މިއީ އައްޑޫގެ މަޝްހޫރު ފޮޓޯގްރާފަރެއް ކަމަށްވާ ހަސަން ނަޖުމީގެ ފޮޓޯ ނެގުމުގެ ހަޔާތުގެ ތެރެއިން އާވި ހަނދާނަކާ އެކީ އޭނަގެ އަމިއްލަ ފޭސްބުކް ޕޭޖްގައި ލިޔުނު ކުޑަވަރެއްގެ މަޒުމޫނެކެވެ. އަމިއްލަ ބައެެއް ހަނދާންތަކާއި ފޮޓޯގްރާފަރަކަށް އޭނަ އަށް ވެވުނުގެ ގޮތުގެ ވާހަކަ އާއި ރާއްޖޭގެ ރައީސެއްގެ ފޮޓޯގްރާފަރަކަށް ތަގުދީރު ނިޔާކުރި ގޮތުން ވެވުނު ވާހަކަ އެވެ.
މި ވާހަކަ މީގެ ދުވަހެއް ކުރިން ހިތަދު އަށް އުފަން ނަޖުމީ ހިއްސާކުރީ އޭނަގެ ފޮޓޯގްރަފީގެ މަސައްކަތް ފެށިގެން އައި ދުވަސްވަރުގެ ހަނދާން އާކޮށް ދިން ފޮޓޯއަކާ އެކީގަ އެވެ. ދެވަނަ ބޮޑު ހަނގުރާމައިގެ ދުވަސްވަރު އިނގިރޭސި ރޯޔަލް އެއާ ފޯސް (އާރްއޭއެފް) ގަމުގައި ތިބި ދުވަސްވަރު ރަންވޭ މަތީގައި ބައިސްކަލެއްގެ މަތީ ހުއްޓިލައިގެން އިން ފޮޓޯއަކާ އެކީގަ އެވެ.
ތިރީގައި މިއޮތީ މި ފޮޓޯއާ އެކީ ހަސަން އާކުރި ހަނދާނެވެ. ނިކަން ކިޔާލަމާ ހިނގާށެވެ. ޝައުގުވެރި ވާހަކަަތަކެކެވެ.
އޭރު ގަމުގެ ރޯޔަލް އެއާ ފޯސްގައި ހުރި އަހަރެންގެ ޓްރޭނަރު، ސްޓޭޝަން ފޮޓޯގްރާފަރު އަދިވެސް އަހަންނާ ދޭތެރެ ދޭތެރޭންޗެޓްކޮށް ހަދަ އެވެ.
އިއްޔެ އޭނާ އަހަންނަށް ފޮނުވި ލިޔުމެއްގައިވާ ގޮތުން، އޭނާއަށް އަހަރެންގެ ކިބައިން ޝައުގުވެރިކަން ފެނުނު ނަމަވެސް އަހަރެންނަށް އެއރފޯސްގައި ޕްރޮފެޝަނަލް ފޮޓޯގްރަފާރެއް ގޮތުގައި މަސައްކަތް ކުރެވިދާނެ ކަމާ މެދު އޭނާ އަށް ޝައްކުވިއެވެ. އެއީ އަހަރެންގެ އުމުރު ހަގުކަމާއި ފޮޓޯގްރަފީގެ ދާއިރާއިން މާބޮޑު ތަޖުރިބާއެއް ލިބިފައި ނުވާތީއާއި އަހަންނަށް "އެއްކަމަކަށް ކޮންސެންޓްރޭޓްކޮށްގެން އެއް ރޫޓިންއެއްގައި ހިފަހައްޓައިގެން" ނޫޅެވޭތީ އެވެ.
އެހެންވެ ކިތަންމެ ފަހަރަކު އޭނާ އަށް ސްޓްރެސް ވާން ވެސް ޖެހުނެވެ. އެކަމަކު އަހަރެންގެ ކިބައިގައި ކަންކަން ނަގައިގަނެ ވިސްނައިގަތުމުގެ ކުޅަދާނަކަން ހުރިކަމަށް އޭނާ ބުންޏެވެ.
މި ހުރިހާ ގޮންޖެހުންތަކާ އެކު ވެސް، އޭނާ އަހަންނާ މެދު ޖުމްލަ ގޮތެއްގައި ބުނެފައިވަނީ ހެޔޮ ބަސްތަކެކެވެ. އޭނަ ސިފަކުރި ގޮތުގައި އަހަންނާ އެކު ހޭދަކުރި ވަގުތުތަކަކީ ހިތްގައިމު ވަގުތުތަކެކެވެ. ދެ މީހުންނަށް ވެސް އެކަކު އަނެކަކުގެ ކިބައިން އެއްޗެހިތަކެއް ދަސްވި ކަމަށެވެ. އެހެން ނަމަވެސް އަދިވެސް އަހަރެން ދަސްކުރަން ޖެހޭ ވަރަށް ގިނަ ކަންތައްތަކެއް ހުއްޓެވެ. ޒުވާނަކަށް ވިޔަސް ފޮޓޯގްރާފަރެއްގެ ކިބައިގައި ހުންނާނެ ސިފަތަކެއް ހުރިކަމަށް އޭނާ ބުންޏެވެ.
ފަހަތަށް އެނބުރި ބަލާއިރު، މިފަދަ ތަޖުރިބާކާރު އަދި ހުނަރުވެރި ފޮޓޯގްރާފަރުންނާ އެކު މަސައްކަތް ކުރުމުގެ ފުރުޞަތު ލިބުމުން އަހަރެން ޝުކުރުވެރިވެ އުފާކުރީމެވެ. އޭރު އަހަރެންނަކީ އާދައިގެ ފުރާވަރުގެ ކުއްޖެއް ނަމަވެސް، އަހަރެންނަށް ދުވަހުން ދުވަހަށް ކުރިއެރުން ލިބެމުން ދިޔައެވެ. އަދި އެ ފޮޓޯގްރާފަރުންގެ އެހީގައި އަހަރެންގެ ހުނަރު ތަރައްގީކޮށް ފޮޓޯގްރަފީއަށް އަހަރެންގެ ކިބައިގައި ހުރި ޝައުގުވެރިކަން އިތުރުވެގެން ދިޔަ އެވެ.
ގަމުގައި މަސައްކަތް ކުރި ދުވަސްވަރު ވަރަށް މުހިއްމު އިވެންޓްތަކުގެ ފޮޓޯ ނެގުމުގެ ގިނަ ފުރުސަތުތަކެއް އަހަންނަށް ލިބުނެވެ. އެންމެ މުހިންމު މުނާސަބާތަކަކީ ކޮމާންޑިން އޮފިސަރު އެހެނިހެން އޮފިސަރުންނަށް ދެއްވާ ކުރެޑެންޝަލްތައް ހަވާލުކުރަން ބާއްވާ މުނާސަބާތަކެވެ.
އެކަންތައް ފުރިހަމައަށް ކުރެވިއްޖެ ނަމަ އަހަންނަށް ވަރަށް ހިތްހަމަ ޖެހުން ލިބެ އެވެ. އެއީ އަހަރެން ކަހަލަ ކުއްޖަކަށް އެހާ މަދު ތަޖްރިބާއަކާ އެކު ކުރަން ޖެހިލުންވި ކަމެއް ވެސް މެ އެވެ. އިނގިރޭސިވިލާތުގެ މަތީ ފަންތީގެ އޮފިޝަލުންނާ އެކު މިފަދަ މުހިންމު މަގާމެއްގައި މަސައްކަތްކުރާ ހަމުގެ ކުލަ މުށި ޒުވާން ކުއްޖަކު ފެނުމަކީ ހަމަ ޔަގީނުން ވެސް އާދަޔާހިލާފު މަންޒަރެކެވެ.
އަނެއް ފަހަރަކު ދިވެހި ރާއްޖޭގެ ބޮޑުވަޒީރު އޮނަރަބަލް އަހުމަދު ޒަކީ ބޭރަށް ކުރެއްވި ދަތުރުފުޅެއްގައި ގަމަށް ވަޑައިގެންނެވި ފަހަރު ވެސް ކޮމާންޑިން އޮފިސަރާއި އިސް އެހެން އޮފިސަރެއްތަކެއް މަރުހަބާ ދަންނަވަން ވަޑައިގެންނެވި އިރު ވެސް އެ ފޮޓޯތައް ނަގަން ދިޔައީ އަހަންނެވެ.
އޭރު ސްޓޭޝަންގައި ހުރި ހަމައެކަނި ފޮޓޯގްރާފަރަކީ އަހަންނެވެ. އެއީ އަހަރެން ވަރަށް ހާސްކުރުވި އިވެންޓެއް ނަމަވެސް، އެ އިވެންޓް ކެޕްޗާކޮށް، އެ ޒިޔާރަތުގެ ފޮޓޯތައް ނަގައި ފިލްމުތައް އަމިއްލަޔަށް ސާފުކޮށް ޕްރިންޓްކޮށް އެކި ފަރާތްތަކަށް ފޮނުވާލެވުމުގައި ކާމިޔާބު ހާސިލް ކުރެވުނެވެ.
މި ކަހަލަ މަތީ ޕްރޮފައިލް އިވެންޓްތަކުގެ އިތުރުން، ހަނގުރާމައިގެ މަތިންދާބޯޓުތަކާ ގުޅިގެން ހިނގާ އެކިކަންކަމާއި، އެސިޑެންޓްތަކާއި ގެއްލުންތައް ފަދަ އިމަޖެންސީ ހާލަތްތަކުގެ ފޮޓޯ ނެގުމަށް ވެސް އަހަންނަށް އަންގާލެވެ އެވެ. އެއީ ގޮންޖެހުން ބޮޑު އަދި ޑިމާންޑް ބޮޑު ވަޒީފާއެއް ނަމަވެސް އަހަރެން އަބަދުވެސް ހުރީ އެ މަސައްކަތަށް ތައްޔާރަށެވެ.
ގަމުގައި އުޅުނު ދުވަސްވަރު، އެތަނަށް އަހަރަކު އެއް ފަހަރު ތަފާތު ފޮޓޮގްރާފަރުން އައިސް ބަދަލުވަމުން ދެ އެވެ. އެއީ ވެސް އިނގިރޭސިވިލާތުގެ ޒުވާން ރޯޔަލް އެއާފޯސްގެ ފޮޓޯގްރާފަރުންނެވެ. އެގޮތުން ތަފާތު ހަތަރު ވަރަކަށް ފޮޓޯގްރާފަރުންނާ އެކު މަސައްކަތް ކުރުމުގެ ފުރުސަތު އަހަންނަށް ލިބުނެވެ.
އެއް ދުވަހަކު އޭގެ ތެރޭން ފޮޓޯގްރާފަރު ސަމާސާއަކަށް، އަހަރެންނަށް ރާއްޖޭގެ ރައީސްގެ ފޮޓޯގްރާފަރަކަށް ވެވިދާނެ ކަމަށް ބުނެ "ޖެއްސުންކުރި" އެވެ. އޭރަކު އެ ވާހަކަ ހަގީގަތަކަށް ވެދާނެކަމަކަށް ކުޑަކޮށްވެސް އަހަރެން ގަބޫލެއް ނުކުރަމެވެ. އެހެން ނަމަވެސް ތަޤްދީރު ރޭވިގެން އައީ ވަރަށް ވެސް ހައިރާންވާ ފަދަ ގޮތަކަށެވެ. އެވާހަކަ އެހެން ފަހަރަކަށް ބާއްވާލާނަމެވެ.
ހަސަން އަކީ ރައީސް މައުމޫން އަބްދުލް ގައްޔޫމްގެ ދައުރުގައި ރައީސްގެ ފޮޓޯފްރާފަރެއްގެ ގޮތުން ގިނަ ތަޖުރިބާތަކެއްކޮށްފައިވާ ކުޅަދާނަ ފޮޓޯގްރާފަރެކެވެ.