ރަމަޟާން މަހަކީ މުސްލިމުންނަށް ލިބިފައިވާ އަގުހުރި ނިޢުމަތެކެވެ. އެހެންކަމުން 1435 ވަނަ އަހަރުގެ ބަރަކާތްތެރި ރަމަޟާން މަހުގެ ދުވަސްތައް ކުރިއަށްދާ އިރު މި މަހުގެ ބޭނުމަކީ ކޮބައިކަން އަޅުގަނޑުމެން ކޮންމެ މީހަކުމެ ދެނެގަނެގެން ހުރުމަކީ ވަރަށް ވެސް މުހިއްމު ކަމެކެވެ.
އެކަމެއްގެ ބޭނުމަކީ ކޮބައިކަން ދެނެގަނެގެން މެނުވީ އޭގެ ފައިދާ އެންމެ ހެޔޮގޮތުގައި ލިބިގަތުމަކީ ނާދިރު ކަމެކެވެ.
އެހެންކަމުން "އަހަރެން ރޯދަ ހިފަނީ ކީއްވެ؟" މިސުވާލު ބަރަކާތްތެރި ރަމަޟާ ންމަސް އައުމުގެ ކުރިން ކޮންމެ މީހަކުވެސް އަމިއްލަ ނަފްސާ ކޮށްލާށެވެ. އަދި މިސުވާލުގެ ޖަވާބާމެދުވެސް ވިސްނާލާށެވެ.
އަޅުގަނޑުމެން މީހެއް ކުރެން ޣައިރު މުސްލިމަކު މި ސުވާލު ކުރުމުން ދޭނެ ޖަވާބެއް ނޭނގި އާޝޯޚުވެފައި ހުރުމަކީ މުސްލިމެެއްގެ ޙައިޞިއްޔަތުން ތިމާ ލަދުގަންނަން ޖެހޭނެ ކަމެއްކަން ޔަޤީނެވެ.
އަދި ރޯދަހި ފަނީ މުސްލިމަކަށް ވީތީއޭ ނުވަތަ މާތް ﷲ ގެ އަމުރުފުޅަށް ކިޔަމަން ވުމަށޭ ހަމައެކަނި ބުނެލުމުން ފުދޭނެ ހެއްޔެވެ؟
އަޅުގަނޑުމެން ރޯދަ ހިފާ އެންމެ މުހިންމު ސަބަބަކީ މާތް ﷲ ގެ އަމުރުފުޅަށް ފުރިހަމަ އަށް ބޯލަނބައި ކިޔަމަން ގަތުމަށްކަމީ އެއްވެސް ޝައްކެއް ހުރި ކަމެއް ނޫނެވެ.
އެހެންކަމުން ތިމާ މާތް ﷲ އަށް އީމާންވުމަށްފަހު ރޯދަ ހިފުން ތިމާގެ މައްޗަށް ވާޖިބުވީ އެވެ. އަދި މާތް ﷲ އަޅުގަނޑުމެންނަށް ކަމެއް ވާޖިބުކުރައްވައިފިނަމަ އެކަމެއްގައި ގިނަގުނަ ފައިދާތައް ވެސް އެކުލެވިގެންވާނެކަން ޔަޤީނެވެ.
އަޅުގަނޑުމެން ރޯދަ ހިފާ މައިގަނޑު އަނެއް ސަބަބަކީ ތަޤުވާވެރިވުމެވެ. މިއީ އެންމެހާ ޙަރާމް ކަންތައްތަކާއި ވިޔާނުދާ ކަންކަމުން ނަފްސު އެއްކިބާކޮށް އެކަލާނގެ އެންމެހާ އަމުރުފުޅުތަކަށް ހިތާއި ނަފްސު ފުރިހަމައަށް ކިޔަމަންތެރި ކުރުވުމެވެ. އެހެނީ ރަމަޟާން މަހަކީ ރައްކާތެރި ވުމުގެ މަހެކެވެ.
ކުދިފާފަތަކުންނާއި ބޮޑެތި ފާފަތަކުންނެވެ. ރޯދަ ހިފުމުގެ ސަބަބުން ތިމާގެ ނަފްސު ކުށްފާފަތަކަށް އަރައިނުގަނެ ކޮންޓްރޯލް ކުރުމަށް މަގުފަހިވެއެވެ.
ރޯދައިގެ ސަބަބުން ޝަހުވަތްތެރިކަން މައިތިރި ކުރުވައެވެ. އަދި އަޅުކަމާއި ޞަދަޤާތްކުރުމާއި އެކަކު އަނެކަކަށް އެހީވުމަށް އިތުރު ބާރަކަށް ވެގެންދެ އެވެ.
ކެތްތެރިކަމަށް ތިމާގެ ނަފްސު ހޭނުވުމަކީވެސް ރޯދައިގެ މުހިންމު ފައިދާއެކެވެ. މާތް ﷲ އަށް ކިޔަމަންތެރިކަން އަދާކުރުމުގައި ކެއިންބުއިމާއި، ޖިންސީ އެދުމާއި، ދުލުގެ ނުބައިކަމުންނާއި، ޙަސަދައާއި ޣީބައާއި، ރުޅިން ނަފްސު ރައްކާތެރިކޮށް ހިފެހެއްޓުމަށް ތަމްރީންކޮށްދޭ އަޅުކަމަކީ ރޯދަ އެވެ.
ފާޙިޝް ޢަމަލުތަކާއި މުންކަރާތްތަކުން ތިމާގެ ނަފްސު ރައްކާތެރި ނުކުރާނަމަ ރޯދަ ހިފުމުގެ މާނައެއްނެތެވެ. އެފަދަ މީހުންނަށް ލިބިގެންވަނީ ހަމައެކަނި ހައިހޫނުކަމެވެ.
ހަމަ މިފަދައިން ރޯދައަށް ހުރެ އެންމެ ކުޑަމިނުން ފަރުޟު ފަސް ނަމާދު ނުކުރާ ނަމަ ރޯދަ ހިފުމުގެ ބޭނުމެއް ނެތެވެ. އެހެނީ ނަމާދު ނުކުރާ މީހާގެ އަޅުކަންތައް ﷲ ޤަބޫލު ނުކުރައްވައެވެ.
ހަމައެކަނި ރޯދަ މަހު ނަމާދު ކުރާ މީހުންވެސް މުނާފިޤުކަމުގެ ކެޓަގަރީއަށް ފެތިގެން ދެއެވެ. މާތް ﷲ އަށް މަކަރު ހެދުމަށް އުޅޭ މީހުންނާއި އެ މީހުންނާ ހުރި ތަފާތަކީ ކޮބައި ހެއްޔެވެ؟
ރޯދަ ހިފުމުގެ އެހެނިހެން ފައިދާތަކުގެ ތެރޭގައި ރޯދައަށް ހުންނަ މީހާއަށް ނިކަމެތި ފަޤީރުންގެ ބަނޑުހައިހޫނުކަމުގެ އިޙްސާސްތައް ތިމާއަށް ކުރެވި އެމީހުންނަށް އެހީވުމަށް ބާރަކަށް ވެގެންދެ އެވެ.
އަދި ރޯދައިގެ ސަބަބުން ހަށިގަނޑަށް ލިބޭ ޞިއްޙީ ފައިދާތަކަކީ ވެސް އަދުގެ ޑޮކްޓަރުންގެ ހޯދުންތަކުން ހާމަވެފައިވާ ކަންކަމެވެ.
އެހެންކަމުން ރޯދައިގެ މިފަދަ ފައިދާތައް ދެނެގަތުމާއެކު ތިމާ ރޯދަހިފާ ސަބަބު ތިމާގެ ހިތުގައި ބިންވަޅު ނެގިފައި ވުމަކީ ކޮންމެހެން ބޭނުންތެރި ކަމެކެވެ.