އަޅުގަނޑު މިއަދު ހެނދުނު 11:30 ހާއިރު ވައްކަމުގެ މައްސަލަ އެއްގައި ބަޔާނެއް ދިނުމަށް ހިތަދޫ ޕޮލިސް ސްޓޭޝަނަށް ދާން ޖެހުނެވެ. ޕޮލިސް ސްޓޭޝަނާ ހަމައަށް ދެވުނު އިރު ވަރަށް ގިނަ އަދަދެއްގެ މީހުން އެސަރަހައްދުގައި ތިބި ތަން ފެނިފައި އަޅުގަނޑަށް ހީވީ މުޒާހަރާއެއް ކަމަށެވެ.
ޒުވާންނުން ނާއި އުމުރުން ދުވަސްވީ މީހުންނެވެ. ސައިކަލުތަކާއި ކާރުތައް މަގުގެ ދެފަޅީގައި އެއްވެސް ތަރުތީބެއް ނެތި އަތުރާފައި ތިބި އެވެ.ވެގެން އުޅެނީ ކީއްތޯ ބަލާލުމަށްޓަކައި ދިއުމުގެ ބަދަލުގައި އަޅުގަނޑު ވަނީ ޕޮލިސް ސްޓޭޝަނަށެވެ.
ޕޮލިސް ސްޓޭޝަނަށް ވަދެ އެތަނުގެ ކައުންޓަރުން ދިމާވި ފުލުސް މީހާ ކުރެން ވެގެން އުޅެނީ ކީއްތޯ އޮޅުންފިލުވާލީމެވެ.
ޖަވާބު އަޑު އަހާފައި އަޅުގަނޑު ހަމަ ހަގީގަތުގައި ވެސް ލަދު ގަތެވެ. އެތަނުގައި ތިބީ އަޅުގަނޑު ނިސްބަތްވާ އައްޑޫ އަތޮޅު ހިތަދޫގެ ރައްޔިތުން ކަމަށް ވީމައެވެ. އެމީހުން އެތަނުގައި ތިބީ މުޒާހަރާއެއް ކުރުމަކަށް ނޫނެވެ.ޕޮލިސް ސްޓޭޝަނާ ޖެހިގެން ހުރި ހިތަދޫ އޮފީސް ދޮށަށް މީހުން ޖަމާވެފައި އޮތީ ޒަކާތު ފައިސާ ލިބިގަތުމަށެވެ.
ބަޔާން ދިނުމަށް ފަހު އަޅުގަނޑު އަވަސް ވެގަތީ ޒަކާތު ފައިސާ ހޯދުމަށްޓަކައި ގޮސް ތިބި މީހުންނަކީ ކޮބައިތޯ ބެލުމަށެވެ. ތިބޭފުޅާގެ ހިތްޕުޅުގައި ތިޔަ އުފެދުނު ސުވާލު އަޅުގަނޑަށް އެނގެއެވެ.
"ޒަކާތް ފައިސާ ހޯދަނީ ކޮންބައެއްތޯ ބަލަނީ އެމީހުންނަށް މަލާމާތް ކުރަން ހެއްޔެވެ؟ "
ނޫނެކެވެ ! އަޅުގަނޑު އެތަނަށް ގޮސް ތިބި އެންމެންނަށް އިޙްތިރާމް ކުރަމެވެ. ނަމަވެސް އަގު ބޮޑު ސައިކަލުތަކުގައި ގޮސް ޒަކާތު ފައިސާ ހޯދަން ގޮސް ތިބި މީހުން ބަލާލަން ބޭނުންވީއެވެ. އަޅުގަނޑަށް އެމީހުންގެ ފޮޓޯ ނެގޭނެ ފުރުސަތު ވެސް އޮތެވެ.
ނަމަވެސް އަޅުގަނޑުގެ ނަޒަރުގައި އެމީހުން ބޭޒާރު ކުރުމަކީ ރަނގަޅު ކަމެއް ނޫނެވެ. 15 ނޫނީ 10 ވަރަކަށް ހާސް ރުފިޔާގެ ސްމާޓް ފޯނެއް ހިފައިގެން 50 ހާސް ރުފިޔާގެ ސައިކަލެއްގައި ޒަކާތް ފައިސާ ހޯދަން ގޮސް ތިބީ ދެތިން މީހުންނެއް ނޫނެވެ. އެތައް ބައެކެވެ.
ތިބޭފުޅާ އަމިއްލަ ނަފްސާ ސުވާލު ކޮށްލަ ބަލާށެވެ! ދުއްވާނެ ރަނގަޅު ސައިކަލަކާއި މޮޅު ފޯނު ގަންނާނެ ލާރި ހަމަ ފަޤީރަކަށް ލިބޭނެ ހެއްޔެވެ؟ ޒަކާތަކީ ފަޤީރުންގެ ހައްގެއް ނޫންތޯ އެވެ. އަޅުގަނޑުމެންގެ ތެރެއިން ފުދުންތެރި ބަޔަކު ގޮސް ޒަކާތު ފައިސާ ހޯދަން ދިމާކުރުމުން މި މުޖްތަމަޢްގައި އެންމެ ބޮޑަށް ބޭނުންޖެހިފައި ތިބި ނިކަމެތިންނަށް ލިބެންޖެހޭ އަދަދު ކުޑަ ވެގެން ނުދޭ ހެއްޔެވެ؟
އަޅުގަނޑަކީ ވެސް މާ ތަނަވަސް ކަންމަތީ އުޅޭ މީހެއް ނޫނެވެ. ކުރަން ބޭނުން ވެގެން ނުކުރެވޭ އެތައް ކަމެއް އެބަ ތިއްބެވެ. ފައިސާ ނެތިގެންނެވެ. ޒަކާތު ފައިސާ ބަހަނީ ކީއްވެގެން ކަމާއި ޒަކާތަކީ ކޯޗެއްކަން ނޭނގޭ މީހަކު ހުންނާނެ ކަމަކަށް އަޅުގަނޑު ގަބޫލެއް ނުކުރަމެވެ.
އަޅުގަނޑުމެން އެންމެން އަޑަށް ބާރު ލާފައި ގޮވަނީ ތަރައްޤީ އޭ ކިޔާފައެވެ. ތަރައްޤީ ވާން ޖެހެނީ ފުރަތަމަ އަޅުގަނޑުމެންގެ އަމިއްލަ ނަފްސު ނޫން ހެއްޔެވެ؟