އައްޑޫގެ ގިނަ ރައްޔިތުންނަށް ކޭބަލް ޓީވީގެ ހިދްމަތް ދެމުން އަންނަ އައިލެންޑް ޓީވީގެ އަގުތަކަށް ބަދަލުގެނެސް ޑިޖިޓަލް ކޭބަލް ޓީވީގެ ހިދްމަތް ފަށައިފިއެވެ.
ކޭބަލް ޓީވީން އާއްމުކޮށްފައިވާ އިއްލާނެއްގައި ބުނެފައިވަނީ ޖުލައި 12އިން ފެށިގެން ކުރިން ދެމުން ދިޔަ އެނަލޮގް ހިދްމަތް ހުއްޓާލާނެކަމަށެވެ.
އައްޑޫއަށް ޑިޖިޓަލްކޮށް ފުރަތަމަ ކޭބަލް ޓީވީގެ ހިދްމަތް ފެށީ ޖޫން 12 ވަނަ ދުވަހު ފެށި ވޯލްޑް ކަޕާއި ދިމާކޮށެވެ. އަދި އެގޮތަށް ހިދްމަތް ދޭން ފެށުމުން ގިނަ ބަޔަކުވަނީ ދިގު ކިއޫ ހަދައިގެން ޑިޖިޓަލް ޑީކޯޑަރު ގަނެފައެވެ. 699 ރުފިޔާއަށް ވިއްކި ޑިޖިޓަލް ޑީކޯޑަރާއި ނުލައި 12 ޖުލައިގެ ފަހުން ހިދްމަތެއް ނުލިބޭނެ ކަން އައިލެންޑް ޓީވީންވަނީ މިހާރު އާއްްމުކޮށް އިއްލާން ކޮށްފައެވެ.
މީޑިއާ ނެޓްގެ ބެލެނިވެރިކަމުގެ ދަށުން ހިދްމަތް ދެމުން އަަންނަ އައިލެންޑް ޓީވީން ކުރިން އެނަލޮގްކޮށް 159 ރުފިޔާއަށް ދޫކޮށްފައިވާ ޕެކޭޖްގައި ހިމެނެނީ ލޯކަލް 4 ޗެނަލާއި ބީބީސީ ، ސީއެންއެން ، ކާޓޫން ނެޓްވޯކް، ސްޓަރސްޕޯޓްސް2 ، ސްޓަރގޯލްޑް. ސޮނީމެކްސް، ސްޓަރވޯލްޑް. ޖޯގްރަފީޗެނަލްއެވެ.
ނަމަވެސް ޑިޖިޓަލް ކޮށް އަލަށް ދޫކުރި ޕެކެޖްގައި ހިމެނެނީ ލޯކަލް ޗެނަލްތަކާއެކު ކާޓޫންނެޓްވޯކާއި ގުރުއާން ޗެނަލާއި ސައުދީޓީވީއެވެ. މި ޕެކޭޖް މިހާރު ވިއްކަނީ 155 ރުފިޔާއަށެވެ.
އަދި ގޯލްޑް ޕެކޭޖް 370 ރުފިޔާއަށް ވިއްކަމުން އަންނަ އިރު އެޗްޑީ ޗެނަލްތަކަކާއި އެކު 420 ޕެކޭޖެއް ވެސް ވަނީ ހިމެނިފައެވެ.
އައްޑޫގެ އާބާދީގެ ބޮޑު ބަޔަކަށް އައިލެންޑް ޓީވީން ހިދްމަތް ދެމުން އަންނަ އިރު ހިދްމަތުގެ ފެންވަރާއި، އަގުގެ މައްސަލައާއި މެދު ގިނަ ބަޔެއްގެ ފާޑު ކިއުންތައް ވަނީ އައިލެންޑް ޓީވީއަށް އަމާޒުވެފައެވެ.