ބޮލީވުޑްގެ މަޝްހޫރު ޑައިރެކްޓަރު/ޕްރޮޑިއުސަރު ކަރަން ޖޯހަރުގެ މުމްބާއީގެ އާ ގޭގެ އާ އިންޓީރިއާ ވީޑޯއަކާއި ފޮޓޯތަކަކުން ދައްކާލައިފި އެވެ.
ވަރަށް "ކްލަސީކޮށް" އަދި "އެހާމެ ގްލެމަރަސްކޮށް" މި ގޭގެ އިންޓީރިއާ ހަދާފައި ވަނީ އެކްޓަރު ޝާހްރުކް ޚާންގެ އަންހެނުން ގޯރީ ޚާނެވެ. އޭނަ އަކީ އިންޑިއާގެ ނުފޫޒު ފަދަ އިންޓީރިއާ ޑިޒައިނަރަކެވެ. މީގެ ކުރިން ވެސް ބޮލީވުޑްގެ މަޝްހޫރު އެކިއެކި ތަރިންގެ ގޭގެ އިންޓިއާރިއާ ގޯރީ ހަދާފައިވެ އެވެ.
އާންމުކޮށްފައިވާ ކަރަންގެ އިންޓީރިއާ ދައްކުވައިދޭ ވީޑިއޯގައި ގޯރީ އާއި ކަރަންގެ ބައެއްގެ ވާހަކަތައް ވެސް ހިއްސާކޮށްފައިވެ އެވެ. އެގޮތުން ގޯރީ ބުނެފައި ވަނީ ކަރަންގެ "ލަގްޒަރީ ގޭގެ" އިންޓީރިއާ ހަދާފައި ވަނީ އަބަދު ވެސް "ޕޮޝް" އަދި އެހާމެ "ސްޓައިލިޝް" ލައިފްސްޓައިލެއް ގެންގުޅޭ ޑައިރެކްޓަރުގެ ރަހަތަކާ އެންމެ ގުޅޭ ގޮތަށް އަދި ހިތަށް ފިނިކަމާއި އަރާމުކަން އިހުސާސްކުރެވޭ ގޮތަށެވެ.
"ކުޗް ކުޗް ހޯތާ ހޭ" އާއި "ކަބީ ހުޝީ ކަބީ ޢަމް" އާއި "އޭ ދިލް ހެ މުޝްކިލް" ފަދަ ކާމިޔާބު ފިލްމުތައް ގެނެސްދިން ކަރަންގެ ކުރިއަށް އޮތް ފިލްމަކީ މި އަހަރުގެ ޖުލައި 28 އަށް ތާވަލުކޮށްފައި އޮތް "ރޮކީ އޯރް ރާނީ ކީ ޕްރޭމް ކަހާނީ" އެވެ.