ފޭދޫގައި އިމާރާތްކޮށްފައިވާ ހައުސިން ޔުނިޓްތަކަށް ކުރިމަތިލި މީހުންނަށް ޕޮއިންޓް ލިބުނު ގޮތުގެ ދާއިމީ ލިސްޓް ނެރެފި އެެވެ.
އެ ލިސްޓް ސަރުކާރުގެ ގެޒެޓްގަ އާއި ފޭދޫގެ އެކި ތަންތަނުގައި އާންމުކޮށް ފެންނާނެހެން މިހާރު ބަހައްޓާފަ އެވެ.
ފޭދޫ އަވަށު ބޯޑުން ދާއިމީ ލިސްޓް ނެރުނީ، ޕޮއިންޓް ލިސްޓާ ގުޅޭ ގޮތުން އެއްވެސް ޝަކުވާއެއް އޮތް ނަމަ، ޝަކުވާ ހުށަހެޅުމުގެ ފުރުސަތު ހުޅުވާލުމަށް ފަހު އެވެ.
އެ ފުރުސަތުގައި ލިސްޓަށް ބޮޑެތި ބަދަލުތަކެއް އަންނަވަރުގެ ޝަކުވާއެއް ލިބިފައި ނުވާ ކަމަށް ފޭދޫ އަވަށު އޮފީހުގެ އިތުރުން ހައުސިން މިނިސްޓްރީން ވެސް ބުންޏެވެ.
އެހެންވެ ދާއިމީ ލިސްޓް އާންމު ކުރީ، ހުށަހެޅުނު ހަ ޝަކުވާ އަށް ޖަވާބު ދިނުމަށް ފަހު އެވެ. ހައުސިން ޔުނިޓްތަކަށް 166 ފަރާތަކުން ކުރިމަތިލާފައިވެ އެެވެ.
ދާއިމީ ލިސްޓް އާންމު ކުރި ނަމަވެސް، ގުރުލާނެ ދުވަހެއް އަދި ނިންމާފައެއް ނުވެ އެވެ.
ތިން ކޮޓަރި އާއި ފާހާނާ އަދި ބަދިގެ އާއި ސިޓިން ރޫމް ހިމެނޭ ގޮތަށް ދެ ބުރިއަށް ފޭދޫގެ ދެ ސަރަހައްދެއްގައި އިމާރާތްކޮށްފައިވާ ހައުސިން ޔުނިޓްތަކަށް ޑައުންޕޭމަންޓްގެ ގޮތުގައި 19،000ރ. ދައްކަން ޖެހެ އެވެ. އަދި މަހަކު 3،000ރ. ދައްކަން ޖެހެ އެވެ.