ބޮލީވުޑްގެ މަޝްހޫރު އެކްޓަރު އަމީތާބް ބައްޗަން ޓީވީ ސިލްސިލާއަކުން، ބެލުންތެރިންނާ ހަމައަށް އަންނަން ތައްޔާރުވެއްޖެ އެވެ.
މި ޑްރާމާ ސިލްސިލާގެ ނަމަކީ "ޔުދް" އެވެ. ޑައިރެކްޓަރަކީ ކާމިޔާބް ވަރަށް ގިނަނ ފިލްމްތައް ޑައިރެކްޓްކޮށްފައިވާ އަނޫރާހް ކެޝަޕެވެ.
"ޔުދް" ގެ ޕްރޮމޯ ސޮނީ ޓީވީން މިހާރު އަންނަނީ ދައްކަމުންނެވެ.
ބޮޑު ސްކްރީނުގައި ރަސްކަން ކުރަމުން އަންނަ އަމީތާބަކީ ޓީވީ ސްކްރީނަށް އާ ތަރިއެއް ނޫނެވެ. އޭނާ ވަނީ މީގެ ކުރިން ސޮނީގެ ކާމިޔާބް ޝޯއެއް ކަމަށްވާ "ކޯން ބަނޭގާ ކްރޯރްޕަތީ" ގެ އެތައް ސީޒަނެއް ހުށަހަޅައި ދީފަ އެވެ.
އެހެން ނަމަވެސް މިއީ ފިކްޝަން ޝޯއަކުން އަމީތާބް ޓީވީން ފެންނަ ފުރަތަމަ ފަހަރަށް ވާނެ އެވެ. އެހެންވެ މި ސިލްސިލާ އަށް އާންމުން ކުރާ އުންމީދު ވެސް އޮތީ ވަރަށް އުހުގަ އެވެ. އަދި ގިނަ ބަޔަކު އަންނަނީ "ޔުދް" އޮންއެއާ ކުރަން ފަށާނެ ދުވަހަކަށް އިންތިޒާރު ކުރަމުންނެވެ.
މި ސިލްސިލާގައި ދައްކުވައި ދޭނީ އަމިތާބަށް ހަޔާތުގައި ކުރިމަތިވާ ގޮންޖެހުންތަކާއި އެ ގޮންޖެހުންތަކުން ސަލާމަތްވުމަށް އޭނާ ކުރާ މަސައްކަތެވެ.
"ޔުދް" އިން އަމީތާބާ އެކު ވަރަށް ގިނަ ފަންނާނުން ފެނިގެން ދާނެ އެވެ. އޭގެ ތެރޭގައި ކަމަލް ހަސަންގެ ކުރީގެ އަންހެނުން ސާރިކާ ހިމެނެ އެވެ.