެހިގެން އެކަމާ ގަންނާކުރެއްވި ބިރެއްގެ ބޮޑުކަމުން ހޭނެތިގެން ވެއްޓުނު ވެއްޓުމެއް ނޫންކަން ސާބިތުކޮށްދެވުނެވެ.
ގައުމީ ޕާޓީގެ ޓިކެޓްގައި ވަރަށް ގިނަ ކެންޑިޑޭޓުން އެކިދާއިރާތަކަށް ކުރިމަތިލިއެވެ. ޑރ ހަސަން ސައީދުގެ އުފަން ދާއިރާ ކަމަށްވާ ފޭދޫ ދާއިރާއަށް ކުރިމަތިލީ އިމާދު ސޯލިހެވެ. ޑރ ޖަމީލުގެ އުފަން ދާއިރާކަމަށްވާ ފުވައްމުލަކު ދެކުނު ދާއިރާއަށް ކުރިމަތިލީ އޭނާގެ ކޮއްކޮއެއް ކަމަށްވާ މަލީހު ޖަމާލެވެ. އޭރު ގައުމީ ޕާޓީގެ ނާއިބު ރައީސް ޑރ އަހުމަދު ޝަހީދުގެ އުފަން ދާއިރާކަމަށްވާ މައްޗަންގޮޅީ ދެކުނު ދާއިރާއަށް ކުރިމަތިލީ އޭނާގެ އެއްބަނޑު އެއްބަފާ ބޭބެ މުހައްމަދު ޝަހީދެވެ. ގައުމީ ޕާޓީގެ އަމީންއާއްމު އަބްދުﷲ އަމީން އޭނާގެ އުފަން ދާއިރާކަމަށްވާ ގައްދޫ ދާއިރާއަށް ކުރިމަތިލިއެވެ. ގައުމީ ޕާޓީގެ ތާއީދާއެކު ސަންދާނު އަހައްމައިދީ އޭނާގެ އުފަން ހުޅުމީދޫ ދާއިރާއަށް ކުރިމަތިލިއެވެ. މީން އެކަކުވެސް ނުހޮވި ގައުމީ ޕާޓީގެ ކެންޑިޑޭޓުންގެ ތެރެއިން ގޮނޑި ކާމިޔާބު ކުރެވުނީ ވިލުފުށީ ދާއިރާއިން ރިޔާޒު ރަޝީދާއި މަރަދޫ ދާއިރާއިން ހަސަން އާދިލަށެވެ. މިދެމީހުންނަކީ ވެސް ވިޔަފާރިވެރިންނެވެ. ފައިސާ ހޭދަކުރި ތަނަވަސް މީހުންނެވެ. ޕާޓީގެ ހައިރާކީއާއި މަގާމުތަކާއި ޕާޓީގެ ނުފޫޒުން ވީކަމެއް ނުފެނުނެވެ. މިކަމުން ދޭހަވަނީ ގައުމީ ޕާޓީގެ މަގްބޫލުކަންތޯ ނުވަތަ މިމީހުންގެ އަމިއްލަ މަސައްކަތާއި ހޭދަތޯ އެއީ ކޮށްލުން އެންމެ ރަގަޅު ސުވާލެއް ކަމުގައި ފެނެއެވެ. ފަހަރުގައި އަޅުގަނޑުގެ ހީ ގޯސްހީއަކަށްވެސް ވެދާނެއެވެ. ގައުމީ ޕާޓީގެ ތާއީދު އެންމެ ބޮޑީ މަރަދޫ އާއި ވިލުފުށީގައި ކަމަށް ވެދާނެއެވެ.
އަޅުގަނޑުވެސް އެއްބަހެވެ. ޑރ ޖަމީލުގެ އަނބިކަނބަލުން ހައުލަތަކީ މަރަދޫފޭދޫގެ ބޭފުޅަކަށްވާތީ އެދާއިރާގައި ޑރ ޖަމީލަށް ކޮންމެވެސް ވަރެއް ކުރެވިދާނެއެވެ. އެކަމަކު އެއާއިލާގެ ތެރެއިން އަނީސް ކިޔާ ބެއިފުޅަކު އަމިއްލަ ގޮތުން ގޮނޑިއަށް ވާދަކުރެއްވިއެވެ. އާއިލާގެ ވޯޓާއި އާއިލާގެ ނުފޫޒު ފޯރާފައިވާ މީހުން ވޯޓުދިން ކަމަށް ފެނުނީ އަނީސަށެވެ. މީގެ ނުބައި އަސަރު ކުރީ ހަމައެކަނި އާދިލަކަށް ނޫނެވެ. އެމްޑީޕީގެ ޓިކެޓްގައި ވާދަކުރި ސޮލާހަށްވެސް އެއަސަރު ކުރިއެވެ. ހަމްޒާމެން އަލީ ޝިޔާމްމެން ކަހަލަ އެމްޑީޕީގެ ބޮޑުންގެ އެހީތެރިކަން ލިބި މަރަދޫފޭދޫން އެއާއިލާގެ ވޯޓު ސޮލާހަށް ލިބުނު ކަމުގައިވީނަމަ ގޮނޑީގައި އިށީންނާނީ ސޮލާހެވެ. އެއީ ޝައްކެއްވެސް އޮތް ކަމެއް ނޫނެވެ.
މަރަދޫ ދާއިރާއިން އާދިލަށް ލިބުނު ވޯޓު އަޅުގަނޑަށް ފެނުނީ އާދިލުގެ ލޮލުންނެވެ. އެލޮލުން ބެލިއިރު އެއީ ޕާޓީއަށް ލިބުނު ވޯޓެއް ނޫނެވެ. އެއީ ސީދާ އާދިލަށް ލިބުނު ވޯޓެވެ. އާދިލުގެ ތިމާގެ މީހުންނާއި އެކުވެރިންނާއި ސަޕޯޓްކުރާ މީހުން ވޯޓު ދިނީ އާދިލަށެވެ. ދެން އާދިލް ހޮވުމަށް މަގު ފަހިވި އަނެއްކަމަކީ ޑީއާރްޕީގެ ޓިކެޓްގައި ވާދަކުރި އިބްރާހިމް ޝަރީފްގެ ވޯޓު ބޭންކަށް އޭނާގެ ކޮއްކޮ ނަވާޒުގެ ސަބަބުން ކުރި އަސަރެވެ. ނަވާޒު ކުރިމަތިނުލިނަމަ ޝަރީފު ހޮވުން ވަރަށް ގާތެވެ. އަޅުގަނޑު ހިތުން މަރަދޫ ދާއިރާގެ ވޯޓު ދިޔަގޮތް ގާތުން ބެއްލެވި ކޮންމެ ބޭފުޅަކަށް މިހަގީގަތް އެނގިވަޑައިގަންނަވާނެއެވެ. އެއީ އަޅުގަނޑު ހީކުރާގޮތެވެ.
ރައްޔިތުންގެ މަޖިލީހުގައި އާދިލު ވާހަކަ ނުދައްކަވާނަމަ އޭނާ ވާހަކަ ދައްކަވާ ކަމަށް އަޅުގަނޑަކަށްވެސް ނެހެދޭނެއެވެ. ތެދެކެވެ. އެތާގައި އާދިލު ވާހަކައެއް ނުދައްކަވައެވެ. މަޖިލީހުގެ ތެރޭގައި އެއީ ހިމޭން މެންބަރެކެވެ. މިކަމާ އަޅުގަނޑުވެސް ކަންބޮޑުވެއެވެ. އެވާހަކަ އެތައްފަހަރަކު އާދިލުއާ ދައްކައިފީމެވެ. އަޅުގަނޑުވެސް މިހުންނަނީ އާދިލު ވާހަކަ ދައްކަވާނެ ދުވަހެއްގެ އިންތިޒާރީގައެވެ. އެދުވަހެއް އަދިނާދެއެވެ. އެދުވަސްނައިސް އޮވެ މަޖިލީހުގެ ދައުރުވެސް ނިމެނީއެވެ. އާދިލު އަޅުގަނޑާ ދައްކަވާ ވާހަކަތަކުން ގަބޫލު ކުރެވެނީ މަރަދޫ ދާއިރާގެ ގޮނޑިއަށް އަދިވެސް ކުރިމަތިލުމުގެ ޚިޔާލު ކުރައްވާކަމެވެ. ކުރިއަށް އޮތް ދައުރުގައި މަރަދޫ ދާއިރާ ތަމްސީލުކުރުމަށް އާދިލު ކުރިމަތިލައިފިނަމަ އޭނާއަށް އެފުރުސަތު އަލުން ދޭނެތޯ ނުވަތަ ނޫންތޯ ކަނޑައަޅާނީ އެދާއިރާގެ ރައްޔިތުންނެވެ. އޭގެތެރޭގައި އަޅުގަނޑެއް ނުހިމެނެއެވެ.
އާދިލުގެ މައްޗަށް މިދޭތެރެއަކުން ކުށެއްގެ ތުހުމަތު ކުރެވި ބަންދެއްގައި ހުންނާންޖެހި ބަދުނާމުވެފައިވެއެވެ. ޝަރީއަތުގެ މަޖިލީހުން ނިންމާފައިވަނީ އެއީ ސާބިތުނުވާ މައްސަލައެއްގެ ގޮތުގައެވެ. ޝަރީއަތުން އެގޮތަށް ނިންމީމާ އާދިލު އެހުންނެވީ މައްސަލައިން ބަރީއަވެ ސާފުވެފައެވެ. ޝަރީއަތުން ވަކިގޮތަކަށް ނިންމީމާ އަޅުގަނޑުމެންނަށް އޮތީ އެގޮތް ގަބޫލުކުރުމެވެ. އެގޮތް ގަބޫލުކުރިއަސް އާދިލުގެ މައްޗަށް ތުހުމަތެއް ނުކުރެވޭ ކަމަކަށް ނުވާނެއެވެ. އެކަމުގެ ސަބަބުން އޭނާގެ ފަސްބައިގައި ލައްގަނޑެއް ނުޖެހޭ ކަމަކަށްވެސް ނުވާނެއެވެ. އެކަމަށް އަޅުގަނޑު އިންކާރެއް ނުކުރަމެވެ. އެކަމަކު އާދިލުގެ އެތެރެއާއި ބޭރުވެސް ނިކަން ރަނގަޅަށް އެނގޭ މީހެއްގެ ގޮތުގައި އަޅުގަނޑަށް ދަންނަވަން ޖެހެނީ އާދިލުގެ މައްޗަށް އެކުރެވުނު ތުހުމަތަކީ އާދިލު ކުރައްވަފާނެ ކަމެއް ކަމަށް އަޅުގަނޑު ގަބޫލުނުކުރާ ކަންތަކެއް ކަމަށެވެ. މިޒަމާނުގެ ބަހުރުވަޔަކުން ދަންނަވާނަމަ އެއީ އާދިލު ކުރައްވަފާނެ ކަމަށް ހަމަ ހީވެސްނުވާ ޒާތުގެ ކަމެކެވެ.