ހިތަދޫގައި އިމާރާތްކޮށްފައިވާ ކޮންވެންޝަން ސެންޓަރު، ހައުސިން މިނިސްޓްރީގެ ބެލުމުގެ ދަށުގައި ހުރެ، މަރާމާތު ނުކޮށް ވީރާނާވާން ދޫކޮށްލި މައްސަލާގައި ޖަވާބު ދާރީ ވުމަށް ހައުސިން މިނިސްޓަރ ޑރ. މުހައްމަދު މުއިއްޒު މަޖްލިސްއަށް ހާޒިރު ކުރުމަށް އެދިވަޑައިގެންފައިވާ ކަމަށް ހިތަދޫ ދެކުނު ދާއިރާގެ މަޖްލިސް މެމްބަރު އަލީ ނިޒާރު ވިދާޅުވެއްޖެއެވެ.
އަލީ ނިޒާރު "އައްޑޫލައިވް"އަށް ވިދާޅުވީ ހައުސިން މިނިސްޓަރު މުއިއްޒު މަޖްލިސް އަށް ހާޒިރު ކުރުމަށް ނިންމީ ފާއިތުވެ ދިޔަ ސަރުކާރާއި، އަދި މި ސަރުކާރުގެ ވެސް ހައުސިން މިނިސްޓަރަކަށް މުއިއްޒު ހުންނަވައި އީސީސީ ވީރާނާވާން ދޫކޮށްލި މައްސަލާގައެވެ.
ނިޒާރު ވިދާޅުވީ ދެ އަހަރު ވެގެންދާއިރު ހައުސިން މިނިސްޓްރީން އީސީސީ ބަލަހައްޓާކަށް އެއްވެސް މަސައްކަތެއް ކޮށްފައި ނުވާކަމަށެވެ. އަދި ދައުލަތުން ބޮޑު ހަރަދެއްކޮށްފައިވާ ތަނެއް މިނިސްޓްރީގެ ސީދާ ބެލުމުގެ ދަށުން ވީރާނާވާން ދޫކޮށްލުމަކީ ބޮޑު މައްސަލައެއް ކަމަށެވެ.
މިދިޔަ ހަފްތާގައިވެސް ހައުސިން މިނިސްޓަރު މަޖްލިސްއަށް ވަނީ ހާޒިރުކޮށްފައެވެ. މީދޫ ދާއިރާގެ މެމްބަރު ރޮޒެއިނާ އާދަމް ހައުސިން މިނިސްޓަރު މަޖްލިސްއަށް ހާޒިރުކޮށް ސުވާލު ކުރަން ފެށުމުން މަޖްލިސް ހަލަބޮލިވެ، މަޖްލިސް ވަނީ ނިންމާލާފައެވެ.