އެންވައިރަމެންޓް މިނިސްޓްރީގެ ނައިބްއަކަށް ހުންނެވި ސ.ހިތަދޫ މުދިންގެ، އަޠްހަރު ހަލީމް މަގާމުން ވަކޮށްފި އެވެ.
އަޠްހަރު މަގާމުން ވަކިކޮށްފައި ވަނީ ޕީޕީއެމް އާއި ޖުމްހުރީ ޕާޓީ އާ އެކު ހަދާފައިވާ ކޯލިޝަން އެއްބަސްވުން އުވާލައި ޖުމްހުރީ ޕާޓީއަށް ސަރުކާރުން ދީފައިވާ މަގާމުތައް އަތުލުމުންނެވެ.
އަޠްހަރަކީ ޖުމްހުރީ ޕާޓީގެ އިސް ބޭފުޅެއްގެ ގޮތުގައި ހުންނަވައިގެން އެޕާޓީގެ ލީޑަރު ގާސިމް އިބްރާހިމް ހޮއްވުމަށް ބުރަކޮށް ކެމްޕެއިން ކުރެއްވި ބޭފުޅެކެވެ. އަދި ކައުންސިލް އިންތިހާބްގައި ހިތަދޫ ދެކުނު ދާއިރާއަށް ޖޭޕީ ޓިކެޓްގައި ވާދަކުރުމަށް ފުރަތަމަ ހަމަޖެހުނު ބޭފުޅާއެވެ. ނަމަވެސް ފަހުން އަޠްހަރު ވަނީ ނަން އަނބުރާ ގެންދަވާފަ އެވެ.
ޕީޕީއެމް ކޯލިޝަނުން ޖޭޕީ ސްލޮޓްގައި ސަރުކާރުގައި ތިއްބެވި ސިޔާސީ ބޭފުޅުންގެ ތެރެއިން ޓްރާންސްޕޯޓް މިނިސްޓަރު އަދި އެ ޕާޓީގެ ޑެޕިއުޓީ ލީޑަރު އަމީން އިބްރާހީމް ވެސް ވަނީ މަގާމުން ވަކިކުރައްވައިފަ އެވެ.
އަމީން ވަނީ ޖޭޕީގެ ލީޑަރު ގާސިމް އިބްރާހީމް އާ މަޖިލީހުގެ ރައީސް ކަމަށް ކުރިމަތިލުމަށް ފެނިވަޑައިގަންނަވާ ކަމަށް ޖޭޕީގެ ކައުންސިލްގައި ވޯޓު ދެއްވައިފަ އެވެ