ވިދިޔާ ބާލަންގެ ކުރިއަށް އޮތް ފިލްމުގައި އޭނާ ވަރަށް ގިނަ ގޮތްގޮތަށް، ވަރަށް ގިނަ ސިފަސިފައިގައި ފެނިގެން ދާނެ އެވެ.
އެ ފިލްމަކީ ޖުލައި 4 ވަނަ ދުވަހު ރިލީޒް ކުރަން ހަމަޖެހިފައިވާ "ބޮބީ ޖާސޫސް" އެވެ. މި ފިލްމުގައި ވިދިޔާ އާ އެކު އަލީ ފައިޒަލް އަރުޖުން ބަޖްވާ، ޒަރީނާ ވައްހާބް އަދި ކިރަން ކުމާރު ފަދަ ތަރިން ފެނިގެން ދާނެ އެވެ.
"ބޮބީ ޖާސޫސް" އަކީ ކުރީގެ ބަތަލާ ދިއާ މިރްޒާ އާއި އޭނާގެ ލޯބިވެރިޔާ ސާހިލް ސަންގާގެ ޕްރޮޑަކްޝަން ހައުސް ބޯން ފްރީ އެންޓަޓައިންމަންޓާއި ރިލައަންސް އެންޓަޓައިންމަންޓް ގުޅިގެން އުފައްދާފައިވާ ފިލްމެކެވެ.
މި ފިލްމް ޑައިރެކްޓްކޮށްފައި ވަނީ އަލަށް ޑައިރެކްޝަނަށް ނިކުތް ސަމަރު ޝެއިހް އެވެ.
"ބޮބީ ޖާސޫސް" އަކީ މިދިޔަ އަހަރު ނިކުތް "ގަންޗައްކަރު" އަށް ފަހު، ބެލުންތެރިންނާ ހަމައަށް އަންނަ ވިދިޔާގެ ފުރަތަމަ ފިލްމެވެ.
އެހެންވެ މި ފިލްމަކީ ވިދިޔާގެ ވަރަށް ކާމިޔާބު ދެ ފިލްމް ކަމަށްވާ "ދި ޑާޓީ ޕިކްޗާސް" އާއި "ކަހާނީ" ފަދަ މޮޅު ފިލްމަކަށް ވާނެ ކަމަށް ގިނަ ބަޔަކު ގަބޫލް ކުރެ އެވެ.
"ބޮބީ ޖާސޫސް" ގެ ފުރަތަމަ ޓްރެއިލާ އާއި ޕޯސްޓަރު ވެސް މިހާރު ވަނީ އާންމުކޮށްފަ އެވެ.