ކުރިއަށް އޮތް ދެ މަހެއްހާ ދުވަހުގެ ތެރޭގައި މީދޫގެ ދަނޑުބިންތަކަށް ކަރަންޓިގެ ހިދުމަތް ފޯރުކޮށް ދެވޭނެ ކަމަށް އައްޑޫ ސިޓީ ކައުންސިލުން ބުނެފި އެވެ.
ހުޅުމީދޫ ދާއިރާގެ ކައުންސިލަރު އަހުމަދު އަލީ (އައްދު) މިއަދު ވިދާޅުވީ މީދޫގެ ދަނޑުބިންތަަަކަށް ކަރަންޓް ލައި ދޭން ފެނަކައިގައި ކައުންސިލުން އެދިފައިވާ ކަމަށެވެ.
އެހެންވެ ކުރިއަށް ދެ މަހެއްހާ ދުވަހުގެ ތެރޭގައި އެކަން ވާނެ ކަމުގެ އުންމީދު ބޮޑު ކަމަށް އޭނާ ވިދާޅުވި އެވެ.
އައްދު އިތުރަށް ވިދާޅުވީ މިކަމަކީ ކައުންސިލްގެ ބަޖެޓުން ހަރަދުކޮށްގެން ކުރާ ކަމެއް ކަމަށެވެ.
އެގޮތުން ދަނޑުވެރިކަމަށް ދޫކޮށްފައިވާ 100 އެއްހާ ބިމުގެ ތެރެއިން މިވަގުތު ދަނޑުވެރިކަން ކުރަމުން އަންނަ 40 ދަނޑަކަށް ކަރަންޓުގެ ހިދުމަތް ފޯރުކޮށް ދޭނެ ކަމަށް އައްދު ވިދާޅުވި އެވެ.