ޑްރަގް ކޯޓުން ފުލުހުންގެ މައްޗަށް ކޮށްފައިވާ އަމުރަކާ ގުޅިގެން ބަންދުގައި ބަހައްޓައިގެން ފޭދޫ މީހަކު ކޯޓަށް ހާޒިރު ކުރަން ފުލުހުން އޭނާ ހޯދުމުގެ މަސައްކަތް ފަށައިފި އެެވެ.
ހޯދަމުން އަންނަނީ ސ.ފޭދޫ ފެހިވިދުވަރުގެ، މޫސާ މުޙައްމަދު، 45، އެވެ.
މޫސައަކީ މަސްތުވާތަކެތީގެ މައްސަލަތަކުގެ ރެކޯޑާއި ވައްކަމުގެ މައްސަލަތަކުގެ ރެކޯޑް އޮންނަ މީހެއް ކަމަށް ފުލުހުން ބުންޏެވެ.
ޑްރަގް ކޯޓުން ފުލުހުންގެ މައްޗަށް އަމުރުކޮށްފައި ވަނީ މައްސަލަ ޝެޑިއުލް ކޮށްފައިވާ ތާރީހަށް މޫސް ބަންދުގައި ބަހައްޓައިގެން ކޯޓަށް ޙާޟިރު ކުރުމަށެވެ. އަދި ކޯޓުން ކަނޑައަޅާފައިވާ ތާރީޙަށް ކޯޓަށް ޙާޟިރުކޮށް ނުދެވިއްޖެ ނަމަ، އޭނާ ބަންދު ކުރުމަށް ފަހު އެކަން ޑްރަގް ކޯޓަށް އަންގައި، ޑްރަގް ކޯޓަށް ޙާޒިރު ކުރެވެންދެން މޫސަ ފުލުހުންގެ ބަންދުގައި ބެހެއްޓުމަށް ޑްރަގް ކޯޓުން ފުލުހުންގެ މައްޗަށް އަމުރު ކޮށްފައިވެ އެވެ.