ވިކްރަމް ބަޓް ޑައިރެކްޓްކޮށް، ބިޕާޝާ ބާސޫ ލީޑް ރޯލް ކުޅެފައިވާ ފިލްމް "ކްރީޗާ" ގެ ޓްރެއިލާ މިއަދު ލޯންޗްކޮށްފި އެވެ.
އަންނަ ސެޕްޓެމްބަރު މަހުގެ 12 ގައި ސިނަމާތަކަށް އަންނަ މި ފިލްމުގައި ބިޕާޝާ އާ އެކު ބަތަލެއްގެ ގޮތުން ފެނިގެން ދާނީ ބޮލީވުޑަށް އަލަށް ތައާރަފްވާ ޕާކިސްތާނަށް އުފަން އިމްރާން އައްބާސް އެވެ.
މިއީ 2012 ގައި ނިކުތް ހިޓް ފިލްމް "ރާޒް 3ޑީ" އަށް ފަހު ވިކްރަމާއި ބިޕާޝާ އެކުގައި މަަސައްކަތް ކުރާ ފުރަތަމަ ފިލްމެވެ. "ކްރީޗާ" ގެނެސް ދެނީ 3ޑީ ފޯމެޓްގަ އެވެ.
މި ފިލްމަކީ މީގެ ކުރިން ބޮލީވުން ފެނިފައި ނުވާ ޖޯންރާއެއްގެ ފިލްމެކެވެ. އެގޮތުން ހޮލީވުޑްގެ ފިލްމްތައް ކަމަށްވާ "އެނަކޮންޑާ" އާއި "ޖުރަސިޕް ޕާކް" ފަދަ ފިލްމަތަކުން ފެންނަ ފަދަ މަހުލޫގުންތަކެއް "ކްރީޗާ" އިން ފެނިގެން ދާނެ އެވެ.