ބޮލީވުޑްގެ މަޝްހޫރު ބަތަލާ އައިޝްވާރިއާ ރާއީ ބައްޗަން (އޭޝް) އެނބުރި ބޮޑު ސްކްރީނަށް އައުމާ ބެހޭ ގޮތުން ތަފާތު ގޮތްގޮތަށް ވާހަކަ ދެކެވޭތާ ލައްކަ ދުވަސްވެއްޖެ އެވެ.
އޭނާ އެނބުރި އަންނާނީ ކޮން ޑައިރެެކްޓަރެއްގެ ފިލްމަކުން ކަމެއްް މިހާތަނަށް ކަށަވަރުވާ ހިސާބަކަށް އާދެވޭ ވަރެއް ނުވެ އެވެ. އެއް އަ ފަހަރު ސަންޖޭ ލީލާ ބަންސާލީގެ ފިލްމަކުން އޭޝް އަންނާނެ ވާހަކަ އިވޭ އިރު، ދެން އިވެނީ މަނީ ރަތުނަމްގެ ފިލްމަކުން އެކްޓިން އަށް އަލުން އޭޝް ނިކުންނަ ވާހަކަ އެވެ.
ހަމަ މިއާ އެކު މަޝްހޫރު އެޑް ފިލްމޭކަރު ޕްރަހާދް ކައްކަރުގެ ފުރަތަމަ ޑައިރެކްޝަން "ހެޕީ އެނިވާސަރީ" އިން ފިރިމީހާ އަބިޝެކް ބައްޗަން އާ އެކު އޭޝް ސްކްރީނަށް އަންނަން ތައްޔާރުވި ވާހަކައަކީ ވެސް ހޫނު ވާހަކައެކެވެ.
އެކަމަކު މިއިން އެއްވެސް ފަހަރެއްގައި އެއްވެސް ފިލްމަކަށް ސޮއި ކުރި ވާހަކައެއް އޭޝް ނުބުނެ އެވެ. އެހެންވެ އޭނާ އެނބުރި ސްކްރީނާ އަންނާނީ ސީދާ ކޮން އިރަކު، ކޮން ފިލްމަކުން ކަމެއް އޮތީ ނޭނގުމެއްގެ ތެެރޭގަ އެވެ.
އެެކަމަކު އޭޝްގެ ފޭނުން ތިބީ އޭނާ އަލުން ސްކްރީނަށް އަންނާނެ ވަގުތެއްގެ އިންތިޒާރުގަ އެވެ. އެކަން މިހާރު މާ ލަސްވެސްވެއްޖެ ކަމަށް ބައެއް ސަޕޯޓަރުން ބުނަމުން ދެ އެވެ.
އަބިޝެކް އާ ކައިވެނިކޮށް އޭޝް އަށް ވަނީ 2011 ވަނަ އަހަރު ކުއްޖެއް ލިބިފަ އެވެ. އެ ހިސާބުން އޭނާގެ ފިލްމީ ކެރިއަރުގައި ވަނީ ބުރަކި ޖެހިފަ އެވެ. އަނެެއްކޮޅުން ބަލިވެ އިނދެ ވިހޭ ފަހުން ވެސް ގިނަ ދުވަސްތަކެއްވީ އިރު ވެސް، އޭޝްގެ ހަށިގަނޑު ފިޓްވާ ވަރެއް ނުވެ އެވެ. އޭނާ ފަލަކަމުން ބައެއް ފަރާތްތަކުގެ ފާޑު ކިއުންތައް ވެސް އަމާޒުވެފައިވެ އެވެ.
އެހެން ނަމަވެސް މިހާރު އޭޝް ވަނީ އޭނާގެ ހަށިގަނޑު ވަރަށް ބޮޑަށް ހިއްކާލައިފަ އެވެ. މިދިޔަ ހަފުތާގެ ތެރޭގައި ނިންމާލި ކާން ފިލްމް ފެސްޓިވަލްގެ ރެޑްކާޕެޓް މަތިން އޭޝް ވަނީ އެކަން ދައްކާލައިފަ އެވެ.
މިއީ އެނބުރި އޭނާ ސްކްރީނަށް އައުމުގެ ތައްޔާރީތައް ކަމަށް މި ސަބަބާ ހެދި ގިނަ ބަޔަކު ގަބޫލް ކުރެ އެވެ. ހަމަ މިއާ އެކު މިހާރު އެންމެ ހޫނު ވާހަކައަކީ ގޭންގްސްޓާރުްނގެ ފިލްމުތައް ހަދަން މަޝްހޫރު ސަންޖޭ ގުޕްތާގެ ފިލްމަކަށް އޭޝް ސޮއި ކުރި ވާހަކަ އެވެ.
އެކަން ސަންޖޭ ވަނީ ކަށަވަރު ވެސް ކޮށް ދީފަ އެވެ. އެހެންވެ އޭޝް އެނބުރި އަންނާނީ ސަންޖޭގެ ފިލްމުން ކަމަށް ވަރަށް ބޮޑަށް ބެލެވެ އެވެ. އަދި މިއީ ސަންޖޭގެ ފިލްމެއްގައި އޭޝް މަސައްކަތް ކުރާ ފުރަތަމަ ފަހަރަށް ވެސް ވެގެން ދާނެ އެވެ.
އެ ފިލްމަކީ "ޖަޒްބާ" އެވެ. އޭޝް ފެނިގެން ދާނީ އެކްޝަން ރޯލަކުން ކަމަށް އަޑު ފެތުރިފައިވެ އެވެ.
އެކަމަކު މި ފިލްމާ ބެހޭ މާ ބޮޑު ތަފުސީލެއް އަދި އެއްވެސް ފަރާތަކުން މިހާތަނަށް ހާމަކޮށްފައެއް ނުވެ އެވެ. ވާގޮތެއް ބަލަން ނޫން ތިބުން ގޮތެއް ފޭނުންނަކަށް ނެތެވެ. އިންތިޒާރު ކުރަމާ ހިނގާށެވެ.
އޭޝް އެންމެ ފަހުން ކުޅުނު ފިލްމަކީ ބަންސާލީގެ "ގުޒާރިޝް" އެވެ. އެއީ 2010 ވަނަ އަހަރު އެވެ.