މި އަހަރުގެ އެންމެ އުންމީދީ އެއް ފިލްމް ކަމަށްވާ ސަލްމާން ހާން ލީޑް ރޯލް ކުޅޭ "ކިކް" ފިތުރު އީދު ދުވަހު ރިލީޒް ކުރާ ގޮތަށް ހަމަޖައްސައި ފިލްމުގެ ފުރަތަމަ ޓްރެއިލާ އާންމުކޮށްފި އެވެ.
އިންޑިއާގެ އިތުރުން އިނގިރޭސިވިލާތާއި ޕޮލަންޑްގައި މަންޒަރުތައް ނަގާފައިވާ މި ފިލްމުގައި ސަލްމާން ފެނިގެން ދާނީ ވަރުގަދަ އެކްޝަން މަންޒަރުތަކަކާ އެކު "ޑެވިލް" ކިޔާ ކެރެކްޓާއަކުންނެވެ.
"ކިކް" ގައި ބަތަލާގެ ރޯލް އަދާކޮށްފައި ވަނީ ސްރީ ލަންކާ އަށް އުފަން އަދި "ރޭސް 2" އާއި "މާޑާ 2" އަދި "ހައުސްފުލް 2" އިން ފެނިގެން ދިޔަ ޖެކޮލިން ފެނާންޑޭޒެވެ.
"ކިކް" އަކީ ސަލްމާނާއި ޖެކޮލިންގެ ޖޯޑް އެއް ފިލްމަކުން ފެނިގެން ދާނެ ފުރަތަމަ ފަހަރު ވެސް މެ އެވެ.
ތެލެގޫ ފިލްމެއްގެ އަސްލަކަށް ބަލައިގެން ހަދާފައިވާ "ކިކް" އަކީ "ހީރޯޕަންޓީ" އާއި "ހައުސްފުލް" ފްރެންޗައިޒްގެ އިތުރުން ވެސް ކާމިޔާބު ގިނަ ފިލްމުތަކެއް ބެލުންތެރިންނާ ހަމައަށް ގެނެސް ދީފައިވާ ޕްރޮޑިއުސަރު ސާޖިދު ނަދިއަދްވާލާގެ ފުރަތަމަ ޑައިރެކްޝަނެވެ.
މި ފިލްމުގެ ސްކްރީންޕްލޭ ތައްޔާރުކޮށްފައި ވަނީ އިންޑިއާގެ މަޝްހޫރު ލިއުންތެރިޔާ އަދި މި އަހަރުގެ ނިކުތް އެންމެ ކާމިޔާބު އެއް ފިލްމް ކަމަށްވާ "2 ސްޓޭޓްސް" ގެ ވެސް ޗެތަން ބަގަތެވެ.
އޭނާއަކީ "3 އިޑިއަޓްސް" އާއި "ކައި ޕޯ ޗޭ" ގެ ވެސް ރައިޓަރެވެ.
ސާޖިދުގެ ނަދިއަދްވާލާ ގްރޭންޑްސަން އެންޓަޓައިންމަންޓާއި ޔޫޓީވީ ގުޅިގެން އުފައްދާފައިވާ "ކިކް" ގެ މުހިއްމު ރޯލްތަކުން ރަންދީޕް ހޫޑާ އާއި ނަވާޒުއްދީން ސިއްދީގް ވެސް ފެނިގެން ދާނެ އެވެ.