ރައްޔިތުންގެ މަޖިލީހުގެ ސ. މަރަދޫ ދާއިރާގެ ކުރީގެ މެމްބަރު ހަސަން އާދިލް ކުޑަކުއްޖަކާ ޖިންސީ އަމަލު ހިންގި ކަމަށް ބުނެ ދައުލަތުން ކުރި ދައުވާ ސާބިތު ނުވާ ކަމަށް ކްރިމިނަލް ކޯޓުން ކުރި ހުކުމަށް ހައި ކޯޓުން ވެސް ތާއިދުކޮށްފި އެވެ.
ހައި ކޯޓުން މި މައްސަލާގައި، ކްރިމިނަލް ކޯޓުން ކުރި ހުކުމަށް ތާއީދު ކުރީ މިއަދެވެ.
އާދިލުގެ މައްޗަށް ކުށް ސާބިތު ނުވާ ކަމަށް ކްރިމިނަލް ކޯޓުން ހުކުމް ކުރީ މާޗް 29، 2013 ގަ އެވެ. އޭގެ ފަހުން ޕޮރްސެކިއުޓާ ޖެނަރަލް (ޕީޖީ) އޮފީހުން ވަނީ އެ މައްސަލަ ހައި ކޯޓުގައި އިސްތިއުނާފުކޮށްފަ އެވެ.
އާދިލުގެ މައްޗަށް އެ ދައުވާ އުފުލީ 2010 ވަނަ އަހަރުގެ ޑިސެމްބަރު މަހުން ފެށިގެން އެކި ދުވަސް މަތިން 13 އަހަރުގެ ކުޑަ އަންހެން ކުއްޖަކާ ޖިންސީ އަމަލު ހިންގާފައިވާ ކަމަށް ތުހުމަތުކޮށެވެ.
ކްރިމިނަލް ކޯޓުން ކުރި ހުކުމްގައި ބުނެފައި ވަނީ ދައުވާގައި ބުނެފައިވާ 13 އަހަރުގެ ކުއްޖާ އާ އާދިލް ޖިންސީ އަމަލު ހިންގިކަން ސާބިތު ކުރުމަށްޓަކައި އެކަށީގެންވާ މިންވަރަށް ދައުލަތުން ހެކި ހުށަހަޅާފައި ނުވާ ކަމަށެވެ.
މިއަދު ހުވާ ކުރި 18 ވަނަ ރައްޔިތުންގެ މަޖިލީހަށް ވެސް، ހަމަ މަރަދޫ ދާއިރާ އަށް އާދިލް ޖުމްހޫރީ ޕާޓީގެ ކެންޑިޑޭޓެއްގެ ގޮތުގައި ވާދަ ކުރެއްވި އެވެ. އެކަމަކު އޭނާ އަށް ކާމިޔާބު ކުރެއްވޭ ގޮތެއް ނުވި އެވެ.