"ތަލާޝް" އާއި "ހަނީމޫން ޓްރެވަލްސް ޕްރައިވެޓް ލިމިޓެޑް" ފަދަ ފިލްމްތައް ބެލުންތެރިންނާ ހަމައަށް ގެނެސް ދީފައިވާ ރީމާ ކަތުގީގެ އާ ފިލްމުގެ ލީޑް ރޯލަށް ސައިފް އަލީ ހާނާއި ކަންގަނާ ރަނާވަތު ސޮއިކޮށްފައިވާ ކަމަށް މީޑިއާ ރިޕޯޓްތައް ބުނެފި އެވެ.
މި ފިލްމް ވެގެން ދާނީ ސައިފާއި ކަންގަނާ އެކުގައި ސްކްރީނުން ފެނިގެން ދާނެ ފުރަތަމަ ފިލްމަަށެވެ. އެހެންވެ މިއީ ބެލުންތެރިންނަށް އަނެެއްކާ ވެސް ތާާޒާ ޖޯޑެއް ފެނިގެން ދާނެ ފިލްމަކަށް ވާނެ އެވެ.
ރިޕޯޓްތައް ބުނާ ގޮތުން އަދި ވަކި ނަމެއް ހަމަޖައްސާފައި ނުވާ މި ފިލްމުގެ ސްކްރިޕްޓްގެ މަސައްކަތް ރީމާ މިހާރު އަންނަނީ ކުރަމުންނެވެ.
ސްކްރިޕްޓް ތައްޔާރު ކުރަނީ ރީމާ އާއި އޭނާގެ ރައިޓިން ޕާޓްނަރު އަދި ޑައިރެކްޓަރު ޒޯޔާ އަހްތަރާ ދެ މީހުންވެގެންވެ.
އެހެން ނަމަވެސް ޒޯޔާ މި ވަގުތު އުޅެނީ ސްޕެއިންގައި ވަރަށް ބިޒީކޮށް އޭނާގެ އާ ފިލްމުގެ މަސައްކަތުގަ އެވެ.
އެއީ "ދިލް ދަަޅަކް ނޭ ދޯ" ގެ މަސައްކަތުގަ އެވެ. ތަރިންނަކީ ޕްރިޔަންކާ ޗޯޕްޅާ، ރަންވީރު ސިންގް، އަނުޝްކާ ޝަރްމާ، ފަރްހާން އަހްތަރު، އަނިލް ކަޕޫރު އަދި ރާހުލް ބޯސް އެވެ.
މިއީ ބޮޑު ކާމިޔާބީއެއް ހޯދި "ޒިންދަގީ ނާ މިލޭގީ ދޮބާރާ" އަށް ފަހު ޒޯޔާ ޑައިރެކްޓް ކުރާ ފުރަތަމަ ފިލްމެވެ.
ބޮލީވުޑްގެ ރިޕޯޓްތައް ބުނާ ގޮތުން ރީމާގެ ފިލްމަކީ މުޅިން ދެ މިޒާޖެއްގެ ދެ މީހުން ދިމާވެ، އެންމެ ފަހުން އެ މީހުންގެ މެދުގައި ހިނގާ ލޯބީގެ ހާދިސާތަކެއް ދައްކުވައިދޭ ފިލްމެކެވެ.
ރީމާ އެންމެ ފަހުން ޑައިރެކްޓް ކުރި "ތަލާޝް" އަކީ ބޮކްސް އޮފީހުގައި މާ ބޮޑު ކާމިޔާބީއެއް ލިބުނު ފިލްމެއް ނޫނެވެ. އެކަމަކު ކްރިޓިކުންގެ ތައުރީފް އެ ފިލްމަށް ވަރަށް ބޮޑަށް ލިބުނެވެ.
ސިއްރުން ފުރިގެންވާ މަރުގެ ހާދިސާއެއްގެ ހަގީގަތް ހޯދަން ފުލުހަކު ކުރާ މަސައްކަތް ދައްކުވައި ދިން އެ ފިލްމުގައި ލީޑް ރޯލް ކުޅުނީ އާމިރް ހާނާއި، ރާނީ މުކަރްޖީގެ އިތުރުން ކަރީނާ ކަޕޫރެވެ.