އައްޑޫ މޭޔަރު އަލީ ނިޒާރު ބޭންކް އޮފް މޯލްޑިވްސް (ބީއެމްއެލް) އިން ރަހުނު ބަހައްޓާފައި ނެންގެވި ލޯނެއް ނުދައްކައިގެން ބޭންކުން ދައުވާކުރުމުން ލޯނު ދެއްކެވުމާ ގުޅިގެން ދައުވާ ބާތިލުކޮށްފި އެވެ.
ދައުވާ ބާތިލުކޮށް ދޭން ބޭންކުން ސިވިލް ކޯޓަށް ބުދަ ދުވަހު ހުށަހެޅުމާ ގުޅިގެން ކޯޓުން ބުރާސްފަތި ދުވަހު ވަނީ ދައުވާ ބާތިލުކޮށްފަ އެވެ.
ގައުމީ ބޭންކުން ނިޒާރަށް ދައުވާކުރީ އޭނަ އާއި އަނބިކަނބަލުން ލީނާ ޖާބިރު، ރަހުނު ބަހައްޓައިގެން ނެންގެވި 1،248،000ރ. ގެ ލޯނު އެއްބަސްވުމާ އެއްގޮތަށް ނުދައްކައިގެންނެވެ. އެހެންވެ ދައުވާކުރީ ލޯނަށް ދައްކަން ޖެހި ނުދެއްކި ބާކީ ހުރި އަދަދާއި ސާވިސް ޗާޖާއި، އިންޓްރެސްޓާއި، ޖޫރިމަނާ ފައިސާ އެކީ އެއް ފަހަރަކާ އެ ދެމީހުންގެ އަތުން ނަގައި ދިނުމަށް އެދި އެވެ.
ނިޒާރު މި ލޯނު ނެންގެވީ ރައްޔިތުންގެ މަޖިލީހުގެ މެމްބަރަކަށް ހުންނެވި ދުވަސްވަރު އެވެ. އަދި ލޯނު ނެންގެވީ ލޯނާ ގުޅިގެން ހިތަދޫގައި އޮތް ނިޒާރުގެ "ހިޔާލާ" ކިޔާ ބަންޑާރަ ގޯއްޗާއި އެ ގޯތީގައިވާ އެންމެހައި އިމާރާތްތަކާއި ހިތަދޫގައި ކުރިން އޭނަ ހިންގެވި "ކްރެސް ގާޑަން" ރެސްޓޯރެންޓްގައިވާ އެންމެހާ މުދާ ބީއެމްއެލް އަށް ރަހުނުކޮށްފަ އެވެ.
ނިޒާރުގެ މި ލޯނުގެ މައްސަލަ ފެންމަތިވެ މީގެ ވާހަކަ މީޑިއާތަކުގައި ދެކެވުނު ދުވަސްވަރު ކުރީގެ ނައިބު ރައީސް އަތުން ފައިސާތަކެއް ހޯއްދަވަން އެ ދެ މީހުންގެ މެދުގައި މެސެޖުން ކުރެވުނު މުއާމަލާތްތަކެއް ވެސް އާންމުވެފައިވެ އެވެ. އެގޮތުން ދަރަންޏެއް އަދާކުރުމަށްޓަކައި ވަރަށް ބޮޑު ކަމެއް ކޮށްދެއްވަން ޖެހޭ ކަމަށް ބުނެ އަދީބަށް 2014 ޖުލައި މަހުގެ ތެރޭގައި މެސެޖު ކުރައްވާފައިވެ އެވެ. އަދި އެ ވަގުތަށް ބޭނުން ވަނީ 250،000ރ. ރުފިޔާ ކަމަށް ނިޒާރު ވިދާޅުވެފައިވެ އެވެ. އަދި އަދި އެ އަހަރުގެ އޮގަސްޓު މަހުގެ ތެރޭގައި 70،000 ޑޮލަރުގެ ލޯނެއް ހޯދަން ވެސް ނިޒާރު އަދީބަށް މެސެޖުކުރައްވާފައިވެ އެވެ.
ނިޒާރު މޭޔަރަކަށް ހުންނެވި އައްޑޫ ސިޓީ ކައުންސިލް މިހާރު އޮތީ 30.8 މިލިއަން ރުފިޔާގެ ޖޫރިމަނާއެއްގެ ތެރޭގަ އެވެ. ކައުންސިލަށް ޖޫރިމަނާ އައި ތިމާވެށީގެ ގާނޫނާ ޕިކްނިކް ޒޯނެއްގެ ގޮތުގައި ތަރައްގީކުރަން ކަމަށް ހިތަދޫ ރުއްޖެހެރެ ގަވާއިދާ ހިލާފަށް ރުއްގަސް ކެނޑުމާއި ފެންގަނޑެއް ކޮނެގެން 17،000 އަކަމީޓަރުގެ ބިން ސާފުކޮށް، އަދި އެ ސަރަހައްދުން 1،700 ކޮޑިމީޓަރުގެ ވެލި ނަގައިގެން ފެންގަނޑެއް ކޮނުނު މައްސަލައިގަ އެވެ.
މި ޖޫރިމަނާ މަސް ދުވަހުގެ ތެރޭގައި ދައްކަން ކައުންސިލަށް އެންވަޔަރަމަންޓް ޕްރޮޓެކްޝަން އޭޖެންސީ (އީޕީއޭ) އިން އެންގީ މިދިޔަ މަހުގެ 31 ގަ އެވެ.