ނަމާދަށް މިސްކިތަށް އަރާވަގުތު ވެހިކަލްތަކުގައި ސްޓިކާ ޖަހާތީ މާލެސިޓީ މޭޔަރު ޑރ. މުހައްމަދު މުއިއްޒު ނުރުހުން ފާޅުކުރައްވައިފިއެވެ.
މުއިއްޒު ކުރެއްވި ޓްވީޓެއްގައި ވިދާޅުވީ ޖަމާއަތް ގަޑީގައި، ޓެކްސީ އާއި ސައިކަލާއި އެހެނިހެން ވެހިކަލްތަކުގައި އުޅޭ ފަރާތްތަކުން ޖަމާއަތަށް އަރާފައި ފައިބަންދެން ވެހިކަލް ޕާކްކޮށްލާފައި ބޭއްވުމަކީ ސްޓިކަރ ޖަހާ ޖޫރިމަނާކުރަންޖެހޭނެ ކަމެއް ނޫން ކަމަށެވެ.
އަދި ހާއްސަކޮށް ރޯދަ މަހު އެގޮތަށް އެކަން ނުކުރެއްވުމަށް މުއިއްޒު އިލްތިމާސް ކުރައްވާފައިވެއެވެ.
ޖަމާޢަތް ގަޑީގައި، ޚާއްސަކޮށް ރޯދަމަހު، ޓެކްސީ އާއި ސައިކަލާއި އެހެނިހެން ވެހިކަލްތަކުގައި އުޅޭ ފަރާތްތަކުން ޖަމާޢަތަށް އަރާފައި ފައިބަންދެން ވެހިކަލް ޕާކްކޮށްލާފައި ބޭއްވުމަކީ ސްޓިކަރ ޖަހާ ޖޫރިމަނާކުރަންޖެހޭނެ ކަމެއްނޫން. މިގޮތަށް މިކަން ނުކުރެއްވުމަށް އިލްތިމާސް ކުރަން!
— Dr Mohamed Muizzu (@MMuizzu) March 23, 2023
މިފަހަކުން މާލެތެރޭގެ ޓްރެފިކް ފްލޯ ހަމައަކަށް އެޅުވުމަށްކަމަށް ބުނެ ފުލުހުން ސްޓިކާ ޖެހުން އިތުރުކުރުމުން އާންމުންގެ ބޮޑު ފާޑުކިޔުމެއް އަމާޒުވިއެވެ.
ފުލުހުން އަންނަނީ ރޯދަ މަހަށް ހާއްސަކޮށް މާލެ ސަރަހައްދުގެ ޓްރެފިކް ފްލޯ ބެލެހެއްޓުމަށް ހާއްސަ މަސައްކަތްތަކެއް ކުރަމުންނެވެ. އެގޮތުން މިސްކިތްތައް ހިމެނޭ ސަރަހައްދުތަކުގައި ޓްރެފިކް ފްލޯ ބެލެހެއްޓުމަށް ހާއްސަ މަސައްކަތްތަކެއް ކުރާނެކަން ފުލުހުން ހާމަކޮށްފައިވެއެވެ.