"މުގްލޭ އާޒަމް" އާއި "ނަޔާ ދައުރު" އަދި "ދޭވްދާސް" ފަދަ ކާމިޔާބު އެތަކެއް ފިލްމެއް ކުޅެފައިވާ ބޮލީވުޑްގެ މަޝްހޫރު އެކްޓަރު ދިިލިޕް ކުމާރުގެ ބައޮގްރަފީ މިމަހުގެ 9 ގައި ނެރޭ ގޮތަށް ހަމަޖައްސައިފި އެވެ.
ފަސްދޮޅަަސް ވަރަކަށް އަހަރަށް ދިގު ދެމިގެން ދިޔަ ފިލްމީ ކެރިއަރާއި އަމިއްލަ ހަޔާތުގެ ސޮފްހާތަކުގެ ގިނަ ކުލަތަަކަކާ އެކު ލިޔެފައިވާ ދިލިޕް ކުމާރުގެ ބައޮގްރީ އަށް ދީފައިވާ ނަމަކީ "ސަބްސްޓެންސް އެންޑް ދަ ޝެޑޯ" އެވެ. މި ފޮތް ލިޔެފައި ވަނީ އުދޭ ތާރާ ނަޔަރް އެވެ.
ނަަޔަރް ބުނީ ބަޔަގްރަފީ އަށް ނަން ދިނީ ދިލިޕް ކުމާރު އަމިއްލަ އަށް ކަމަށެވެ. އަދި އެ ނަމުގެ ފަހަތުގައި ފޮރުވިފައިވާ މާނަ ވެސް އޭނާ ވަނީ ތިލަކޮށް ދީފަ އެވެ.
ނަޔަރް ބުނީ "ސަބްސްޓެންސް" އިން ދޭހަކޮށް ދެނީ ދިލިޕް ކުމާރު، 91، ގެ އަމިއްލަ ޝަހުސިއްޔަތާ އޭނާގެ ހާއްސަ ސިފަަތައް ކަމަށެވެ. އަދި "ޝެޑޯ" އިން ދޭހަކޮށް ދެނީ ވަރުގަދަ ފިލްމީ ޝަހުސިއްޔަތެއްގެ ގޮތުގައި ދިލިޕް ކުމާރު ދެމިހުރުމުގެ ސިއްރުތައް ކަމަށެވެ.
މީޑިއާ ރިޕޯޓްތައް ބުނާ ގޮތުން ކުރީގެ ބަތަލާ ސާއިރާ ބާނޫ އާ ކައިވެނިކޮށްގެން އުޅޭ ދިލިޕް ކުމާރުގެ ބައޮގްރީ ނެރުމަށް ބާއްވާ ކުލަގަދަ ހަފުލާގައި، އެ ފޮތް ނެރެދޭނީ އެފަދަ ދެވަނައެއް ނެތް ލަވަ ކިއުންތެރިޔާ ލަތާ މަންގޭޝްކަރެވެ.
އަދި މި ހަފުލާގައި އަމީތާބް ބައްޗަން އާއި އާމިރް ހާނާއި މަދޫރީ ޑިކްޝިޓް ފަދަ ތަރިން ވެސް ބައިވެރި ވާނެ އެވެ.
މި ހަފުލާގައި މަޝްހޫރު ލިރިސިސްޓް ޕްރަސޫން ޖޯޝީ ލިޔެފައިވާ ޅެމެއް އާމިރް ހުށަހަޅައިދޭ ގޮތަށް ވެސް ހަމަޖެހިފައިވެ އެވެ.