ކުރިއަށް އޮތް ރޯދަ މަހުގެ ކުރިން ހުޅުމީދޫ މަގުތަކުގައި ބައްތި ޖަހައި ނިންމާނެ ކަމަށް އައްޑޫ ސިޓީ ކައުންސިލުން ބުނެފި އެވެ.
ހުޅުމީދޫ ކައުންސިލަރު އަލީ މުހައްމަދު (އައްދު) މިއަދު ވިދާޅުވީ އެ ބައްތި ޖެހުމުގެ މަސައްކަތް ކުރާނީ ފެނަކަ ކޯޕަރޭޝަނުން ކަމަށެވެ.
"އަޅުގަނޑުމެންގެ ސައިޑުން އެ ފަރާތަށް ފޯރުކޮށް ދޭން ޖެހޭ ހުރިހާ އެހީތެރިކަމެއް މިހާރު ވާނީ ފޯރުކޮށް ދީފައި. އެހެންވީމާ ރޯދައިގެ ކުރިން ބައްތި ޖަހައި ނިންމާލެވޭނެ،" އައްދު ވިދާޅުވި އެވެ. "އަޅުގަނޑުމެންނަށް އެނގިފައި އޮތް ގޮތުން މަސައްކަތް އަމަލީ ގޮތުން ފެށުމަށް ފެނަކަ އިން ވެސް މިހާރު ވަނީ ތައްޔާރުވާން ފަށާފައި. މަސައްކަތަށް ބޭނުންވާ ކޭބަލާ އެއްޗެހި ހޯދަމުން އަންނަނީ."
ކައުންސިލުން ބުނީ ހުޅުމީދޫގައި މަގުތަކުގައި ޖަހާނީ 2011 ވަނަ އަހަރުގެ ސާކް ސަމިޓާ ދިމާކޮށް، އެ ރަށުގެ މަގުތަކުގައި ޖަހަން ގެނައި ބައްތި ކަމަށެވެ.