އައްޑޫގެ ގުޅިފައިވާ ރަށްތަކުގެ ތެރެއިން މަރަދޫފޭދޫ ވަނީ އިދާރީ ގޮތުން ބޮޑު އޮޅުން ބޮޅުން ގަޑެއްގެ ތެރޭގަ އެވެ. އެރަށުގެ ކަންކަން ސަރުކާރާއި ކައުންސިލުން ކުރުމުގައި ބޮޑެތި އިހްމާލުވުން ތެކެއް ހުރި ކަމަށް ރައްޔިތުން ދަނީ ބުނަމުންނެވެ.
ލޯކަލް ކައުންސިލް އިންތިހާބްގައި މަަރަދޫފޭދޫ ރައްޔިތުން ވޯޓުލާފައިވަނީ މަރަދޫ. މަރަދޫފޭދޫ ދާއިރާއަށް މެމްބަރަކު ހޮވުމަށެވެ. އެގޮތުން ވޯޓަށް ކުރިމަތިލައި ކައުންސިލަށް ހޮވިވަޑައިގަތީ ކުރިންވެސް އެދާއިރާ ތަމްސީލް ކުރެއްވި އަބްދުﷲ ޠޮއްޔިބް (ޓޮމް) އެވެ.
ނަމަވެސް އޭގެ ފަހުން ބޭއްވި މަޖްލިސް އިންތުހާބްގައި މަރަދޫފޭދޭ ރައްޔިތުން ވޯޓުދޭން ޖެހުނީ މަރަދޫފޭދު އާއި މީދޫ އެއްކޮށްލައި ހެދި މީދޫ ދާއިރާއަށެވެ. އެ ދާއިރާ އަށް ހޮވިވަޑައިގަތީ ކުރިން ތުލުސްދޫ ދާއިރާގެ މެމްބަރުކަން ކުރެއްވި ރޮޒެއިނާ އާދަމެވެ.
މަރަދޫފޭދޫ ޒުވާނަކު ބުނީ އިދާރީ ގޮތުން މަރަދޫފޭދޫގެ ކަންކަން ހުރިގޮތުން ރައްޔިތުންނަށް ލިބެން ޖެހޭ ހިދްމަތް ހޯދުގައި ދަތި ކަމެއް ހުރިކަމަށެވެ. އެގޮތުން އޭނާ އެންމެ ބޮޑަށް ފާހަނގަ ކުރީ ސަރުކާރުން ހަދަން ނިންމާފައިވާ ސްޕޯޓްސް އެރީނާތަކެވެ.
"އަޅުގަނޑުމެންނަށް އެބަ އިވޭ ސަރުކާރުން މަރަދޫ ފޭދޫ ފިޔަވައި ދެންތިބި ރަށްތަކުގައި ފުޓްސަލް ދަނޑު ހަދާވާހަކަ، އެކަމަކު މަރަދޫފޭދޫގެ ނަމެއް ނެތް. މިރަށުގެ ޒުވާނުން ކުޅޭނެ ދަނޑެއް ނެހެދިގެން އުޅޭތާ އަހަރު ދުވަސް ވެއްޖެ"
މަރަދޫފޭދޫ ފުޓްބޯޅަ ދަނޑު ބޮޑު ބައެއް ލަންކާ ސަރުކާރުގެ ހިލޭ އެހީގެ ދަށުން ބޮޑު މަގު ހެދިއިރު ވަނީ ނަގާފައެވެ. އަދި އޭގެ ފަހުން ދަނޑު ހެދުމަށް ކައުންސިލުން އިއްލާން ކޮށްފައިވާ އިރު ދަނޑު ކުރިން އޮތް މިންވަރަށް ހަދައި ދިނުމަށް ޒުވާނުން ދިޔައީ ކައުންސިލްގައި އެދެމުންނެވެ.
ނަމަވެސް ބިމުގެ ޖާގައިގެ ދަތިކަމާއި ހެދި އެގޮތަށް އެކަން ކުރެވެން ނެތްކަމަށް ކައުންސިލުން ވަނީ ބުނެފައެވެ.
ފުޓްސަލް ދަނޑުތައް ސަރުކާރުން އައްޑޫގެ ރަށްތަކުގައި ހަދަން އިއްލާން ކުރި އިރު މަރަދޫފޭދޫ އޭގެ ތެރޭގައި ނުހިމެނި އޮތީ ކީއްވެ ހެއްޔެވެ؟ މީގެ ޖަވާބެއް އަދި ނެތެވެ.
"އަޅުގަނޑުމެންނަށް ކަމެއް ކުރެވޭނީ ކިހިނެއް. އެއްކޮޅުން މިއޮތީ މަރަދޫ އާއި ގުޅުވާފައި. އަނެއް ކޮޅުން މީދޫއާއި ގުޅުވާގައި މެމްބަރާއި ކައުންސިލަރަކީ ދެ ދާއިރާއަކަށް ނިސްބަތްވާ މީހުން، މަރަދޫފޭދޫގެ ފަރާތުން ވަކާލާތު ކުރާނެ މީހެއް ނެތް"
އެޒުވާނާ ބުނީ މަރަދޫފޭދޫއަށް ކަންކަން ނުވާ ވަރު އެރަށުގެ ބަނދަރުމަތިން ފެންނަން ހުންނާނެކަމަށެވެ. މަރަދޫފޭދޫ ބަނދަރުގެ ތޮޅިގަނޑު ހަލާކުވެފައި އޮންނަތާ އަހަރުތަކެއް ވެއްޖެއެވެ. އެކަމަކު އެކަން ހައްލު ކުރެވިފައި ނުވެ އެވެ.
މަރަދޫ/މަރަދޫފޭދޫ ދާއިރާގެ ކައުންސިލަރު ޓޮމް މީގެ ކުރިން "އައްޑޫ ލައިވް" އަށް ދެއްވި އިންޓަވިއުއެއްގައި ވިދާޅުވީ ނިމިގެން ދިޔަ ދައުރު ނިމުމުގެ ކުރިން މަރަދޫފޭދޫ ބޯޅަދަނޑު ނިންމާދޭނެ ކަމަށެވެ.
އަދި މަރަދޫފޭދޫ ބަނދަރުގެ މަސައްކަތް ކުރިއަށް ނުގޮސް އޮތީ ނަށީދުގެ ސަރުކާރުން އެބަނދަރު ބޭނުން ނުކުރާ ގޮތަށް ނިންމަވައި އެތަނުގައި "އާޓިފިޝަލް ބީޗެއް" ހެދުމުގެ ވިސްނުން ހުރެގެންކަމަށެވެ.
މަރަދޫފޭދޫ ރައްޔިތުން ދެކޭ ގޮތުގައި އެރަށް އޮތީ ސިޔާސީ ގޮތުން" އެކަހެރިކޮށްލާފައެވެ" ހިދްމަތް ދިނުމަގައި ވަނީ "ބާކީ" ކޮށްފައެވެ. އެމީހުންގެ ނަމުގައި ވަކާލާތު ކުރާނެ މީހަކު ނެތްކަމަށެވެ.
"އަފިންނަށް ތެބެ ފެނެއި މަރަދު ތޮށިގަނޑަ. އެރަށި ބަނދަރަ އޮތްލެއް. އެކަމަކި މަރަދޫފޭދޫއަކަށް ނެތް އެއްކަމަސް" އުމުރުން ދުވަސްވީ މަރަދޫފޭދޫ މީހަކު ބުންޏެވެ.
އައްޑޫ ސިޓީ ކައުންސިލުން މީގެ ކުރިން ވަނީ އައްޑޫގައި އޮންނާނީ ހަތަރު އަވަށް ކަމަށް ހަމަޖެއްސައި މަރަދޫ އާއި މަރަދޫފޭދޫ އެއްކޮށްލައި އެއީ މަރަދޫ އަވަށް ކަމަށް ކަނޑައަޅައި ލޯކަލް ގަވަމެންޓް އޮތޯރިޓީ (އެލްޖީއޭ)އަށް ހުށަގަޅާފައެވެ.
ނަމަވެސް މަރަދޫފޭދޫ ރައްޔިތުންގެ ރަށްވެހިކަން ގެއްލޭ ކަމަށް ބުނެ މަރަދޫފޭދޫ ކޯޓަށް އެރަށު ބަގީޗާގޭ އަބްދުﷲ ރަޝީދު ވަނީ ކައުންސިލްގެ މައްޗަށް ދައުވާކޮށްފައެވެ.
މިދައުވާއާއި ގުޅިގެން މަރަދޫފޭދޫ ކޯޓުގެ މެޖިސްޓްރޭޓް އަލީ ޒާހިރު ނެރުއްވި ހުކުމުގައި ބުނެފައި ވަނީ އެ މައްސަލާގެ ޝަރީއަތުގައި ބެލިބެލުމުން އައްޑު އަތޮޅު މަރަދޫފޭދޫގެ މާދަރީ ނަން އައްޑޫ ސިޓީ ކައުންސިލުން ބަދަލުކޮށްފައިވާކަން ޝަރީއަތުން ސާބިތުވާ ކަމަށާއި އައްޑު އަތޮޅު މަރަދޫފޭދުއަކީ އެ އަތޮޅު މަރަދޫގެ ސަރަހައްދެއް ކަމަށް ނިންމި ނިންމުމަކީ ބާތިލް ނިންމުމެއް ކަމަށް ކަނޑައަޅާ ކަމަށެވެ.