މި އަހަރުގެ ސާފް ޗެމްޕިއަންޝިޕް އެ މުބާރާތުގެ އެންމެ ފަހުގެ ޗެމްޕިއަން އިންޑިއާގައި ބާއްވަން ނިންމައިފި އެވެ.
އެ ގައުމުގައި މުބާރާތް ބާއްވަން ތާވަލުކޮށްފައި ވަނީ ޖޫން 20 އިން ޖުލައި 3 އަށެވެ. ސާފް ޗެމްޕިއަންޝިޕް އިންޑިއާގައި ބާއްވަން ނިންމުމާ ގުޅިގެން އެ ގައުމުގެ ފުޓްބޯޅަ ފެޑެރޭޝަނުން ބުނީ މުބާރާތް ބާއްވާނެ ސިޓީއެއް އަންނަ މަހުގެ ތެރޭގައި އިއުލާންކުރާނެ ކަމަށެވެ.
މި އަހަރުގެ މުބާރާތް ބާއްވަން އަވައްޓެރި ލަންކާ އިން ވެސް ކުރިން ޝައުގުވެރިކަން ފާޅު ކުރި އެވެ. ނަމަވެސް އެ ގައުމުގެ ފުޓްބޯޅަ ފެޑެރޭޝަނަށް ސިޔާސީ ނުފޫޒު ފޯރުވުމުން ފީފާ ވނީ ލަންކާ ފުޓްބޯޅަ އިން ސަސްޕެންޑްކޮށްފަ އެވެ. އެހެންވެ މުބާރާތް ބޭއްވުމުގެ އިތުރުން ލަންކާ އަށް މުބާރާތުގައި ވާދަ ކުރެވޭނީ ވެސް ސަސްޕެންޝަން އުވައިލައިފި ނަމަ އެވެ.
ސާފް ޗެމްޕިއަންޝިޕް އެންމެ ފަހުން ބޭއްވީ 2021 ގައި ރާއްޖޭގަ އެވެ. އެ މުބާރާތުގެ ތަށި ހޯދީ އިންޑިއާއިންނެވެ.
ސާފް ޗެމްޕިއަންޝިޕަކީ ސާކް ގައުމުތަކުގެ މެދުގައި 1993 އިން ފެށިގެން ބާއްވަމުން އަންނަ މުބާރާތެކެވެ.