އައްޑޫގައި ކުރިއަށް ގެންދަން ނިންމާފައިވާ ބިން ހިއްކުމުގެ މަަޝްރޫއުގެ ދަށުން އެންމެ ފުރަތަމަ ބިން ހިއްކާނީ ފޭދޫން ކަމަށް ހައުސިން މިނިސްޓަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ވިދާޅުވީ ކުރިއަށް އޮތް ހަތަރު އަހަރުގެ ތެރޭގައި އައްޑޫގެ ގުޅިފައިވާ ހަތަރު ރަށުގައި ބިން ހިއްކައި ނިންމާނެ ކަމަށެވެ.
އެ ހަތަރު ރަށަކީ ފޭދޫގެ އިތުރުން މަރަދުފޭދު އާއި މަރަދޫގެ އިތުރުން ހިތަދު އެވެ.
މިނިސްޓަރު ވިދާޅުވީ ފޭދޫ ބިން އެންމެ ފުރަތަމަ ހިއްކަން ނިންމީ، އެ ރަށަކީ ބިމުގެ ދަތިކަން ވަރަށް ބޮޑަށް ދިމާވެފައިވެ، ތޮއްޖެހިފައިވާ ރަށެއް ކަމަށް ފާހަގަ ކުރެވިފައިވާތީ ކަމަށެވެ.
އެހެންވެ ބިން ހިއްކާ އިރު، އާބާދީ ބޮޑެތި ރަށްތަކަށް އިސްކަން ދެއްވާނެ ކަމަށް ޑރ. މުއިއްޒު ވިދާޅުވި އެވެ.
އެހެން ނަމަވެސް މަސައްކަތް ފަށާނެ ދުވަހެއް މިނިސްޓަރު ވިދާޅެއް ނުވެ އެވެ.
މިނިސްޓަރު އިތުރަށް ވިދާޅުވީ ބިން ހިއްކާނީ އެ ފުރުސަތު އާންމު ފަރާތްތަކަށް ހުޅުވާލައިގެން ކަމަށެވެ. އަދި އެކަން އެގޮތަށް ކުރަނީ ބަޖެޓްގެ ތާށިކަން ހުރުމުން ކަމަށް ވެސް ވިދާޅުވި އެވެ.
އައްޑޫގެ ބިން ހިއްކާ ވާހަކަ ދައްކަނީ ކުރީގެ ރައީސް ޑރ. މުހައްމަދު ވަހީދުގެ ސަރުކާރުން ފެށިގެންނެވެ. އޭރު ބިން ހިއްކައި ދޭނެ ފަރާތެއް ހޯދަން ތަކުރާރުކޮށް ބީލަމަށް ވެސް ލި އެވެ.
އެެހެން ނަމަވެސް އައްޑޫންގެ ބިން ހިއްކަން ބަޖެޓް ކުރެވިފައި ނެތް ކަމަށް ބުނެ އޭރުގެ މަޖިލީހުން މި މަޝްރޫއު ހުއްޓާލުމަށް އަންގާފައިވެ އެވެ.