ހިތަދޫގައި 100 އެނދުގެ ހޮސްޕިޓަލެއް އެޅުމުގެ ވާހަކަ ދައްކާތާ އެތައް އަހަރުތަކެއް ވެއްޖެއެވެ. ރާއްޖޭގެ ދެވަނައަށް އެންމެ ބޮޑު އާބާދީގައި އެކަށީގެންވާ ސިއްހީ ހިދްމަތް ފޯރުކޮށްދޭނެ ހޮސްޕިޓަލެއް އެޅުމަށް އަދި މިހާތަނަށް ދެކެވެނީ "ހުސް" ވާހަކައެވެ. އަމަލީ އެއްވެސް މަސައްކަތެއް ނުފެށެއެވެ.
ހޮސްޕިޓަލްގެ ވާހަކަ ފާއިތުވި ތިން ސަރުކާރުންވެސް ދައްކައިފިއެވެ. އެއްބަޔަކު ބުނާ ގޮތުން ހޮސްޕިޓަލަށް ބޭނުންވާ ފައިސާ ހުރީ މުޅިން ހަމަޖެހިފައެވެ. އަނެއް ބަޔަކު ބުނަނީ އިމާރާތަށް ބޭނުންވާ ފައިސާގެ ތެރެއިން ބޮޑު ބައި ހަމަޖެހިފައިވާ ކަމަށާއި، އަދި މަދު މިންވަރެއް ހޯދަން ޖެހޭނެކަމަށެވެ.
ހޮސްޕިޓަލް އިމާރާތް ކުރުމުގެ ވާހަކަ މިދުވަސްކޮޅު މާ ބޮޑަށް ގަދަވެފައި މިވަނީ ދާދި ފަހުން އާ ހޮސްޕިޓަލް ޑިޒައިން ކުރުމަށް މިދިޔަ އެޕްރީލް މަހުގެ 28 ވަނަ ދުވަހު ރިޔަން ކުންފުންޏާއި ހަވާލު ކުރުމުންނެވެ.
ހޮސްޕިޓަލްގެ ފުރަތަމަ މަޝްރޫއުގެ ގޮތުގައި 4.5 މިލިއަން ރުފިޔާއަށް ޑިޒައިން ކުރުން ހަވާލު ކުރީ ހަމަސް ދުވަހުގެ ތެރޭގައި ނިންމުމަށް ޝަރުޠު ކޮށްފައެވެ،
މިއަހަރުގެ ނޮވެމްބަރު މަހުގެ ފަހުކޮޅަށް ހަމަސް ހަމަވާއިރު މިހާރު އެންމެ ގަދައަށް ބަހުސް ކުރެވެމުން ދަނީ ހޮސްޕިޓަލް އިމާރާތް ކުރާނެ ބިމުގެ މައްސަލައެވެ.
އާ ހޮސްޕިޓަލް އެޅުމަށް "އައްޑޫ ސްޓޭޑިއަމް"ގެ އިރުން 202،500 އަކަފޫތުގެ ބިމެއް 24 އޮކްޓޫބަރު 2010ގައި ހެލްތު މިނިސްޓްރީއާއި ވަނީ ހަވާލުކޮށްފައެވެ. ނަމަވެސް އޭގެ ފަހުން އައްޑޫ ސިޓީ ކައުންސިލުން ވަނީ ހޮސްޕިޓަލް އަންދާލި ޕޮލިސް ޓްރޭނިން ސެންޓަރު ހުރި ބިމަށް ބަދަލު ކުރުމަށް މަސައްކަތްކޮށްފައެވެ.
ކައުންސިލުން ވަނީ ނަޝީދުގެ ސަރުކާރާއި، ވަހީދުގެ ސަރުކާރުގައިވެސް މި މަސައްކަތްކޮށްފައެވެ. ނަމަވެސް ހެލްތު މިނިސްޓްރީން ބިން ބަދަލު ކުރުމަށް ބޭނުމެއް ނުވެއެވެ. މިނިސްޓްރީން ބުނަމުންދަނީ ބިން ބަދަލުކޮށްފިނަމަ ފަންޑް ލިބުމުގެ މައްސަލަ ކުރިމަތިވާނެ ކަމަށެވެ.
ކޮންމެއަކަސް ބިން ބަދަލު ކުރުމުގެ މައްސަލައިގެ ބަހުސް ގަދަވެފައިވާއިރު ދާދި ފަހުން "އައްޑޫލައިވް" އަށް އައްޑޫގެ މޭޔަރ އަބްދުﷲ ސާދިގް (ސޯބެ) އާއި ޑެޕިއުޓީ މޭޔަރ އަބްދުﷲ ޠޮއްޔިބް ވިދާޅުވީ ހޮސްޕިޓަލް އަޅާ ބިމުގެ މައްސަލަ ޖައްސާކަށް ކައުންސިލުން ބޭނުންނުވާ ކަމަށެވެ.
"އަޅުގަނޑުމެން ކޮންމެހެން ނެތިން ހޮސްޕިޓަލް އަޅާ ބިމުގެ މައްސަލަ ޖައްސާކަށް. ކައުންސިލަށް ފެންނަ އެންމެ ރަނގަޅު އެއް ލޮކޭޝަނަކީ ކުރީގެ ޕޮލިސް ޓްރޭނިން ސްކޫލް ހުރިތަން. އެހެންވެ އެ ހިޔާލު ހުށަހެޅީ. ކޮންމެ ތާކު ވިޔަސް ބޭނުންވަނީ ވީހާވެސް އަވަހަށް ހޮސްޕިޓަލް އިމާރާތްކޮށް ހިދްމަތް ލިބުން" ސޯބެ ވިދާޅުވިއެވެ.
ޕޮލިސް ޓްރޭނިން ސްކޫލް ހުރިތަނަށް ބިން ބަދަލު ކުރުމަށް ކައުންސިލުން ވިސްނީ، ހިތަދޫ ބަނދަރާއި ކައިރިވެފައި، ހުޅުމީދޫ އާއި ފުވައްމުލަކުން އަންނަ ފަރާތްތަކަށް އެތަން ކައިރިވުމެވެ. އަދި ބޭންކާއި، ކެފޭ ރެސްޓޯރެންޓް ފަދަ ތަންތަން ކައިރީގައި ގާއިމްވެފައި ތިބުމެވެ.
އަނެއްކޮޅުން ސްޓޭޑިއަމް ސަރަހައްދުގައި ހޮސްޕިޓަލް އިމާރާތް ކޮށްފިނަ ސްޓޭޑިއަމް އާއި ސްޕޯޓްސް އެރީނާ ފަދަ ތަންތަން އެތަނުގައި ގާއިމް ކުރުމަަށް ފުރުސަތު ހަނިވެގެންދާނެތީއެވެ. އަދި ކައުންސިލްގެ ޕެލޭންގައި އެތަން ސްޕޯޓްސް ވިލެޖަކަށް ތަރައްޤީ ކުރުމަށް ހިމެނިފައި ވުމެވެ.
ހޮސްޕިޓަލްގެ ބިމުގެ މައްސަލަ ސިޔާސީ ކޮށް، އާ ހޮސްޕިޓަލް އިމާރާތް އެހެން ސަރަހައްދަކަށް ބަދަލު ކުރުމަށްވެސް މަޝްވަރާ ކުރެވެމުންދާ ކަމަށް ހަބަރު ލިބެއެވެ.
"އައްޑޫލައިވް"އަށް އިތުބާރު ހުރި ގޮތަކަށް މައުލޫމާތު ލިބިފައިވާ ގޮތުގައި މިނިސްޓްރީގެ ވިސްނުން ހުރީ ސްޓެޑިއަމް ސަރަހައްދުން ދޫކޮށްފައިވާ ބިމުގައި މަސައްކަތް ފެށުމަށް ކައުންސިލުން ދެކޮޅު ހަދައިފިނަމަ ހޮސްޕިޓަލްގެ މަަސައްކަތް ހުއްޓާލާ ގޮތަށެވެ. އަދި ބަހަނާއަކަށް ކައުންސިލް ހެދުމަށް ފަހު މުޅި ޕްރޮޖެކްޓް ހުޅުމާލެއަށް ބަދަލު ކުރުމަށެވެ.
އައްޑޫ ސިޓީ ކައުންސިލުން ބުނީ އައްޑޫގެ ތަރައްޤީއަށް ކުރާ އެއްވެސް މަސައްކަތެއް ކައުންސިލުން ނިކުމެ ނުހުއްޓުވާނެކަމަށެވެ. ނަމަވެސް އައްޑޫގެ ތަރައްޤީއަށް މަަސައްކަތް ނުކުރާނަމަ އެކަމާއި ދެކޮޅަށް ނިކުންނާނެކަމަށެވެ.
ކައުންސިލުން ފާހަނގަ ކުރި ގޮތުގައި އައްޑޫއަށް މިވަގުތު މުހިއްމީ ތަންތަން ކޮޅުގައި ކުދިކުދި އިމާރާތް ހެދުމުގެ ބަދަލުގައި ވީ އެންމެ އަވަހަކަށް 100 އެނދުގެ ހޮސްޕިޓަލްގެ މަަސައްކަތް ފެށުމެވެ.
ކައުންސިލުން މިކަމާއި ދެކޮޅު ހަދާކަށް ނެތް އިރު ހޮސްޕިޓަލް އަޅާ ބިމާއި މެދު ކުރަން ޖެހޭ އިތުރު ބަހުސެއް ނެތެވެ.