އައްޑޫގައި ކްރިއަސްޓިން ދީން ފަތުރަން ބިދޭސީ ޓީޗަރުންތަކެއް މަސައްކަތް ކުރަމުންދާ ކަމަށް ބުނެ ފަތުރަމުންދާ ވާހަކަތަކަކީ އެއްވެސް ހަގީގަތެއް އޮތް ވާހަކައެއް ނޫން ކަމަށް އައްޑޫ ސިޓީ ކައުންސިލުން ބުނެފި އެވެ.
ބިދޭސީ ޓީޗަރުންތަކެއް ކްރިއަސްޓިއަން ދީން ފަތުރަމުންދާ ކަމަށް ބުނާ ސިޓީއެއް އައްޑޫގައި ދައުރުވަމުންދާ އިރު، އެ ސިޓީ ކައުންސިލާއި ފުލުހުންނަށް ވެސް ފޮނުވާފައިވެ އެވެ.
އެހެން ނަމަވެސް ސިޓީ ފޮނުވާފައި ވަނީ ކޮން ފަރާތަކުން ކަމެއް އެނގޭނެ އެއްވެސް ގޮތެއް ނެތް ކަމަށް ކައުންސިލުން ބުންޏެވެ.
އެ ސިޓީގައި ބުނެފައި ވަނީ ކްރިއަސްޓިން ދީން ފެތުރުމުގެ މަސައްކަތް އެ ޓީޗަރުން ކުރިއަށް ގެންދަނީ މަރަދޫގައި ކަމަށެވެ. އަދި އެއީ އެ ރަށު އިރުޝާދިއްޔާ ސްކޫލްގައި މަސައްކަތް ކުރާތާ ގިނަ ދުވަސްތަކެއްވެފައިވާ ޓީޗަރުންތަކެއް ކަމަށް ފާހަގަކޮށްފައިވެ އެވެ.
އެ ސިޓީގައި ވަނީ ހަތަރު ޓީޗަރެއްގެ ނަން ވެސް ފާގަހަކޮށްފަ އެވެ.
އެ ސްކޫލްގް ޕްރިންސިޕަލް މުހައްމަދު ނާސިރު ވިދާޅުވީ އެ ސްކޫލްގެ ބިދޭސީ ޓީޗަރުންތަކެއް ފަރާތުން އެފަދަ ކަމެއް ހިނގާ ކަމުގެ އެއްވެސް މައުލޫމާތެއް ދަރިވަރުންނާއި ބެލެނިވެރިންގެ ފަރާތުން ވެސް އެނގިވަޑައިގެންފައި ނެތް ކަމަށެވެ.
"އެ ކަހަލަ ވާހަކަތަކެއް ދެކެވޭ އަޑު ސްކޫލްގެ މެނޭޖްމަންޓާ ހަމައަށް ވެސް އައިސްފައި އޮތީ. އެކަމަކު މިހާތަނަކަށް އެކަހަލަ ކަމެއް ބިދޭސީ އެއްވެސް ޓީޗަރެއްގެ ފަރާތުން ހިނގާ ކަމަށް އެނގިފައެއް ނެތް،" ނާސިރު ވިދާޅުވި އެވެ. "މި ވާހަކަ އެޑިއުކޭޝަން މިނިސްޓްރީ އާ ހަމައަށް ވެސް ގޮސްގެން އެތަނުން ވެސް މީގެ އެއްވެސް ހަގީގަތެއް އޮތްތޯ އެބަ ބަލާ މިހާރު."
އައްޑޫ ޑެޕިއުޓީ މޭޔަރު އަދި މަރަދޫ ކައުންސިލަރު އަބްދުﷲ ތޮއްޔިބް މިއަދު ވިދާޅުވީ ކްރިއަސްޓިން ދީން ފަތުރަމުންދާ ކަމަށް ބުނެ ދައުރު ކުރާ ސިޓީގައި ވަނީ އެއްވެސް ހަގީގަތެއް ނެތް ބުހުތާން ވާހަކަތަކެއް ކަމަށެވެ.
"އިނގިރޭސި ބަހުން ވަރަށް ބަލިކަށިކޮށް ލިޔެފައިވާ ސިޓީއެއް އެއީ. އެ ސިޓީ ކައުންސިލަށް ލިބުނީމަ ބަލާލަން ބޭނުންވި އެއީ ކާކު ފޮނުވައިގެން އުޅޭ އެއްޗެއްތޯ. އެކަމަކު އެކަން އިނގޭނެ އެއްވެސް ގޮތެއް ސިޓީއަކު ނެތް. ހަމައެކަނި ކައުންސިލަށް އެޑްރެސްކޮށްފައި ސިޓީ ފޮނުވާފައި އޮތީ،" ތޮއްޔިބް ވިދާޅުވި އެވެ. "ކްރިއަސްޓިއަން ދީން ބަޔަކު ފަތުރާ ކަމަށްވާ ނަމަ، އެ މައުލޫމާތު އެނގޭ ބަޔަކު ސީދާ އެ މައުލޫމާތު ހިއްސާ ކުރަންވީ ނޫންތޯ؟ އޭރުން ނޫންތޯ އެކަމެއް ހުއްޓުވަން ވެސް މަސައްކަތްތަކެއް ކުރެވޭނީ."
އޭނާ އިތުރަށް ވިދާޅުވީ މިކަމަކީ އިރުޝާދިއްޔާ ސްކޫލްގައި މަސައްކަތް ކުރާ ދުވަސްވީ ތަޖުރިބާކާރު ބިދޭސީ ޓީޗަރުންތަކެއް އެތަނުން ބޭރުކޮށްލުމުގެ ބޭނުމުގައި، ދީނީ ހަރުކަށި ވިސްނުމެއް ގެންގުޅޭ ބަޔަކު ކޮށްގެން އުޅޭ ކަމެއް ކަމަށް ބެލެވޭ ކަމަށެވެ.
"މިއީ އެއްވެސް ތާކުން ތާކު ޖެހޭ ކަހަލަ ގޮތަކަށް ފަތުރާ ވާހަކައެއް ނޫން. މަރަދޫގައި މިފަދަ ކަމެއް ހިނގާ ނަމަ އަޅުގަނޑުމެންނަށް ވެސް އެކަން އެނގޭނެ ނޫންތޯ ސީދާ އަޅުގަނޑަކީ ވެސް އެ ރަށުގައި އުޅޭ މީހެއް،" ތޮއްޔިބް ވިދާޅުވި އެވެ. "މި ސިޓީ ލިބުމުން ކައުންސިލުން ވާނެ މިކަން ފުލުހުންނާ ވެސް ހިއްސާކޮށް، މި ސިޓީ ފޮނުވައިގެން އުޅޭ ފަރާތެއް ހޯދައި ދިނުމަށް އެދިފައި."
ފުލުހުންގެ ދެކުނު ޑިވިޝަންގެ ކޮމާންޑަރު ޗީފް އިންސްޕެކްޓަރު އަހުމަދު ޝިފާން މިއަދު ވިދާޅުވީ ބިދޭސީ ޓީޗަރުންތަކެއް ކްރިއަސްޓިން ދީން ފަތުރަމުންދާ ކަމަށް ބުނާ ވާހަކަތަކެއް އަޑު އަހާފައިވާ ކަމަށެވެ.
"އެހެން ނަމަވެސް މިހާ ތަނަކަށް އެފަދަ ކަމެއް ހިނގަމުންދާ ކަމުގެ އެއްވެސް ހެއްކެއް ނެތް. އެހެން ނަމަވެސް ފުލުހުން އިތުރަށް މިކަން ބަލަމުން ގެންދަނީ،" އޭނާ ވިދާޅުވި އެވެ.