އައިލެންޑް ޓީވީއަކީ އައްޑޫ ސިޓީގެ ބޮޑު ބަޔަކަށް ކޭބަލް ޓީވީގެ ހިދުމަތް ހަމައެކަނި ފޯރުކޮށްދޭ ކުންފުންޏެވެ.
ނަމަވެސް އެތަނުގެ ޚިދުމަތްތަކާ މެދު އެއް ދުވަހުން އަނެއް ދުވަހަށް ރައްޔިތުން ދަނީ ހިތްހަމަނުޖެހުން ފާޅު ކުރަމުންނެވެ.
ނަގާ ފީއާ އެއްވަރުގެ ޚިދުމަތެއް ފޯރުކޮށް ނުދެވޭ އިރު ފީ ނުދެއްކި އެންމެ މިނިޓެއް ހިސާބު ލަސްވާ އިރަށް ވެސް ޚިދުމަތް ކަނޑާލަ އެވެ.
އައްޑު އަށް ޑިޖިޓަލްކޮށް ޓީވީ ޚިދުމަތް ދޭން އެމީހުން މަސައްކަތް ކުރާތާ މިހާރު ގާތްގަނޑަކަށް ދެ އަހަރަށް ވުރެ ގިނަ ދުވަސް ވެއްޖެ އެވެ. ނަމަވެސް އަދި އެ ޚިދުމަތް އެކަށީގެންވާ ގޮތެއްގައި އަދިވެސް ފޯރުކޮށެއް ނުދެވެ އެވެ.
މިހާރު ވެސް 34 ޗެނެލްގެ ޕެކޭޖަކަށް ކޮންމެ ޑިކޯޑަރަކުން 300 ރުފިޔާގެ ފީއެއް ނަގަ އެވެ. ނަމަވެސް މީގެ ތެރެއިން ވެސް ގިނަ ޗެނެލްތަކުން ގިނަ ދުވަސް ދުވަހު ޚިދުމަތް ނުލިބެ އެވެ. އޭގެ ތެރޭ ޗެނެލް 1 އިން އެއްގޮތަކަށް ވެސް އެއްވެސް އެއްޗެއް ނުފެނެ އެވެ. ޗެނެލް 2 އަދި 27 އިން ވެސް ފެންނަނީ ރާއްޖެ ޓީވީ އެވެ.
ޗެނެލް 26 (އޭއެކްސްއެން) އިން މަންޒަރެއް ފެނުނެއް ކަމަކު ނަމަ އަޑެއް ނުހުރެ އެވެ. އައްޑޫގައި ގައިމު ތިބީ ބީރު މީހުންނެއް ނޫނެވެ. އަޑު ރަނގަޅު ނަމަ މަންޒަރެއް ނުފެނެ އެވެ. ޗެނެލް 13 އަދި ޗެނެލް 30 އިން ފެންނަނީ "ޗެނަލް 13" އެވެ.
ޗެނެލް 34 އިން އަންނަ "އަލްޖަޒީރާ" އަބަދުވެސް ފެންނަނީ އެހާ ނުސާފުކޮށެވެ. ޗެނަލް 33 އިން ވެސް އެއްވެސް އެއްޗެއް ނުފެންނަތާ ދުވަސް ކޮޅެއްވެއްޖެ އެވެ. މި ހުރިހާ ކަމެއްގެ ޝަކުވާ އައިލެންޑް ޓީވީ ފޭދޫ ހުންނަ އޮފީހަށް ހުށަހެޅުމުން އެތަނުން ކަސްޓަމަރުންނަށް އަންގަނީ މާލެ އަށް ގުޅާފައި ފޯލްޓް ރިޕޯޓް ކުރުމަށެވެ. އެތަނަށް ގުޅި ކަމުގައި ވިޔަސް ދުވަހަކު ވެސް އެދެވޭ ހައްލެއް ނުލިބެ އެވެ.
ޓީވީއެމް ޗެނެލް އަބަދުވެސް ވަރަށް ސާފުކޮށް އައިލެންޑް ޓީވީ ޑީކޯޑަރު މެދުވެރިކޮށް ފެނެ އެވެ.
ދިވެހިންނަކީ އަބަދުވެސް ފުޓްބޯޅަ އަށް ލޯބިކުރާ ބައެއްކަމުން ރޭގެ ވަރަށް ގިނަ މީހުން ވޯލްޑްކަޕް މެޗަތައް ބަލަން އެކި ހިސާބުތަކުގައި ސްކްރީން ބަހައްޓާ ތައްޔާރުވެ އެންމެ މުހިއްމު ވަގުތު ޖެހުނު އިރު އެ ޗެނެލްގެ ޚިދުމަތް ވެސް ވަގުތުން ކަނޑާލި އެވެ. އަދި "ވީޓީވީ"ގެ ޚިދުމަތް ވެސް ވަކި ހިސާބަކުން "ފިތުނީ" އެވެ.
އެކަމާ އައިލެންޑް ޓީވީ އަށް އެތައް ބަޔަކު ގުޅި އެވެ. ޖަވާބަކީ މިހާރު ޑިޖިޓަލް ކުރުމުން ނުފެންނަނީ ކަމަށެވެ. މެޗްތައް ބަލަން ބޭނުން ނަމަ އަވަހަށް ޑިޖިޓަލް ޑިކޯޑަރެއް ހޯދުމަށް ބުނެ ފޯނު ބާއްވަ އެވެ. އަނެއްކާ ވެސް އެތަނަށް އެތައް ވަރަކުން ގުޅުމުން އެންގީ މިހާރު ހިތަދު އަށް ޑިޖިޓަލް ޑިކޯޑަރު ދޫކޮށްފައިވާ ކަމަށެވެ.
މަރަދޫ، މަރަދޫފޭދޫ އަދި ފޭދު އަށް ޑިޖިޓަލް ޑިކޯޑަރުތައް އާއްދީއްތަ ދުވަހު ދޫކުރާނެ ކަމެށެވެ. އަގަކީ 699ރ. އެވެ. އޭރު ވޯލްޑްކަޕް ބަލަން އެތައް ބަޔަކު ތިބީ ކެތް މަދުވެފަ އެވެ.
ހިދުމަތް ނުދެވުނަސް ވަރި ހަަމަ އެވެ. އައިލެންޑް ޓީވީ އަބަދު ވެސް ބަލަނީ ރައްޔިތުންގެ އަތުން "ލާރި ކެވޭތޯ" އެވެ. އެހެން ނޫން ކަމަށްވާ ނަމަ މިއޮތް ހުރިހާ ދުވަހު ޑިޖިޓަލްކޮށްފައި ހިދުމަތް ރަނގަޅު ކުރަންވީ ނޫންތޯ އެވެ؟ މިއޮތީ ރަނގަޅަށް ވެސް ވޯލްޑް ކަޕާ އެކު އައްޑޫ ރައްޔިތުން "ޑިޖިޓަލްކޮށްފަ" އެވެ.
މިހާރު އަސްލު ހަދަން އުޅޭ އެއްްޗަކީ އެ ބުނާ ޑިޖިޓަލް ރިސީވަރެއް ގަތުމަށް ކަސްޓަމަރުންނަށް މަޖުބޫރު ކުރުމެވެ. ލާރި ފޮއްޗެއް އޮތް ބަޔަކު ނަމަ، ރޯދަ މަސް ވެސް ބޯމަތިވެފައި ވަނިކޮށް އެ ރިސީވަރު މި ދަނޑިވަޅުގައި ގަނެގެން ވޯލްޑް ކަޕްގެ މެޗްތައް ބަލަންވީ އެވެ.
އެ ނޫން އިތުރު ގޮތެއް ކަސްޓަމަރުންނަށް ނެތްކަން އެނގޭތީ ހަގީގަތުގައި އަައިލެންޑް ޓީވީން ރައްޔިތުން "ފެލަނީ" އެވެ. ހިދުމަތް އޮންނަނީ އޮތް ތާނގަ އެވެ. ދުވަހަކު ވެސް ހިދުމަތް ރަނގަޅު ވާ ތަނެއް ނާދެ އެވެ.
މިކަމަކާ ހަދާނެ ނަހަދާ ގޮތެއް ނޭގިގެން އެކި މީހުން އެކި ތަންތަނަށް ގުޅަނީ އެވެ. ޓީވީއެމް އަށް ގުޅުމުން އެތަނުން އެންގީ އައިލެންޑް ޓީވީ އިން ޚިދުމަތް ކަނޑައިގެން ނުވާނެ ކަމަށެވެ. ރައްޔިތުންނަށް އެ ޚިދުމަތް ދިނުމަށް އައިލެންޑް ޓީވީ އާ އޮންނާނީ މަޝްވަރާ ކުރެވި ހުރިހާ ކަމެއް ހަމަޖެހިފައި ކަމަށެވެ.
އެ ވާހަކަ އައިލެން ޓީވީ އަށް ގުޅާފަ ބުނުމުން އެންގީ ކުޑަ ޓެކްނިކަލް މައްސަލައެއް ޖެހިގެން އުޅޭ ވާހަކަ އެވެ. މިހާރު އެކަންތައް ބަލަމުން އަންނަ ކަމަށެވެ. މެޗް ފެށެން ގާތްގަނޑަކަށް 15 މިނިޓެއް ވެފައި ވަނިކޮށް ޓީވީއެމް ގެ ސިގްނަލް ލިބެން ފެށިއެވެ. ނަމަވެސް ވަރަށް ނުސާފެވެ. ބައެއް ފަހަރު ސިގްނަލް ނުވެސް ލިބެ އެވެ.
މި ހުރިހާ ކަންތަކާ ގިނަ ރައްޔިތުން ދިޔައީ އައިލެންޑް ޓީވީއަ ށް ގުޅަމުންނެވެ. އެންމެ ފަހުން އެ މީހުން ދިން ޖަވާބަކީ ޓީވީއެމް ރިސީވަރު ހަލާކުވީ ކަމަށެވެ.
އެކަމާ އެތައް ބަޔަކު ޓީވީއެމް އަށް ގުޅިއެވެ. ފަހުން ޚަބަރު ލިބުނު ގޮތުގައި އެ ބުނާ ރިސީވަރު ހަލާކުވެއްޖެކަން އެނގުމުން ހަމަ އެވަގުތު ޓީވީއެމް އިން އެމީހުންނަށް އިތުރު ރިސީވަރެއް ފޯރުކޮށް ދިނެވެ.
ނަމަވެސް ޚިދުތަތް ލިބެމުން ދިޔައީ "އަމާ ބުނީތީ ފަރަށްދާ އުސޫލުން" ނެވެ. އައްޑޫގެ ގިނަ ރައްޔިތުން ވޯލްޑް ކަޕްގެ ފުރަތަމަ މެޗް ބެލީ އެ ހާލުގަ އެވެ. އެއީ އައިލެންޑް ޓީވީ ރޭ ރައްޔިތުންނަށް ގަސްތުގައި ދިން ލަނޑެކެވެ. މޮނޮޕޮލީގެ ނާޖާއީޒު ފައިދާ ނަގަން އުޅުނަސް މިއީ ދެން ލައްކަ ބޮޑުވަރެވެ.
އެތައް ރައްޔިތުންނަށް އާދޭހާ އެކު މައްސަލަ ހައްލުކޮށް ދޭން އެދެމުން ދިޔައިރު ވެސް އައިލެންޑް ޓީވީގެ ޚިދުމަތް ހުރީ ހަމަ އެ ފެންވަރުގަ އެވެ.
މިހާރު ވެސް ޓީވީއެމްގެ ޚިދުމަތް ލިބެމުން އަންނަނީ އެހާ ނުސާފުކޮށެވެ. ހައިރާންވާ ކަމަކީ ވޯލްޑް ކަޕް ފެށެން ކުޑަތަން ވެފައިވަނިކޮށް މީގެ ކުރިން ސާފުކޮށް ލިބެމުން ދިޔަ ޓިވީއެމްގެ ޗެންލް ނުސާފުވުމެވެ. އަނެއްކާ "ރަންނަމާރި އެޅީ" ބާވަ އެވެ؟ ހަތްތަހާ ވެސް ހިތްހަމަނުޖެހިގެން އުފެދޭ ޝަކުވާ ގިނަވުމެވެ.
ރައްޔިތުންގެ ހިތްހަމަ ނުޖެހުން އަންނަނީ އިތުރު ވަމުންނެވެ. މިހާރު އަޑު އިވޭ ގޮތުން މިއަދު (ހުކުރު) ހަވީރު 4:00 އިން 6:00 އަށް ޑިކޯޑަރު ދޫކުރާނެ އެވެ.
ނަމަވެސް މިއީ އެއްވެސް ރަސްމީ ވާހަކައެއް ނޫނެވެ. އަދި މީގެ އިތުރުން ޑިޖިޓަލް ޑިކޯޑަރު އެ މީހުން އަތުން ގަނެގެން ބޭނުން ކުރާ މީހުންގެ ޝަކުވާއަކީ ސިގްނަލް އިރު އިރު ކޮޅާ ނުލިބޭ ޝަކުވާ އެވެ.
ރައްޔިތުން ގަބޫލު ކުރާ ގޮތުގައި މިކަމުގައި ބްރޯޑް ކާސްޓިން ކަމިޝަނުން ފިޔަވަޅު އަޅަން ޖެހެ އެވެ. ސަބަބަކީ ގައުމީ ޓީވީގެ ޚިދުމަތް ހުރިހާ ރައްޔިތުންނަށް ފޮރުކޮށް ދޭން ޖެހެ އެވެ. ކަމިޝަނުން މިކަމުގައި އައިލެންޑް ޓީވީ އާ ވާހަކަ ދެކެވި އެއްވެސް ހާލެއްގައި ގައުމީ ޓީވީގެ ޚިދުމަތް ނުކެނޑޭނެ އުސޫލެއް ގާއިމު ކުރަން ޖެހެ އެވެ.
ގައުމީ ޓީވީގެ ޚިދުމަތް އެއްވެސް ފީއަކާ ނުލާ ރައްޔިތުންނަށް ފޯރުކޮށް ދިނުމަށް މިފަދަ ޚިދުމަތް ދޭ ތަންތަނަށް މަޖުބޫރު ކުރެވެން ޖެހޭނެ އެވެ. އަދި އެފަދައިން ކަންތައްތައް ނުދާ ނަމަ ފިޔަވަޅު ވެސް އަޅަން ޖެހޭނެ އެވެ.
ރޭގަ ދިމާވި ކަންތައްތަކަކީ ގަސްދުގައި ކޮށްފައިވާ ކަންތައްތަކެވެ. އެމީހުން ޑިޖިޓަލް ޑިކޯޑަރު ވިއްކަން ބޭނުންވި ކަމުގައި ވިޔަސް މިފަދަ އަސޫލުން ކަންތައް ކުރުމަކީ ވަރަށް ދެރަކަމެކެވެ. ނާތަހުޒީބު އަމަލެކެވެ. ކުރީ ބައިގައި ރައްޔިތުންނަށް މިކަމުގެ މަޢުލޫމާތު ފޯރުކޮށް ވަގުތު އޮތްވައި އެކަމުގައި އެ މީހުން އުޅެން ޖެހޭނެ އެވެ.
ޓީވީގެ ޚިދުމަތަކީ އަސާސީ ޚިދުމަތެއް ކަމުގައި ނުވިޔަސް ރައްޔިތުންނަށް އެކަށީގެންވާ ވަގުތު ދެވެން ޖެހޭނެ އެވެ. އަދި ހަމައެއް ވެސް އެންގުމެއް ނެތި ޚިދުމަތް ކެނޑިގެން ނުވާނެ އެވެ. މިއީ ދުނިޔޭގެ އެއްވެސް ގައުމެއްގައި ކަން ހިނގާނެ އުސޫލެއް ނޫނެވެ. ރައްޔިތުން ދަނީ އެމީހުން އެ ބުނާ ވަރަކަށް ބަރާބަރަށް އެ ޚިދުމަތަށް ފައިސާ ދައްކަމުންނެވެ.
ތި ފެންވަރުގައި އައިލެންޑް ޓީވީން ހިދުމަތް ދޭ ނަމަ ކަމަށްވާ ނަމަ ކަސްޓަމަރުން އެ ކުންފުންޏެއް އެވޯޑެއް ވެސް އަރުވަން ޖެހިދާނެ އެވެ. ވަރަށް ބޮޑަށް ޝުކުރިއްޔާ އެވެ.
ކިތަންމެ ދޯދިޔާކޮށް ޚިދުމަތް ދެވޭއިރުވެސް ރައްޔިތުން އަތުން ބަރާބަރަށް ފީ ނަގައި ޚިދުމަތް ދޭ ކުންފުނިތަކުގެ ވެރިން ތިބެނީ ހެވިލާފައި އުފަލުގަ އެވެ.
އެ މީހުންނަށް ހަމަ އެ އުފާވެރިކަން ހައްޤު ބާވަ އެވެ؟ ގިނަ ފަހަރަށް އެފަދަ ވެރިންނަށް ކަހާތަން ހިރުވާ ވެސް ނުލަ އެވެ.
އެންމެ ފަހުން ނިމި ދިޔަ 2010 ވަނަ އަހަރުގެ ވޯލްޑް ކަޕްގެ ފުރަތަމަ މެޗްވެސް އައްޑޫ ރައްޔިތުން ބެލީ މި ހާލުގަ އެވެ.
ނަމަވެސް އިންޑިއާގެ އެއަޓެލް ނުވަތަ ޓާޓާ ސްކައި ޕެކޭޖް އައިލެންޑް ޓީވީން ދޭ ޚިތުމަތަށް ވުރެ އެތައް ގުނައެއް އަގު ހެޔޮކޮށް މީހުން ގެނެސް އޭގެ ޚިދުމަތް ހޯދާއިރަށް ކޯޓްތަކަށް ދުވެ އެކި ދިމަ ދިމާލަށް ދުއްވައި ގަންނަކަމީ އަޅެ ހެއްވާ ޖޯކެއް ނޫންބާއޭ ހިތަށް އަރަ އެވެ.