ދަރާ މުހައްމަދު ރަޝީދު ޑައިރެކްޓްކޮށް، އެހެން ނަމަވެސް ސްކްރީނަށް ނުގެނެވި ގިނަ ދުވަސްތަކެއްވެފައިވާ ފިލްމް "24 ގަޑި އިރު" އަންނަ އޮގަސްޓް މަހުގެ 28 ގައި ރިލީޒް ކުރާ ގޮތަށް ހަމަޖައްސައިފި އެވެ.
އިސްމާއީލް ޝަފީއު ޕްރޮޑިއުސްކޮށް، މަޑުލު މުހައްމަދު ވަހީދުގެ ސްކްރީންލްޕޭއަކަށް ހަދާފައިވާ މި ފިލްމުގައި ލީޑް ރޯލް ކުޅެފައި ވަނީ ޔޫސުފް ޝަފީއު (ޔޫއްްޕެ) އާއި ފާތުމަތު އާޒިފާ (އަަޒޫ) ގެ އިތުރުން އޮސްޓްރިއާގެ މެޑިކަލް ޑޮކްޓަރެއް ކަމަށްވާ ސާރާ އެވެ.
ދަރާ ބުނީ އޮގަސްޓް 28 ގައި ފިލްމް ޕްރީމިއާ ކުރަން ނިންމި އިރު، ފިލްމުގެ ހުރިހާ މަަަސައްކަތްތަކެއްހެން މިހާރު ނިމިފައިވާ ކަމަށެވެ. ނަމަވެސް ފިލްމު ރިލީޒް ކުރަން އަދި ދުވަސްތަކެއް އޮތުމާ އެކު ފިލްމް އިތުރަށް ޕޮލިޝް ކުރަމުން އަންނަ ކަމަށް ވެސް ބުންޏެވެ.
ކުރިން ކާމިޔާބު ގިނަ ފިލްމްތަކެއް ކުޅެފައިވާ ތަޖުރިބާކާރު ބަތަލު ދަރާ ބުނީ އޮގަސްޓް 28 ގައި އޮލިމްޕަހުގައި "24 ގަޑި އިރު" ޕްރީމިއާ ކުރާ އިރު، ރާއްޖޭގެ އިތުރު 24 ރަށެއްގައި ވެސް ފިލްމް އަޅުވަން މަސައްކަތް ކުރަމުން އަންނަ ކަމަށެވެ.
ލޯބީގެ އަސަރު ގަދަ ހާދިސާތަކެއް ދައްކުވައިދޭ "24 ގަޑި އިރު" އަކީ ދިވެހި ޑައިލޮގްގެ އިތުރުން އިނގިރޭސި ޑައިލޮގްތައް ވެސް ހިމެނޭ ފިލްމެކެވެ.
ފިލްމުގައި ތިން ލަވަ ހިމަނާފައިވާ އިރު، އޭގެ ތެރެއިން އެއް ލަވައަކީ ވެސް އިނގިރޭސި ލަވައެކެވެ. އަމިއްލަ ރާގުގެ އެ ލަވަތައް ކިޔާފައި ވަނީ ތޭރަވާ އާއި އުނޫޝާ އަދި ހަދީޖާ އިބްރާހީމް (ރިޒޫ) އެވެ.