މަރަދޫގައި އަޅާ ފުޓްސަލް ދަނޑު ތައްޔާރު ކުރުމުގެ އަމަލީ މަސައްކަތް ފަށައިފި އެވެ.
ސަރުކާރުން ކުރިއަށް ގެންދާ ސްޕޯޓްސް އެރީނާ ޕްރޮޖެކްޓްގެ ދަށުން މަރަދޫގައި އަޅާ ފުޓްސަލް ދަނޑުގެ މަސައްކަތް ކުރަނީ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) އިންނެވެ.
އެ ކުންފުނިން އައްޑޫގެ ހަތަރު ރަށެއްގައި ފުޓްސަލް ދަނޑު އަޅާނެ އެވެ. އެއީ ކޮންޓްރެކްޓެއްގެ ދަށުންނެވެ.
އެމްއާރްޑީސީން އައްޑޫގައި ފުޓްސަލް ދަނޑު އަޅަނީ މަރަދޫ، ހިތަދޫ، ހުޅުދޫ އަދި މީދޫގަ އެވެ.
މަރަދޫ ފުޓްސަލް ދަނޑު އަޅަނީ އެ ރަށު ކުޑަކުދިންގެ ޕާކްތެރޭގައި އޮންނަ ބަށި ކޯޓާ ދިމާލުގަ އެވެ. މި ދަނޑުގެ އަމަލީ މަސައްކަތް ފެށުމުގައި މަރަދޫ ދާއިރާގެ ކައުންސިލަރު އަދި އައްޑޫ ޑެޕިއުޓީ މޭޔަރު އަބްދުﷲ ތޮއްޔިބް (ޓޮމް) ބައިވެރިވެވަޑައިގެންނެވި އެވެ.
އެމްއާރްޑީސީން ބުނީ ހަތަރު ރަށުގައި އަޅާ ފުޓްސަލް ދަނޑުގެ މަސައްކަތް 90 ދުވަހުގެ ތެރޭގައި ނިންމައި، ޔޫތު މިނިސްޓްރީ އާ ހަވާލު ކުރާނެ ކަމަށެވެ.