އައްޑޫގައި ހޭންޑް ފުޓް އެންޑް މައުތު ޑިޒީސް ފެތުރެމުންދާތީ އެކަމަށް ވީހާ ވެސް ބޮޑަށް ސަމާލުވުމަށް އައްޑޫ ޕަބްލިކް ހެލްތު ޔުނިޓުން އިލްތިމާސްފި އެވެ.
އައްޑޫގެ ބައެއް ޕްރީ ސްކޫލްތަކުގެ ދަރިވަރުންނަށް ބަލި ޖެހިގެން ރިޕޯޓް ވެސްކޮށްފައިވެ އެވެ. އޭގެ ތެރޭގައި މަރަދޫ އުޖާލާ ޕްރީ ސްކޫލާއި ހިތަދޫ ކެންގަރޫ ކިޑްސް ހިމެނެ އެވެ.
ބައްޔާ ގުޅިގެން އުޖާލާ ޕްރީ ސްކޫލް ފަސް ވަރަަކަށް ދުވަހަށް ބަންދު ކުރުމަށް ފަހު، މިހާރު ވަނީ ހުޅުވާފަ އެވެ.
ޕަބްލިކް ހެލްތު ޔުނިޓުން ވަނީ ބަލި ޖެހިިފައިވާ ކުދިން ސްކޫލަށް ނުފޮނުވުމަށާއި، އެ ބަލީގެ އަލާމާތެއް ފެނިއްޖެ ނަމަ ވީހާ ވެސް އަވަހަކަށް ޑޮކްޓަރަށް ދެއްކުމަށް ވެސް އިލްތިމާސްކޮށްފަ އެވެ.
އަދި ވީހާ ވެސް ބޮޑަށް ސާފު ތާހިރު ކަމަށް އިސްކަން ދީ، ވީހާ ވެސް ގިނައިން އަތް ދޮވުމަށް ވެސް އެދިފަ އެެވެ.