އެއްގަމު ދަތުރު ފަތުރު ކުރާ އުޅަނދު ބަލައި ޗެކް ކުރާއިރު އަބަދުވެސް ފުލުހުން ބަލަމުން ދާނީ އެއްގަމު ދަތުރު ފަތުރާއި ބެހޭ ގާނޫނަށް ކަމަށް ސަދަން ޑިވިޝަން ކޮމާންޑަރ ޗީފް އިންސްޕެކްޓަރ އޮފް ޕޮލިސް އަހްމަދު ޝިފާން ވިދާޅުވެއްޖެއެވެ.
އައްޑޫ ސިޓީ ކައުންސިލުން ދުކުރާ ވެހިކަލްތަކުގެ އަހަރީ ފީ ސްޓިކާ، ފުލުހުން ބަލައި ނުގަންނާނެކަމަށް މީރާއިން ބުނުމާއި ގުޅުގެން "އައްޑޫލައިވް"އިން ދެންނެވި ސުވާލަކަށް ޖަވާބު ދެއްވަމުން ޝިފާން ވިދާޅުވީ، ފުލުހުން ބަލަމުންދާނީ އެއްގަމު ދަތުރު ފަތުރުގެ ގާނޫނުގެ ދަށުން ވެހިކަލްތައް ހުންނަންޖެހޭ މިންގަނޑަށް ފެތޭތޯއެވެ.
އެގޮތުން ބަލާ ބެލުމުގައި އަހަރީ ފީ ސްޓިކާއެއްކަމަށް ބަލާނީ، ޓްރާންސްޕޯޓް މިނިސްޓްރީން ދޫކުރާ ސްޓިކާކަމަށެވެ. އަދި މިއީ އަބަދުވެސް ފުލުހުން ބަލަމުންދާ އުސޫލްކަމަށް ޝިފާން ވިދާޅުވިއެވެ.
މިދިޔަ އަހަރުގެ ފަހު ކޮޅުންފެށިގެން އައްޑޫ ސިޓީ ކައުންސިލުން އަހަރީ ފީ ސްޓިކާ ގޮތުގައި ދޫކުރަނީ ކައުންސިލުން ތައްޔާރުކޮށްފައިވާ ސްޓިކާއެކެވެ.
ޝިފާން ވިދާޅުވީ، ގާނޫނާއި، ގަވާއިދާއި ހިލާފަށް ދުއްވާ ވެހިކަލްތައް ފުލުހުން ހުއްޓުވާނެކަމަށެވެ.
މީރާއިން ބުނީ އައްޑޫ ސިޓީ ކައުންސިލުން ދޫކޮށްފައިވާ ސްޓިކާތައް ސަރުކާރުގެ އެއްވެސް އިދާރާއަކުން ބަލައި ނުގަންނާނެކަމަށެވެ. އަދި ސައިކަލް ފަދަ ތަކެތި ވިއްކުމާއި، ޓްރެފިކް ގަވާއިދާއި ހިލާފްވުމުން ބޮޑެތި މައްސަލަތަކާއި ކުރިމަތިވާނެ ކަމަށެވެ.
އައްޑޫގައި މިހާރު ދުއްވާ ގިނަ ވެހިކަލްތަކުގައި ޖަހާފައިވަނީ ކައުންސިލްގެ ސްޓިކާތަކެވެ. އައްޑޫގެ މޭޔަރ ވިދާޅުވީ ކައުންސިލުން އަމިއްލަ ސްޓިކާ ޖަހަން ފެށީ، މީރާއިން ސްޓިކާ ދޫކުރުން ހުއްޓާލުމާއި ގުޅިގެންކަމަށެވެ. އެގޮތަށް މީރާއިން ސްޓިކާ ދޫކުރުން ހުއްޓާލީ ކައުންސިލުން ނަގާ ވެހިކަލްތަކުގެ ފީ މީރާއަށް ޖަމާ ނުކުރުމުންނެވެ.
ސޯބެ ވިދާޅުވީ ވެހިކަލް ތަކުން ނަގާ ފީ އަކީ ކައުންސިލްގެ އާމްދަނީކަމަށް ގާނޫނުގައި ބަޔާންކޮށްފައިވާ ކަމަށެވެ. އަދި އެފައިސާ މިރާއަށް ޖަމާ ކުރަން ޖެހޭ ސަބަބެއް ނެތް ކަމަށެވެ.