ސ. ގަމާއި ފޭދު އާ ގުޅޭ ކޯޒްވޭ ހިސާބުގައި ބަހައްޓާފައި ހުންނަ ދޮންދީނި މޮނިއުމަންޓަކީ ބުދެއް ކަމަށާއި އޭތި ވީހާ ވެސް އަވަހަކަށް ނަގަން ޖެހޭ ކަމަށް ބުނެ ބައެއް ފަރާތަތަކުން ކަންބޮޑުވުން ފާޅު ކުރަން ފަށައިފި އެވެ.
ދޮންދީނި މޮނިއުމަންޓަކީ 2011 ވަނަ އަހަރު އައްޑޫގައި ބޭއްވި 17 ވަނަ ސާކް ސަމިޓާ ގުޅުވައިގެން ބެހެއްޓި މޮނިއުމަންޓެކެވެ.
އެ މޮނިއުމަންޓާ އެކު ސާކްގެ އަށް ގައުމު ރަމްޒުކޮށްދޭ ގޮތަށް އައްޑޫގައި ބެހެއްޓި މޮނިއުމަންޓްތަކާ އެކު ބޮޑެތި މައްސަލަތަކެއް ފެންމެތިވެގެން ދިޔަ އެވެ.
އެގޮތުން އެ މޮނިއުމަންޓްތަކަކީ އިސްލާމް ދީނާ ހިލާފް ޝިއާރުތައް ރަމްޒުކޮށްދޭ، ރާއްޖޭގެ މާހައުލާ ވެސް ނުގުޅޭ ވަކި މަންފާއެއް ހާސިލް ކުރަން ބެހެއްޓި މޮނިއުމަންޓްތަކެއް ކަމަށް ބުނެ ގިނަ ފަރާތްތަކަކު މައްސަލަ ޖައްސާފައިވެ އެވެ. އޭގެ ތެރޭގައި ރާއްޖޭގެ ދީނީ އިލްމުވެރިން ވެސް ހިމެނެ އެވެ.
މޮނިއުމަންޓްތައް ބެހެއްްޓި މައްސަލާގައި ބައެއް ފަރާތްތަކުން ރުޅި ގަދަވެ، ބައެއް މޮނިއުމަންްޓްތަކަށް ކަޅުތެޔޮ ޖަހައި، އަންދާލައި އަދި ބައެއް މޮނިއުމަންޓްތައް ވަގަށް ވެސް ނަގާފައިވެ އެވެ.
މި މައްސަލަ ފަހުން ހޫނުވުމުން އައްޑޫ ސިޓީ ކައުންސިލުން ފަހުން ވަނީ ރަސްމީކޮށް މޮނިއުމަންޓްތައް ނަގައިފަ އެވެ. އެކަމަކު އެ މޮނިއުމަންޓްތައް ބެހެއްޓި ބުޑުތައް އަދިވެސް އެބަ ހުއްޓެވެ.
އޭއެފްސީ ޗެލެންޖް ކަޕްގެ ގްރޫޕް ބީގެ މެޗްތަަކަށް އައްޑު ސްޓޭޑިއަމް ސަރަހައްދު ޒީނަތްތެރި ކުރި އިރު، އެ ދިމާލުގައި ބެހެއްޓި ބަންގްލަދޭޝް މޮނިއުމަންޓްގެ ބުޑް ވެސް ރީތިކޮށްފައިވެ އެވެ.
އެހެން ނަމަވެސް އެ ބުޑުތަކަކީ ވެސް ބަހައްޓަން ޖެހޭނެ އެއްޗެއް ނޫން ކަމަށާއި މޮނިއުމަންޓްތައް ވުޖޫދުން ނައްތާލި ކަމަށްވާނީ، ބުޑުތައް ވެސް ނައްތާލައިގެން ކަމަށް، މޮނިއުމަންޓްގެ މައްސަލާގައި ކަންބޮޑުވާ ފަރާތްތަކުން ބުނެ އެވެ.
"އަޅުގަނޑު ދެކޭ ގޮތުގައި ދޮންދީނި މޮނިއުމަންޓޭ ކިޔާފައި ބަހައްޓާފައި އެހެރަ ބުދު ވީހާ ވެސް އަވަހަކަށް ނަގަން ޖެހޭނެ. އެއީ އިސްލާމް ދީނާ ހިލާފު އެއްޗެއް. އެެއީ ދޮންދީންޏެއް ނޫން. އެ ދޮންދީނި ހުންނަނީ އެ ސައިޒުގައި އެ ކުލައިގަތަ؟" ބިޔަކޮށް ހަދާފައި ހުރި، ރިހި ކުލައިގެ ދޮންދީނި މޮނިއުމަންޓާ ބެހޭ ގޮތުން "އައްޑޫ ލައިވް" އާ ވާހަކަ ދެއްކި ފޭދޫ ދުވަސްވީ މީހަކު ބުންޏެވެ. "އެކަހަލަ އެއްޗެއްހި ބަހައްޓައިގެން މިތަނަކަށް ރަހުމަތުގެ މަލާއިކަތުން ވެސް ވަޑައެއް ނުގަންނަވާނެ. އެހެންވެ ވީހާ ވެސް އަވަހަކަށް އެ މޮނިއުމަންޓް ނެގުމަށް ގޮވާލަން."
އޭނާ އިތުރަށް ބުނީ ދޮންދީނި މޮނިއުމަންޓަކީ، އައްޑޫގައި ބެހެއްޓި އެހެން މޮނިއުމަންޓްތަކެކޭ އެއްގޮތަށް ނަގަން ޖެހޭ އެއްޗެއް ކަމަށް ކުރިން ވެސް ނިންމާފައިވާ ކަމަށެވެ.
"އެހެންވެ ކައުންސިލުން ވެސް ފޭދޫ އަވަށު އޮފީހުން ވެސް އޭތި ބަހައްޓައިގެން ނުވާނެ. މިކަން އަދިވެސް އަވަށު އޮފީހުގެ ސަމާލު ކަމަށް ގެންނާނަން. މީގެ ކުރިން ވެސް މި ވާހަކަ އެތައް ފަހަރެއްގެ މަތިން އޮފީހާ ހަމައަށް ގެންދެވިއްޖެ. އެކަމަކު އެ ތަނުން މިކަމަކަށް މާ ބޮޑު ސަމާލު ކަމެއް ދީފައެއް ނެތް،" އޭނާ ބުންޏެވެ. "ކައުންސިލާއި އަވަށު އޮފީހުގައި އެދިގެން އެ ނުގައިފި ކަމަށް ވަންޏާ އެ ހުޅުވަން ޖަހާ ތަން ފެނިގެން ހިނގައިދާނެ."
ދޮންދީނި މޮނިއުމަންޓަކީ ޑިޖިޓަލް މީޑިއާ ސެންޓަރާ ހަވާލުކޮށްގެން ހެދި އެއްޗެކެވެ. އެއަަށް 508،860ރ. ހަރަދުކޮށްފައިވެ އެވެ.