މޯލްޑިވިއަން ޑިމޮކްރަޓިކް ޕާޓީ، އެމްޑީޕީގެ ރިޔާސީ ޕްރައިމަރީގައި ވާދަކުރައްވާ އެޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ކ. އަދި ޅ. އަތޮޅަށް ކެމްޕޭނަށް ފުރާވަޑައިގެންފިއެވެ.
ރިޔާސީ ޕްރައިމަރީގެ ކެމްޕޭނުގައި ރައީސް ނަޝީދު ޅ. އަދި ކ. އަތޮޅުގެ ރަށްތަކަށް ފުރާވަޑައިގެންއިރު، އެމަނިކުފާނު މިފަހުން ވަނީ ލ، ތ އަދި މ. އަތޮޅުގެ ރަށްތަކަށް ވަޑައިގެންފައެވެ.
17 އަދި 18 ވަނަ ދުވަހު ކެމްޕޭނުގައި ޅ. އަދި ކ. އަތޮޅުގެ ރަށްތަކަށް ރައީސް ނަޝީދު ވަޑައިގަންނަވާއިރު، މިމަހު 19 ވަނަ ދުވަހުން 21 ވަނަ ދުވަހުގެ ނިޔަލަށް ރައީސް ނަޝީދު ކެމްޕޭނުގައި އުޅުއްވާނީ ހުވަދުއަތޮޅުގައެވެ.
ޕްރައިމަރީގެ ކެމްޕޭން ފޯރި ގަދަވެފައިވާއިރު ރައީސް ނަޝީދާ ވާދަކުރައްވާ ރައީސް އިބްރާހިމް މުހައްމަދު ސޯލިހް ވެސް ގެންދަވަނީ ފޯރީގައި ކެމްޕޭން ހަރަކާތްތައް ކުރިއަށް ގެންދަމުންނެވެ.
އެމްޑީޕީ ރިޔާސީ ޕްރައިމަރީގެ ވޯޓުލުން ބޭއްވުމަށް ހަމަޖެހިފައިވަނީ ޖެނުއަރީ 28 ވަނަ ދުވަހުއެވެ.