ރާއްޖޭން މިއަހަރު ރުބެއްލާ ނައްތާލުމަކީ އަމާޒެއް ކަަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެ އެވެ.
މިއަހަރުގެ ސިއްހަތު ދުވަހާ ގުޅިގެން ދެއްވި ހިތާބުގައި ނަސީމް ވިދާޅުވީ ދުނިޔެ ހޯދި ކޮންމެ ކާމިޔާބީއެއް އޭގެ އެންމެ ފުރިހަމަ ގޮތުގައި ރާއްޖެއިން ހޯދާފައިވާ ކަމަށެވެ. އެގޮތުން ބޮޑެތި ބައެއް ބަލިތަށް ނައްތާލެވި، ވެކްސިންގެ ރައްކާތެރިކަން ކަށަވަރު ކުރެވިފައިވާ ކަމަށާއި އަދި މެލޭރިއާއާ ހިމަބިއްސާ ޕޯލިއޯ އަދި ރުބެއްލާ ފަދަ ބަލިތަކަށް ވެކްސިންގެ ކަވަރޭޖް ހޯދާދެވިފައިވާ ކަމަށް ނަސީމް ވިދާޅުވި އެވެ.
ނުރައްކާތެރި ބައެއް ބަލިތައް ރާއްޖޭގައި ފެތުރުން ނިމުމަކަށް ގެނެވިފައި ވީ ނަމަވެސް، ޙައްލު ހޯދަން ޖެހޭ ކަންކަން އަދިވެސް އެބަހުރި ކަމަށް މިނިސްޓަރު ވިދާޅުވި އެވެ.
"އަމާޒަކީ، މި އަހަރު، ރުބެއްލާވެސް ރާއްޖެއިން ފޮހެލުން. 2025 ގެ ނިޔަލަށް ދިވެހިރާއްޖެއިން ޓީބީ ނައްތާލުން. އަދި، ފިޔަވަހި ތަކަކަށް ބަހާލައިގެން ފަހަރަކު ސަރަހައްދަކަށް އަމާޒުކޮށްގެން، ލެޕްރަސީ ވެސް މުޅިން ފޮހެލުން." ނަސީމް ވިދާޅުވި އެވެ.
ނަސީމް މިހެން ވިދާޅުވި އިރު ރާއްޖޭން ނައްތާލާފައިވާ ހިމަބިއްސަށް ދާދިފަހުން ކުޑަކުއްޖަކު ވަނީ ޕޮޒިޓިވް ވެފަ އެވެ. ކުޑަކުއްޖަކު ހިމަބިއްސަށް ޕޮޒިޓިވް ވުމުގެ އިތުރުން މި ބަލީގެ އިތުރު އެއް ކޭސް ދެނެގަނެވި ސާމްޕަލް ނަގައި ޓެސްޓް ހެދުމުގެ މަސައްކަތް ކުރެވެމުންދާ ކަމަށް އެޗްޕީއޭ އިން ބުނެ އެވެ.