ބޮލީވުޑްގެ ޒުވާން އެކްޓަރު އިމްރާން ހާން ބައްޕައަކަށް ވެއްޖެ އެވެ.
އާމިރް ހާނަށް ބޮޑު ބޭބެ ކިޔާ އިމްރާންގެ އަންހެނުން އަވަންތިކާ މާލިކް ވިހެއީ އިއްޔެ އެވެ. މުމްބާއީގެ ހޮސްޕިޓަލެއްގަ އެވެ. ވިހެއީ ސިއްހަތު ރަނގަޅު އަންހެން ކުއްޖެކެވެ.
އިމްރާނަށް ދަރިއަކު ލިބުނު ހަބަރާ އެކު، ބޮލީވުޑްގެ ވަރަށް ގިނަ ފަންނާނުން ވަނީ ޓްވިޓާ މެދުވެރިކޮށް އިމްރާންގެ އާއިލާ އަށް ތަހުނިޔާ އާއި ހެޔޮއެދުމުގެ މެސެޖްތައް ފޮނުވަން ފަށައިފަ އެވެ.
ފިލްމް "ޖާނޭ ތޫ ޔާ ޖާނޭނާ" އިން 2008 ވަނަ އަހަރު ބޮލީވުޑަށް ނިކުތް އިމްރާނާއި އަވަންތިކާ ކައިވެނި ކުރީ 2011 ވަނަ އަހަރު އެވެ. އެއީ 10 އަހަރު ވަންދެން ރައްޓެހިވެގެން އުޅުމަށް ފަހު އެވެ.
އިމްރާން އެންމެ ފަހުން ބެލުންތެރިންނާ ހަމައަށް އައިސްފައި ވަނީ މިދިޔަ އަހަރުގެ ފަހުކޮޅު ރިލީޒްވި "ގޯރީ ތެރޭ ޕިޔާރް މޭ" އިންނެވެ.
އެހެން ނަމަވެސް އެ ފިލްމު ބެލުންތެރިންނަށް މާ ކަމުދާ ފިލްމަކަށް ނުވި އެވެ. އޭގެ ފަހުން އިމްރާން އުޅުނީ ފިލްމީ މަސައްކަތްތަކާ ވަރަށް ދުރުގަ އެވެ. އަންހެނުންނަށް ވަގުތު ދިނުމުގެ ގޮތުންނެވެ.