އައްޑޫގެ ގުޅިފައިވާ ރަށްތަކަށް ކަރަންޓް ދިނުމަށް ބޭނުން ކުރަމުން އަންނަ ޖަނަރޭޓަރެއްގެ ޓާބޯއަށް މައްސަލަ ދިމާވެގެން، ކަރަންޓް ލޯޑް ކުޑަ ކުރުމަށް މަގު ބައްތި ނިއްވާ ގޮތަށް ނިންމައިފިއެވެ.
އިންޖީނުގޭގެ އޮފިޝަލަކު ބުނީ ޓާބޯއަށް ދިމާވެފައިވާ މައްސަލަ ހައްލު ކުރުމަށް ދެ ތިން ދުވަސް ނަގާނެކަމަށެވެ. އަދި މި މުއްދަތުގައި ދޭތެރެ ދޭތެރެއިން އެކި ސަރަހައްދު ތަކުން ކަރަންޓް ކަނޑާލަން ޖެހޭނެކަމަށެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރ މުހައްމަދު ނިމާލް ވިދާޅުވީ ރަމަޟާން މަހު ރާއްޖޭގެ އެއްވެސް ރަަށަކުން ކަރަންޓްގެ ހިދްމަތް ނުކެޑޭނެކަމަށެވެ. އަދި އެކަމަށް ފެނަކަ ކޯޕަރޭޝަނުން ތައްޔާރުވެފައިވާ ކަމަށެވެ.
ނިމާލް މިގޮތަށް ވިދާޅުވެފައިވާ އިރު އޭއެފްސީ ޗެލެންޖް ކަޕާއި ދިމާކޮށް އައްޑޫއަށް ގެނައި އިންޖީން އިންސްޓޯލްކޮށް އަދިވެސް ވަނީ ބޭނުން ކުރެވޭ ގޮތް ނުވެފައެވެ.
މައުލޫމާތު ލިބިފައިވާ ގޮތުގައި އެ އިންޖީނު ބޭނުން ނުކުރެވެނީ އެއަށް ބޭނުންވާ ޕެނަލް ބޯޑެއް ނެތިގެންނެވެ. އަދި ބޯޑު ހޯދައި އެ އިންޖީނު އިމަޖެންސީގައި ބޭނުން ކުރުމަށް އެކަށީގެންވާ މަސައްކަތެއް ނުކުރެވޭކަމަށް މައުލޫމާތު ލިބެއެވެ.
އައްޑޫގައި ކަރަންޓް ބޭނުން ކުރާ ނިސްބަތް އިތުރުވެ އިންޖީނުތަކަށް ލޯޑު ނުހިފެހެއްޓޭ އިރު ފެނަކަ ކޯޕަރޭޝަނުން މަރުކަޒީ އިންޖީނުގެ ހިންގާތާ 2 އަހަރަށް ވުރެ ގިނަ ދުވަސް ވެއްޖެއެވެ. ނަމަވެސް އަދިވެސް އިންޖީނުތަކަށް ބޭނުންވާ ސްޕެއާ ހަމަ ނުކުރެވެއެވެ.
ބައެއް ފަރާތްތަކުން ތުހުމަތު ކުރާ ގޮތުގައި އައްޑޫގެ ކަރަންޓް ހާލަތު ރަނގަޅު ކުރުމަށް ސަރުކާރާއި، ފެނަކަ ކޯޕަރޭޝަނުން އެކަށީގެންވާ މަަސައްކަތެއް ނުކުރެއެވެ.