ފޭދޫގައި ހުރި ދޮންދީނި މޮނިއުމަންޓަކީ ބުދެއް ކަމަށް ބުނެ، އެ ނެގުމަށް އެދި އެއްވެސް ފަރާތަކުން ރަސްމީކޮށް ފޭދޫ އަވަށު އޮފީހަށް ހުށަހަޅާފައި ނެތް ކަމަށް އެތަނުން ބުނެފި އެވެ.
ޑެޕިއުޓީ ޑިރެކްޓަރު ހަސަން ލަތީފް އަލީ މިއަދު ވިދާޅުވީ ފެދު އާއި ގަން ގުޅޭ ހިސާބުގައި ހުރި ދޮންދީނި މޮނިއުމަންޓާ ގުޅޭ ގޮތުން މިހާތަނަށް ޝަކުވާއެއްގެ ގޮތުގައި ވާހަކަ ދައްކާފައި ވަނީ ވެސް އެންމެ މީހަކު ކަމަށެވެ.
"އޭނާ ހަމައެކަނި އަނގަބަހުން އެ ވާހަކަ އަޅުގަނޑާ ދިމާވެގެން ދެއްކި. އެ ނޫން ގޮތަކަށް ދޮންދީނި މޮނިއުމަންޓާ ގުޅޭ އެއްވެސް ޝަކުވާއެއް ރަސްމީ ސިފައެއްގައި ހުށަހަޅާފައެއް ނެތް،" ލަތީފް ވިދާޅުވި އެވެ.
އޭނާ އިތުރަށް ވިދާޅުވީ މޮނިއުމަންޓްތަކަކީ ދުނިޔޭގެ އެހެން ގައުމުތަކުގައި ވެސް ހުންނަ އެއްޗެހި ކަމަށެވެ. އަދި ދޮންދީނި މޮނިއުމަންޓަކީ އައްޑޫ ރަމްޒުކޮށްދޭ އެއްޗަކަށްވާތީ، އެއީ މާ ބޮޑު މައްސަލައަކަށް ވެގެން އެކަން ދީނީ މައްސަލައަކަށް ހަދައިގެން ގިނަ ބަޔަކު ނޫޅޭކަން ލަތީފް ފާހަގަ ކުރެއްވި އެވެ.
"އެހެން ނަމަވެސް ދެން ދީނީ ގޮތުން މިކަމާ ބެހޭ ގޮތުން އެއްޗެއް ދަންނަވާކަށް އަަޅުގަނޑަކަށް ނޭނގޭ،" އޭނާ ވިދާޅުވި އެވެ.
އައްޑޫގައި 2011 ގައި ބޭއްވި 17 ވަނަ ސާކް ސަމިޓާ ދިމާކޮށް، ސާކްގެ އަށް ގައުމު ރަމްޒުކޮށްދޭ މޮނިއުމަންޓްތަކެއް ބެހެއްޓި އެވެ.
ނަމަވެސް ދޮންދީނި މޮނިއުމަންޓް ފިޔަވައި އެއްވެސް މޮނިއުމަންޓެއް މިހާރަކު ނެތެވެ.