ވިޔަފާރި ސްޓަންޓަކީ ވިޔަފާރިވެރިން އެމީހުންގެ އުފެއްދުންތައް ބާޒާރަށް ނެރެ ވިއްކުމުގައި ގެންގުޅޭ ވަރަށް ކާމިޔާބު އުކުޅުތަކެކެވެ.
މީހުންގެ ސަމާލުކަން ހޯދާ އަދި އެ އުފެއްދުންތަކަށް މީހުން ލޯބި ޖެހޭނޭ ގޮތްގޮތަށް އިޝްތިހާރު ކުރުމަކީ ވަރަށް އާންމު ކަމެކެވެ. އިންޑިއާގެ ޓީވީ ޗެނެލަކުން ދައްކާ ޕްރޮގްރާމެއް ބަލާލަން ފަސް މިނިޓް މަޑުކޮށްލި ކަމުގައި ވިޔަސް އެފަދަ އެތައް ސްޓަންޓް ތަކެއް ފެނިގެން ދާނެ އެވެ.
ރާއްޖޭގައި ވެސް ވިޔާފާރީގެ މޮޅު ސްޓަންޓްތައް ހަދަ އެވެ. ނަމަވެސް އައްޑޫގަ ކޭބަލް ޓީވީގެ ޚިދުމަތްދޭ "އައިލެންޑް ޓީވީ" އިން އިއްޔެ ޖެއްސި ސްޓަންޓަކީ ވަރަށް ތަފާތު ސްޓަންޓަކެވެ. އެ މީހުންގެ އުފެއްދުން އިޝްތިހާރު ކުރުމެއް ނެތި އިއްޔެ އެ ހިންގި ހަރަކާތަކީ އަޖައިބެއް ފަދަ ސްޓަންޓަކެވެ. އެހެން ގޮތަކަށް ބުނާ ނަމަ އެއީ ކަސްޓަމަރުން "ފެލައިލުމެވެ."
ދުވަސްވަރުގެ އޮއިވަރު ބަލާފައި އޭގެ ނާޖާއިޒު ފައިދާ އެތައް ގުނައަކަށް ޖައްސާލި މި ސްޓަންޓަކީ އައްޑޫ ރައްޔިތުންނަށް ލިބުނު ހިތި ބޭހެކެވެ. ރޯދަ މަހަށް އެކި ފެންވަރުގައި މީހުން އެ މީހުންގެ ގެދޮރު ޒީނަތްތެރި ކުރުމާ އަދި ބަދިގޭ ސާމާން ގަންނަމުން ދިޔަ މި ދުވަސް ކޮޅުގައި އެ މީހުންނަށް މަޖުބޫރު ކުރުވި މިސްޓަންޓުގެ ހިތިކަން ވަރަށް ބޮޑެވެ.
ގިނަ މީ ހުން މިސްޓަންޓުގައި ބައިވެރިވީ އެކި މީސްމީހުންނަށާއި އަދި ބައެއް ރަހުމަތްތެރިންނަށް ސަލާމް ޖަހާ 699ރ. ހޯދައިގެންނެވެ. ނޫން ނަމަ ކުރަން ހަމަޖައްސާފައި އޮތް މުހިއްމު އެތައްކަ މެއް ފަސްކޮށްލައިފަ އެވެ.
ނަމަވެސް ވޯލްޑް ކަޕް ފުޓްބޯލް މެޗްތައް ވަގުތުން ބަލާލުމަކީ އަބަދު ވެސް ރާއްޖޭގެ ވަރަށް ގިނަ ރައްޔިތުން އެދޭ ކަމެކެވެ. ރާއްޖޭގެ ހުރިހާ މީހުންގެ ވެސް ކުޅިވަރު ލޭނާރަކީ ފުޓްބޯޅަ އެވެ. އައިލެންޑް ޓީވީ އިން ތިބީ މިކަމަށް ވަރަށް ބޮޑަށް ތައްޔާރުވެ އެކަމަކު "ބޮނދައިފަ" އެވެ. އާއްމުންނަށް ވަސްވެސް ދައްކާ ލުމެއްނެތި އެވެ. ހީލަތްތެރި ރޭވުމަކާ އެކުގަ އެވެ.
ވޯލްޑް ކަޕްގެ މެޗްތައް ބަލާލުމުގެ ފޯރީގައި އެތައް ބަޔަކު ތިއްބާ ވޯލްޑް ކަޕްގެ މެޗްތައް ފެށެން ކުޑަތަންވެފައި ވަނިކޮށް އެ މެޗްތައް ފެންނަން ހުރި ހުރިހާ ޗެނެލްތަކެއް ފްރީޒްވެގެން ދިޔަތަން ބަލަން ތިބި އެތައް ބަޔަކަށް ލިބުނީ ބޮޑު ޝޮކެކެވެ.
ނަމަވެސް އެތައް ބައެއްގެ ހިތާމައާއި ނަފްރަތުގެ ފޯންކޯލްތަކުން ކޮންމެވެސް ވަރެއްގެ ފިނިކަމެއް ހިތަށް ލިބުނެވެ. "އަމާ ބުނީތީ ފަރަށް ދާ" ބީދައިންނެވެ.
އައިލެންޑް ޓީވީއަކީ މޮނޮޕްލައިޒްކޮށް އައްޑޫގައި ޓީވީ ޚިދުމަތް ދޭ ހަމައެކަނި ތަނެވެ. އެ މީހުން ބުނި އަގެއް ދީގެން ނަގާފައިވާ ޗެނެލްތައް އެއްވެސް އެންގުމެއް ނެތި އެ މީހުން ފްރީޒްކޮށްލަ އެވެ. އާންމުންގެ އެއްވެސް ކުށެއްނެތި އެވެ. ލިބުނުހާ ވެސް ޖަވާބަކީ ޓެކްނިކަލް މައްސަލައެއްގެ ވާހަކައެވެ. އުފެދޭ ސުވާލަކީ ޓެކްނިކަލް މައްސަލަ ދިމާވީ ހަމަ އެކަނި އެޗެނެލްތަކަށް ވީކަމެވެ.
މެޗް ފެށެން 15 ވަރަކަށް މިނިޓް ވެފައި ވަނިކޮށް ޓީވީއެމްގެ ސިގްންލް ލިބުނުއިރު އެ ޗެނެލް ވަރަށް ނުސާފެވެ. ބައެއް ގޭގަ އަށް ސިގްނަލް ދަށްކަމުން މެޗް ބަލާލަން ޖެހުނީ ވާރަށް ހާލުންނެވެ.
ޖެހިގެން އައި ދުވަހު (އިއްޔެ) އިވެން ފެށީ އެދުވަހުގެ ހަވީރު 4:00 އިން ފެށިގެން ޑިޖިޓަލް ޑިކޯޑަރު އައިލެންޑް ޓީވީން ދޫކުރާ ކަމުގެ ޚަބަރެވެ.
އެ ގުޅާލުމުން މެޗްތައް ބަރާބަރަށް ފެންނާނެކަމުގެ ޚަބަރެވެ. ވޯލްޑް ކަޕް ބަލާލަން ކެތް މަދުވެފައިވާ އެތައް ބަޔަކު 4:00 ޖެހުމުގެ ކުރިން އައިލެން ޓީވީ ފޭދޫ އޮފީސް ކައިރީ ކިއު ހެދި އެވެ. އަދި ގަޑި ޖެހުމާ އެކު އޮފީސް ހުޅުވުނެވެ.
ކޮންމެ ބޭފުޅަކު ވެސް ޖެހުނީ ފޯމެއް ފުރާށެވެ. ފޯމެއް ފުރުމާ އެކު ނަންބަރެއް ދެ އެވެ. އަދި ކޮންމެ ނަންބަރަކަށް ދެ ޑިކޯޑަރު ލިބޭނެ ކަމަށް އެންގި އެވެ. އެތައް ބަޔަކު ދިޔައީ ނަންބަރު ކިޔާފައި ގޮވާލާނެ ވަގުތަކަށް އިންތިޒާރު ކުރަމުންނެވެ.
ހަވީރު 6:00 ޖެހި ފަހުން ފުރަތަމަ ނަންބަރަށް ޚިދުމަތް ދިނުމަށް ގޮވާލި އެވެ. މީހުންތައް އޮތީ އޮފީސްތެރޭ ފުރި ބާރުވެފަ އެވެ.
ރޭގަނޑު 9:00 ޖެހި އިރު ވެސް އަދި އެތަނުން މީހުން މަދެއް ނުވި އެވެ. ޑިކޯޑަރު ދޫކުރުމަށްފަހު "އައިސް ޓީވީ" ޗެނެލް އިން މެޗް ގަޑިތަކުގައި މެޗްތައް ފެންނާނެ ކަމަށް ޑިކޯޑަރު ޓެސްކޮށްފައި ހަވާލު ކުރާ އިރު ކަސްޓަމަރުންނަށް ދިޔައީ އަންގަމުންނެވެ.
ވޯލްޑް ކަޕްގެ ދެވަނަ މެޗް ރޭގަނޑު 9:00 ޖެހި އިރު ފެށުނެވެ. ޑިޖިޓަލް ޑިކޯޑަރު ނުލިބުނު މީހުން މޮޅިވެރިކަމާ އެކު ކިތަންމެ ނުސާފު ނަމަވެސް ޓީވީއެމް މެޗް ބަލާލުމަށް ޓީވީ ޖައްސާލި އެވެ.
ނަމަވެސް މަންޒަރާއި ކުލަ ވަރަށް ތަފާތެވެ. ޓީވީ މޯލްޑިވްސްގެ ޗެނެލް ކުރިއަށް ވުރެ މާ ބޮޑުތަން ސާފުވެފައި ރީއްޗެވެ. މި ޚަބަރު ލިބުމާ އެކު ކިއޫގައި ތިބި ބައެއް މީހުން އަވަހަށް ގެއަށް އަ އެވެ. އަވަހަށް ޓީވީއެމުން މެޗް ބަލަން ފެށި އެވެ. ޑިޖިޓަލް ޑިކޯޑަރު ގަނެގެން އައިސް އެ ގުޅި އެއްވެސް ފަރާތަކަށް އަދިވެސް ޓީވީއެމް ގެ ޚިދުމަތެއް ނުލިބެ އެވެ. އަދި ވީޓީވީގެ ޚިދުމަތެއް ވެސް ނުލިބެ އެވެ.
އަޅެ ފަހެ މީ ކޮން ފަދަ ކަމެއް ހެއްޔެވެ؟ އައިލެންޑް ޓީވީން ޑިކޯޑަރު ވިއްކުމަށް މި ޖެއްސި ސްޓަންޓަކީ ހަމަ ބޮޑު އޮޅުވާލުމެކެވެ. މި އޮޅުވާލީ ރައްޔިތުންނަށެވެ. ނަމަވެސް ނިކަމެތި ރައްޔިތު މީހާ ކުރާނެ އެއް ކަމެއް ވެސް ނެތެވެ.
އެ މީހުން އެކަންތައް ކުރަމުން އަންނަނީ ހިތުހުރި ގޮތަކަށެވެ. އަޅާލާނެ މުއައްސަސާއެއް ނެތްތާގައި އެއްވެސް މީޑިއާއެއްގެ ފަލަ ސުރުޚީއަކަށް ވެސް މިކަމުގެ ސަމާލުކަން ނައި ކަމީ ހިތާމަ ކުރަން ޖެހޭ ކަމެކެވެ.
މިކަންތައްތައް މޮނީޓަކޮށް ބެލެހެއްޓުމަށް މުއައްސަސާތައް ހުރެ އެވެ. ނަމަވެސް ރާއްޖެތެރޭގެ ވެއްޖެ ނަމަ އެ މީހުން ބަލާ މިންގަނޑު ތަފާތުވާހެން ހީވެ އެވެ.
މާލޭގައި ނަމަ އެ މުއައްސަސާތަކުގެ މީހުން ބަޔާންތައް ނެރެ މުޅި މީޑިއާގައި އެ ބަޔާންތައް ފަތުރާލީހެވެ. ނަމަވެސް ރާއްޖެތެރެވުމުން ހިލަމެއް ވެސް ނެތެވެ. ރާއްޖެތެރޭ މީހުން އަދިވެސް ކުޅަނދު މަދީ ކަންނޭނގެ އެވެ.
ވިޔަފާރީގެ އުސޫލުން "އައިލެންޑް ޓީވީ" ގެ ސްޓަންޓް ކާމިޔާބެވެ. ވިޔަފާރި ފައިދާ މިލި އަނުން ގުނާލައިފިއެވެ. ރައްޔިތުން މަޅީގައި ޖެހި އޮޅުނީ އެވެ. ކުރާނެ ކަމެއް ނެތެވެ. ތިޔަ ހެދި އުކުޅަށް ހަމަ "ސާބަހެވެ."