ސިފައިންގެ 60 ވަނަ އަސާސީ ތަމްރީނު ކޯސް އެމްއެންޑީއެފް ސަދަން އޭރިއާގައި ފަށައިފި އެވެ.
ގަމުގައި ހުންނަ އެމްއެންޑީއެފް ސަދަން އޭރިއާ ޓްރެއިނިން ސްކޫލްގައި ކޯސް ފެއްޓުމުގެ ގޮތުން ބޭއްވި ރަސްމިއްޔާތު ޝަރަފުވެރިކޮށް ދެއްވައި ކޯސް ފައްޓަވައި ދެއްވީ އެމްއެންޑީއެފް ސަދަން އޭރިއާގެ ކޮމާންޑަރު ކާނަލް ވައިސް ވަޙީދެވެ.
މިރަސްމިއްޔާތުގައި ވައިސް ވަނީ ސިފައިންގެ އަސާސީ ތަމްރީނު ކޯހުގެ މުހިންމުކަމާއި، ސިފައިންގެ ވަޒީފާގެ މުހިންމުކަމާ ބެހޭ ގޮތުން ވާހަކަފުޅު ދައްކަވާފަ އެވެ.
އަށާރަ ހަފުތާގެ މުއްދަތައް ކުރިއަށް ގެންދިއުމަށް ހަމަޖެހިފައިވާ މި ކޯހުގައި 100 ދަރިވަރުން ބައިވެރިވެފައިވެ އެވެ.
މީގެ ކުރިން އެމްއެންޑީއެފުން ހިންގާފައިވާ އަސާސީ ތަމްރީނު ކޯސްތަކާ ޚިލާފަށް މި ކޯހުގައި ރެސްކިއު ސްވިމިން ކިޔަވައި ދިނުމަށް ހަމަޖެހިފައިވެ އެވެ.
ސިފައިންގެ 60 ވަނަ އަސާސީ ތަމްރީނު ކޯސް ފެށުމުގެ ރަސްމިއްޔާތުގައި، ޑިފެންސް އިންސްޓިޓިއުޓް ފޯރ ޓްރެއިނިންގ އެންޑް އެޑިޔުކޭޝަން (ޑައިޓް) ގެ ކޮމާންޑިންގ އޮފިސަރ މޭޖަރ އަހުމަދު ޝަރީފާއި، އެމްއެންޑީއެފް ސަދަން އޭރިއާގެ ޑެޕިޔުޓީ ކޮމާންޑަރ ކެޕްޓަން މުޙައްމަދު ޝުޖާއުގެ އިތުރުން ކޯހުގެ މުދައްރިބުންނާއި ސަދަން އޭރިއާގައި މަސައްކަތްކުރައްވާ އޮފިސަރުންނާއި، ސިފައިން ބައިވެރިވިއެވެ.