މި ވަގުތު އެއްވެސް މީހަކާ ލޯބީގެ ގޮތުން ގުޅިގެން ނޫޅޭ ކަމަށާއި ހުރިހާ އަމާޒެއް އޮތީ ފިލްމީ ކެރިއަރާ ދިމާއަށް ކަމަށް ބޮލީވުޑްގެ ބަތަލާ ނަރްގިސް ފަޙްރީ ބުނެފި އެވެ.
ރަންބީރު ކަޕޫރާ އެކު "ރޮކްސްޓާ" އިން 2011 ވަނަ އަހަރު ބޮލީވުޑަށް ފުންމާލި ނަރުގިސް އާއި އުދޭ ޗޯޕްޅާ އާ ދެމެދު ހާއްސަ ގުޅުމެއް އޮންނަ ކަމަށް މީޑިއާގައި އަޑު ފެތުރިފައިވެ އެވެ. އަދި ދެ މީހުން އެކުގައި އެކި ތަންތަނުން ވެސް ފެނިފައިވެ އެވެ.
ހަމަ މިއާ އެކު 2014 ވަނަ އަހަރަށް މަރުހަބާ ކީ އިރު، އުދޭ އާއި ނަރުގިސް ވަނީ ރާއްޖޭގެ ރިސޯޓެއްގައި ޗުއްޓީ ވެސް ހޭދަކޮށްފަ އެވެ. އެ ފޮޓޯތައް ވެސް މީޑީއާގައި ވަނީ ލީކްކޮށްލައިފަ އެވެ.
އަނެއްކޮޅުން އުދޭ ދޭތެރޭ ދޭތެރެ އިން އޭނާގެ ޓްވިޓާގައި ނަރުގިސް އާ ބެހޭ ގޮތުން ތަފާތު ގޮތްގޮތަށް ވާހަކަތައް ދައްކަމުން ދެ އެވެ.
ދާދި ފަހުން އޭނާ ވަނީ ނަރުގިސްގެ ފޮޓޯއެއް ޖަހާފައިވާ ކޮފީ މަގަކާ އެކު ފޮޓޯއެއްް ނަގައި، އެ ފޮޓޯ ވެސް ޓްވިޓާގައި ޕޯސްޓްކޮށްފަ އެވެ.
އެ ފޮޓޯ އާ އެކު އުދޭ،41، ވަނީ "ނަރުގިސްއަކީ ކާކުތަ؟ އެންމެން އޭނާ އާ މަށާ އެބަ އަޅުވާ ކިޔައިގެ ވާހަކަ އެބަ ދައްކާ. އޭނަގެ ވާހަކައެއް އަހަރެން ދުވަހަކު ވެސް އަޑެއް ނާހަން" ފަދަ އިބާރާތަކާ އެކު، ފޭނުންނަށް އޮޅުވާލަން ވެސް މަސައްކަތްކޮށްފަ އެވެ.
މިކަމަށް އިޝާރާތްކޮށް ނަރުގިސް، 34، ބުނީ އުދޭއަކީ ގާތް ރައްޓެއްސެއް ކަމަށާއި އެ ނޫން ގުޅުމެއް އޭނާ އާ އެކު ނެތް ކަމަށެވެ.
"އެހެން ނޫނަސް ދެން އުދޭއަކީ ވަރަށް މަޖާ މިޒާޖެއްގެ މީހެއް. އޭނާ އަބަދު ވެސް އުޅޭނެ އަހަންނަށް ޓީޒް ކުރަން. އެއީ މާ ބޮޑު ކަމެއް ނޫން. އެކަހަލަ ކަންތައްތަކެއް އަހަރެން އަޅެއެއްް ވެސް ނުލަން،" ދޫމް ފްރެންޗައިޒްގައި "އަލީ" ގެ ކެރެކްޓާ ކުޅޭ އުދޭ އާ ބެހޭ ގޮތުން ނަރުގިސް ބުންޏެވެ. "އެހެންވެ ބުނެލަން އޮތީ އަހަރެން ނޫޅެމޭ އުދޭއަކާ ރައްޓެހިވެގެންނެއް. އަަހަރެން މިހިރީ ހުސްކޮށް. ލޯބިވެރިއަކު ނެތް މި ވަގުތަކު."
"ރޮކްސްޓާ" އަށް ފަހު ނަރުގިސްގެ ދެ ފިލްމެއް ބެލުންތެރިންނާ ހަމައަށް މިހާރު ވަނީ އައިސްފަ އެވެ. އެއީ މިދިޔަ އަހަރު ނިކުތް "މެޑްރާސް ކެފޭ" އާއި މި އަހަރު ނިކުތް "މޭ ތޭރާ ހީރޯ" އެވެ.
ނިއުޔޯކަށް އުފަން ނަރުގިސް މިހާރު އުޅެނީ ހޮލީވުޑްގެ ފިލްމެއްގެ މަސައްކަތުގައި ބިޒީކޮށެވެ. އެއީ "ސްޕައި" އެވެ.
އަންނަ އަހަރުގެ މެއި މަހު ރިލީޒް ކުރަން ހަމަޖެހިފައިވާ މި ފިލްމުގައި ނަރްގިސް ފެނިގެން ދާނީ ޖޫޑް ލޯ، މިރިންޑާ ހާޓް، މެލީސާ މެކާތީ އަދި ޖޭސަން ސްޓެތަމް ފަދަ ތަރިންނާ އެކުގަ އެވެ.
މީގެ އިތުރުން "ސާހަސަމް" ކިޔާ ތަމަޅަ ފިލްމަކަށް ވެސް ނަރުގިސް ސޮއިކޮށްފައިވެ އެވެ.