އަބްރަހަމް ލިންކަނާއި މަހާތުމާ ގާންދީ އާއި އަލްބަޓް އެއިންސްޓެއިންގެ ހަޔާތްޕުޅުގައި ހޯއްދެވި ކާމިޔާބީ އަށް ނަޒަރު ހިންގާ އިރު، އެ ކާމިޔާބީގެ ކުރީގައި އެ ބޭބޭފުޅުން ކުރައްވާފައިވާ ކަންތައްތަކާއި، ކާމިޔާބީ ހާސިލު ކުރެއްވުމުގައި އެ ބޭފުޅުންނާ ބައްދަލު ކުރި ނާކާމިޔާބީތަކަށް ވެސް ނަޒަރު ހިންގަވާށެވެ. އޭރުން، ނާކާމިޔާބީއަކީ ކާމިޔާބީ އަށް ވާސިލުކޮށްދޭ ކަމެއްކަން ނިކަން ރަނގަޅަށް ވިސްނިވަޑައިގަންނަވާނެ އެވެ.
ތަފުސީލީ ގޮތެއްގައި މިސާލަކަށް މިނަކަލުކޮށް ލަނީ އެމެރިކާގެ ކުރީގެ ރައީސް އަބްރަހަމް ލިންކަނެވެ. އޭނާއަކީ، ކާމިޔާބު ލީޑަރަކަށް ވެވަޑައިގަތުމުގެ ކުރިން އެތައް ނާކާމިޔާބީއެއް ތަޖުރިބާކުރައްވާފައިވާ ބޭފުޅެކެވެ.
ލިންކަންގެ އުމުރުފުޅުން 21 އަހަރުފުޅުގައި ވިޔަފާރި ބަނގުރޫޓުވި އެވެ. އުމުރުފުޅުން 22 އަހަރުފުޅުގައި ޤާނޫނު ހަދާ މަޖިލީހުގެ އިންތިޚާބުގައި ނާކާމިޔާބުވެވަޑައިގަތެވެ.
އުމުރުފުޅުން 34 އަހަރުފުޅުގައާއި 36 އަހަރުފުޅުގައި ކޮންގްރެސް އިންތިޚާބުގައި ނާކާމިޔާބުވެ ވަޑައިގަތެވެ. އުމުރުފުޅުން 45 އަހަރުފުޅުގައި ސެނެޓް އިންތިޚާބުގައި ނާކާމިޔާބުވެ ވަޑައިގަތެވެ. އަދި އުމުރުފުޅުން 49 އަހަރު ފުޅުގައި ނާއިބް ރައީސްކަމުގެ މަޤާމަށް ހޮވިވަޑައިގަތުމަށް ކުރެއްވި މަސައްކަތްޕުޅު ނާކާމިޔާބުވެ ވަޑައިގަތެވެ.
ނަމަވެސް، ނާކާމިޔާބީ އަކީ ކަމަކަށް ކުރިމަތިނުލައްވައި ވާދަކުރެއްވުމެއްނެތި ހަނުހުންނެވުމަށް ދެވޭ ސިގުނަލެއްކަން ލިންކަންގެ ހިތްޕުޅަށް ނޭރިއެވެ. ކޮންމެ ނާކާމިޔާބީ އަކަށްފަހު އާ ޢަޒުމެއް ކަނޑައެޅުއްވި އެވެ.
ނާކާމިޔާބީން ޢިބްރަތް ހާސިލު ކުރެއްވި އެވެ. މަސައްކަތްޕުޅުގެ ދުވެލި ހައިކޮށެއް ނުލެއްވިއެވެ. ނަތީޖާއަކަށް ވެގެން ދިޔައީ، ލިންކަންގެ އުމުރުފުޅުން 52 އަހަރުފުޅުގައި އެމެރިކާގެ ރައީސްކަމުގެ ޝަރަފުވެރި މަޤާމް ހާސިލު ކުރެއްވުމެވެ.
މި ދުނިޔޭގައި އެކިއެކި ވަސީލަތްތައް އީޖާދުކޮށްފައިވާ ޢިލްމުވެރި ސައިންސް ވެރިންވެސް ވަނީ އެތައް ނާކާމިޔާބީއެއް ތަޖުރިބާ ކުރައްވާފަ އެވެ. ނަމަވެސް ކޮންމެ ނާކާމިޔާބީއަކަށް ފަހު، އެބޭފުޅުން ޢަޒުމް ވަރުގަދަ ކުރައްވަ އެވެ.
އަދި ކާމިޔާބީ ހޯއްދެވުމަށް މަސައްކަތް ކުރެއްވުމުގައި އިޚުލާސްތެރި ކަމާއެކު އެތައް ވަގުތެއް ހޭދަ ކުރައްވަ އެވެ.
ފަހަރެއްގައި ވެސް ދެރަ އިޙުސާސް ކުރައްވަން ވަގުތުތަކެއް ބޭކާރުކޮށެއް ނުލައްވައެވެ. މިސާލަކަށް ކަރަންޓުން ދިއްލާ ބޮކި އުފެއްދެވުމަށް އެޑިސަން ކުރެއްވި މަސައްކަތްޕުޅަށް ތިބާ ބައްލަވައިލައްވާށެވެ. އެ ބޮކި އީޖާދު ކުރެއްވި ސައިންސްވެރިޔަކީ ތޯމަސް އެޑިސަނެވެ.
އޭނާއަށް އެ އީޖާދު ކުރެއްވުނީ، 100،00 ފަހަރު ނާކާމިޔާބީ ތަޙުލީލުތަކެއް ކުރެއްވުމަށް ފަހުގަ އެވެ. މިއިން އެނގޭ އެއްޗަކީ، ނާކާމިޔާބީއަކަށް ފަހު ތިބާ ގަދައަޅުއްވައި މަސައްކަތް ކުރައްވައިފި ނަމަ ތިބާއަށް ކާމިޔާބީ ހާސިލު ކުރެއްވޭނެކަމެވެ.
މި ދުނިޔޭގައި ކޮންމެ އިންސާނަކާ ވެސް އެތައް ދަތިތަކެއް ކުރިމަތިވެ އެވެ. ދިރިއުޅުމުގައި އެތައް ހުރަސްތަކެއް ކުރިމަތިވެ އެވެ. ނަމަވެސް ބުއްދިވެރިންނަކީ، އެފަދަ ކަންތައްތަކުން ޢިބުރަތް ލިބި ގަނެ އެހެން ގޮތެއް ހޯދާ މީހުންނެވެ. ކުރަން އުޅޭ ކަމެއް ނުކުރެވުނަސް، މާޔޫސް ނުވާ މީހުންނެވެ.
ދާން އުޅޭ މަންޒިލަށް ކޮންމެ ގޮތަކުން ވިޔަސް ދާ މީހުންނެވެ. ނާކާމިޔާބީއެއް ކުރިމަތިވާ އިރަށް، މާޔޫސްވެ އެކަމެއް ދެން ނުވާނެއޭ ހިތައި ހުއްޓޭ މީހުންނަކީ ނާކާމިޔާބުގެ އަހުލުވެރިންނެވެ. މި ދުނިޔޭގައި ކުރާނެ ކަމެއް ނެތިގެން އެބައި މީހުން އުޅޭނެ އެވެ.
އެފަދަ މީހުންގެ ނަން ނުވަތަ ފޮޓޯއެއް އަބްރަހަމް ލިންކަން ފަދައިން ޤައުމެއްގެ ފައިސާގައި ނަކަލު ކުރާނެ ފުރުޞަތެއް ނޯންނާނެ އެވެ.