މަރަދޫ ވެންބޮޅަފިށި ސްޓޭޑިއަމްގައި މިހާރު ކުރިއަަށްދާ އެސްޓިއޯ ގޯދިއްޔާ ފުޓްސަލް ކަޕްގެ ރޭގެ ފުރަތަމަ މެޗް ޒިލޮޓް ކާމިޔާބް ކޮށްފިއެވެ.
މި މުބާރާތުގެ ފޭވަރިޓުންގެ ތެރޭގައި ހިމެނޭ ފޭދޫ އެފްވައިސީ އާއި ދެކޮޅަށް ކުޅެ ޒިލޮޓް މޮޅުވީ 2-1 ލަނޑުންނެވެ. ފޯރިގަދަ ކުޅުމެއް ފެނިގެން ދިޔަ މެޗްގެ ފުރަތަމަ ހާފް ނިމުނީ ލަނޑެއް ނުޖެހި 0-0ގެ ނަތީޖާއަކުންނެވެ. މެޗްގެ ފުރަތަމަ ލަނޑު ޒިލޮޓަށް ޖަހައިދިނީ ހުސެއިން ލަޠީފްއެވެ. އެޓީމްގެ ދެވަނަ ލަނޑު ޖަހައި ދިނީ މުހައްމަދު މައުރޫފްއެވެ.
އެފްވައިސީގެ ހަމަ އެކަނި ލަނޑު މެޗް ނިމެން ދަނިކޮށް ޖަހައިދނީ އަލީ ރަޝީދްއެވެ. މެޗްގެ މޮޅު ކުޅުންތެރިއަކަށް ހޮވުނީ ގިނަ ހަމަލާ ތަކެއް ދިފާއު ކުރި ޒިލޮޓްގެ ގޯލް ކީޕަރ އަހްމަދު ސައީދުއެވެ.
ރޭގެ ދެވަނަ މެޗްގައި ފޭދޫ އެފްއާރްޓީ އާއި ހަބޭސް ބައްދަލުކުރި މެޗް 3-3 ލަނޑުން ވަނީ އެއްވަރުވެފައެވެ. އެފްއާރްޓީގެ ލަނދުތައް ޖަހާދީފައިވަނީ އަބްދުﷲ ޝިފާއު، އިބްރާހިމް އިޒްދިހާރު އަދި ޔާމީން މުހައްމަދުއެވެ.
ހަބޭސްގެ ލަނޑުތައް ޖަހާދީފައިވަނީ މުހައްމަދު ނިހާދު، އަލީ ޝިނާޒު އަދި އިބްރާހިމް އަމަން އަލީއެވެ. މޮޅު ކުޅުންތެރިއަކަށް ހޮވިފައިވަނީ އެފްއާރްޓީގެ އަބްދުﷲ ޝިފާއުއެވެ.
ރޭގެ ފަހުމެޗްގައި އަބާނީ އާއި ކްލަބް މަރަދޫ ބައްދަލުކުރި މެޗް 5-1 ލަނޑުން ކާމިޔާބް ކުރީ ކްލަބް މަރަދޫއެވެ.
މިރޭ ކުޅޭ މެޗްތައް:
21:30 ފްރެންޑްސް ކްލަބް- އީސްޓޯން
22:30 މާކަރީ ޔުނައިޓެޑް- ޓީއެފްޓީ ވޮރިއާސް
23:30 އެފްސީ ރެސްޕެކްޓް- ޔަންގް ވަންސް